Read Lengua Sur Job 4 Bible Online

Job 4 - Lengua Sur bible

Job 4

¹Job, megkalchehek sa' eykhe apwáxok xép apaqhetchesek, mowanchek eyke ko'o awanma aqsa.

³Xép, apkelxekmósso axta chá'a apxámokma énxet, apkelwasqakkáseykekxoho axta chá'a m'a apkelyelqamap nak;

⁴xép apkelwasqakkáseykekxoho axta chá'a apkeltémo elchempekxak néten ma'a apkelyaqnenma nak, tén han apkelméyak axta chá'a m'a ketók appalleykemxa nak,

⁵¿péya kamaskok kaxwók apwasqápeykekxoho apwet'a nak ektáhakxa aplegeykegkoho?

⁶Xeyep apteme nak meyenseyam apyetleykha Dios, xama énxet ekpéwomo aptémakxa, ¿háxko etnehek xép metnéssesek naqso'?

⁷Kalchetam hana sekxók apwáxok, kaxénwakxohok sa' kexa apwáxok apweteya kélmassésseykmo xama énxet meyke aptémakxa.

⁸Yetneyk ko'o ektémakxa sekwete énxet apkelane nak aqsok ekmaso agko', kápekxohok agko' chá'a m'a ektémakxa nak aqsok ekmaso aptekkesso.

⁹Apwátekhapchek agkok Dios yetlo aplo nepyeseksa m'a, emasséssók chá'a m'a apyókxoho nak.

¹⁰Elpáxamha eykhe han chá'a ektémól'a yámakméwa kalyexwéwha, elwanmeyásekxak eyke chá'a Dios elekkexchesek ma'a apma'ák.

¹¹Eletsapok sa' ektémól'a méwa megkótyehek ekyógkexma, kólexpánchessesek sa' ma'a apketchek.

¹²Wa'ak axta amya'a megkeynnaqte sekhakxa', xegkessek axta mañék ektáhakxa' hakte axta keynna'.

¹³Keñe axta axta'a eyáhapweykxal'a teyn énxet, ekwet'ak axta sekwanmagko aqsok ekmaso segyegwakkassamo.

¹⁴Ekyegwakkek axta ko'o; kelpexyennegkek axta ekyókxoho émpehek.

¹⁵Wátekhapchek axta nahát, keñe ekpexcha'a émpehek.

¹⁶Yetneyk axta énmeykha m'a, ekwet'ak axta chá'a pessesse agkok, axta eyke ót'ak ektémakxa ekyókxa'. Kelwónekxók axta exma', keñe sekleg'a xama kélpeywa ektáha s'e:

¹⁷“¿Apwancheya énxet etnehek appéwomo nápaqtók Dios? ¿Apwancheya etnehek eyáxñeyo aptémakxa nápaqtók ma'a ektáha axta apkelane?

¹⁸Weykmók nahan metnéssesso naqsók apkeltémakxa m'a apkelásenneykha apheykha nak néten. Hakte weykmok apwete Dios ekyetna aqsok melaqhémo m'a apkelásseneykha nak,

¹⁹¡eyke ekyágwánxa agkok ma'a énxet, apteme nak apyelqamákpoho, aptémól'a m'a tegma yelpa', apkelánamap la'a néten yagkamex, kélmowánal'a kóltepelkoho', ektémól'a yánseleklek!

²⁰Axto'ók chá'a agweta', keñe taxnám emassegwók; yetsapok chá'a meyke aptépéyak, méko han keytnakhaksohok awáxok.

²¹Máxa yátépépe kélyaqtónmal'a katnehek kamassegwók ma'a apyókxa; yetsapok aqsa chá'a meykexho apya'ásegwayam aqsok.”