Read Lengua Sur Job 40 Bible Online

Job 40 - Lengua Sur bible

Job 40

¹Xép Job, apmáheyo nak chá'a hélátegmoweykpok, sektáha nak ekha Sekyennaqte, ¿elwatakseya sa' seyátegmowéyak chá'a?

³Mowanchek ko'o wátegmowagkokxak xép, énxet mékoho ko'o, kéméxcheyk awanmak aqsa.

⁵Xámchek sekpaqméteykha, méko kaxwók yaqwánxa atnehek sekpeywa.

⁶Appaqhetchásekxeyk axta makham Wesse' egegkok Job, neyseksa éxchahayam ekyennaqte.

⁷Hexekmós kaxwók apteme apyennaqte, yátegmowák sa' se'e aqsok sélmaxneyeykha:

⁸¿Péya exchep hexének megkapéwomo sektémakxa, tén han seksexnenagko, keñe exchep etnehek máxa meyke aptémakxa'?

⁹¿Apmeyhek enxeykel'a exchep, sektéma nak ko'o? ¿Kaxtegyawhoya exchep xa appeywa ektéma nak ko'o?

¹⁰Yáhakkasap kaxwók apyennaqte tén han apteme wesse', yaqláp apcheymákpoho tén han apkelyenma.

¹¹Elano apyókxoho apkeleymákpoho nak: nágyéssekxa eltaqnaweygkok, etnessásekxa mékoho.

¹²Elano, keñe sa' etnessásekxak mékoho, elteyammaha élmasagcha'a nak apkeltémakxa, cham'a apheykegkaxa nak chá'a.

¹³Elátawanye sa' apyókxoho kañe' xapop, exátawom sa' chá'a m'a apkelmaheykegkaxa nak apkeletsapma.

¹⁴Keñe sa' ko'o ay'asagkohok eñama xép apmopwána apagko' ekmallahanchesso.

¹⁵Elano yegmen askok ekyawe Behemot, sélane axta ko'o, ektéma axta ko'o exchep séláneya: katwohok han pa'at ektémól'a weyke;

¹⁶elano, kayhok agko' émpehek ma'a, kalyeyha'ak han aktegák.

¹⁷Kayhek han ma'a épakyek, máxa yámet cedro, naqtétamáxchek áhak ma'a amagkok nak.

¹⁸Máxa sawo ekyexwase m'a axchakkok nak, tén han sawo ekyentaxno.

¹⁹Cháxa amonye' aqsok sélane axta; ko'o aqsa han ewanchek waqhek sektáha nak sélane.

²⁰Keleñamak han chá'a kélseykentegkesso pa'at yaqwayam katwok ma'a egkexe, eknéweykegkaxa nak aqsok nawha'ák éllo.

²¹Kaxnagkok chá'a m'a kóneg nak yámet ekha am'ák, kalyexanmok chá'a m'a neyseksa qamok ekmomhápexa nak.

²²Pessesse chá'a ekmésso m'a yámet ekha nak am'ák, apwakhayak ma'a xóxeg apkelámha nak neyáwa yegmen.

²³Yaweykxeyk agkok yegmen ma'a wátsam, megkakyehe'; kammok eykhe aweyhek ma'a yegmen, megkatneykha awáxok.

²⁴¿Yaqsa awanchek kamok, tén han kalhexyawássesek aqta'ák, essenhan kathetchesek aweyhek táma'?