Read Lengua Sur Job 41 Bible Online

Job 41 - Lengua Sur bible

Job 41

¹Tén han ma'a Leviatán ¿yásekkeseya sa' sókhaxe? ¿Apwancheya ethetchesek axkok ma'a táma'?

²¿Apwancheya elántaxnéssesek aweyhek táma', essenhan emallahanchessesek sawo ekhaxe amáxempenek?

³¿Kaltamhoya sa' kayóshok elano'? ¿Kayóshoya sa' ekpeywa kalának kának metnéssessamók exma ekmaso?

⁴¿Kánaya sa' chá'a etnehek apkeláneykha meyke néxa?

⁵¿Eneykeseya sa' chá'a ektémól'a nátetkok? ¿Ethetcheseya sa' yaqwayam katnehek ekneykáseykha m'a apketchek kelwán'ák?

⁶¿Elpaqméteya sa' énxet'ák exének ekwánxa ekyánmaga m'a apkelyánmagkásamákpexa nak chá'a énxet'ák? ¿Kólyaqtennagkoya sa' han yaqwayam kólchexák ekha ekyánmaga nekha'a étkók?

⁷¿Apwancheya elmallahanchessesek elyaqxák émpehek ma'a yágke, essenhan eyaqxák apqátek ma'a héwa?

⁸Appaknegwokmók sa' agkok ma'a, kalnapaxchek sa', kastéhegkeshok sa' han, metnessásekxók sa' han chá'a.

⁹Apwet'ak agkok énxet ma'a Leviatán, elyelqakpok aqsa elyaqnenek eñama apkelaye.

¹⁰Aplókásegkek agkok chá'a xama énxet, kalwok chá'a; méko nahan awanchek kanmexekxa'.

¹¹Énxet ektáhakxa enxoho apkenmexeykekxa', ¿apwancheya emallánek yetlo meyke ektáhakxa apyempehek? ¡Méko xama enxoho ekyókxoho keso nélwanmeygkaxa nak!

¹²Malwátéssemek sa' sekxeyenma ektémakxa m'a amagkok nak, tén han ma'a ektémakxa nak ekyennaqte meyke ekhémo.

¹³¿Yaqsa awanchek kalekkesek émpehek, essenhan kalyetxák ma'a émpehek ekyentaxno nak eyápomáxche'?

¹⁴¿Yaqsa awanchek kameykessesek átog, ekheykegkaxa nak ma'a am'ák ekpexchessamo nak egyempehek anlano'?

¹⁵Máxa nahan negáhakkásamaxche éléweykekxa m'a akpok nak, ekyepetcheykekxa mók, kalyeyha'ak nahan, máxa meteymog.

¹⁶Taháneykekxeyk han mók, yawanchek kamallánek éxchahayam.

¹⁷Yepetcheykekxók agko' nahan mók, máxa élaspomáxche temék, méko han awanchek kayenyókasek mók.

¹⁸Máxa takha' apkelyenma nahan ma'a étheykha; máxa han ekhem éltátchesso m'a aqta'ák ektémól'a kalse'.

¹⁹Aweyhek chá'a kalántépok éláléwe, kalnextog chá'a ekho táxa éllo.

²⁰Kalántépok chá'a ekpánma m'a aweyhek, ektémól'a ekteyapma ekpánma m'a élpaqteyapmakxa nak táxa.

²¹Énnama nahan kaláléwásekxak ma'a átex, kalántépok chá'a táxa eyáléwe aweyhek.

²²Kayhok agko' nahan ma'a ayespok, apyókxoho énxet han chá'a yeyk ma'a apkelwet'a enxoho.

²³Weykmók nahan ápetek ekyennaqte, megkatxehek kólyetxa', máxa m'a sawo.

²⁴Kayhek ahekhek, máxa m'a meteymog, kayhe', máxa m'a meteymog kéltekxekxól'a aqsok aktek.

²⁵Keltaqhaháha agkok, kawomhok apkelyegwakto m'a apkelyennaqte nak, yenyahagkok chá'a yetlo apkeláyo apagko'.

²⁶Kaqhok emha ektamagkok énxet ma'a sókwenaqte, sawhéwa, yágke tén han héwa.

²⁷Máxa pa'at katnéssesek ma'a sawo nak, keñe máxa yámet ápak katnéssesek ma'a sawo ekyexwase.

²⁸Megkanyehek han kótak ma'a yágke; máxa pa'at katnehek kólyetnak ma'a meteymog.

²⁹Máxa yámámok kéltekpaga katnehek kóltekpog ma'a yámet ekyawe nak; kasmaksek aqsa kañak élpáwá émpe'ék ma'a héwa.

³⁰Pexyawágkek agkok, kapáxqátek yelpa', máxa katnehek ma'a ektémól'a kélpeyncheyam xapop.

³¹Kalpaqtekkesek ma'a wátsam ekmattawóneg, ektémól'a weygke apwáxok élpaqteyapma; ektémól'a m'a kélméxenchessamakxal'a yegmen kélpáxaqteyáseykekxa pánaqte.

³²Kameykesek natámen ma'a yegmen, kalyenmohok han ekyaqmópesso.

³³Méko ekhawo ekyókxoho nak keso náxop; kelánamáxcheyk axta yaqwayam megkakyehek xama aqsok enxoho.

³⁴Kalwanyohok ma'a ekyókxoho aqsok éleymáxkoho nak, cha'a ekteme han néten ekyókxoho m'a aqsok nawha'ák éllo nak.