Read Lengua Sur Job 42 Bible Online

Job 42 - Lengua Sur bible

Job 42

¹Ekya'ásegkók ko'o exchep apmopwána elának ekyókxoho aqsok, méko xama aqsok megkapwagkexa elána'.

³Mowanchek ko'o matnéssesek naqso' ma'a ektémakxa nak apya'áseykegkoho aqsok. Ekxeyenmeyk axta aqsa chá'a ko'o m'a aqsok may'ásegko nak, cham'a aqsok élyawe mamowána nak ay'asagkoho'.

⁴Axta aptáhak xép seyáneya s'e: “Yeyxho, peyk ko'o apaqhetchesek xeyep; yátegmowák sa' se'e sélmaxneyeykha nak.”

⁵Amya'a seklege axta aqsa chá'a ekya'áseykegkohok xép, keñe kaxwók sekwet'a ahaqta'ák ahagko'.

⁶Cháxa keñamak sekmegqágwokmo nak ko'o eñama m'a sektémakxa axta chá'a sekpeywa, tén han sekhama náxop tén han neyseksa táhap.

⁷Axta aptáhak han Wesse' egegkok apcháneya Elifaz, natámen axta han apteme apkenagko Job xa ektáha nak: “Ektaqnókkók ahagko' ko'o exchep tén han ma'a apqánet apkelxegexma'a nak, hakte megkólpékessamók chá'a sélxeyenma ko'o, aptéma nak ma'a séláneykha Job appékessamo chá'a sexeyenma.

⁸Kólnáhap sa' kaxwók siete weyke kelennay'awo, tén han siete nepkések apkelennay'awo, keñe sa' kólyo'ókxak ma'a séláneykha Job, kóltemésses sa' aqsok élwatnamáxche eñama kéxegke. Séláneykha Job sa' elmaxnéssesek kéxegke, keñe sa' ko'o amok takha' apkelmaxnagko, matnéssessamók sa' exma ekmaso xama enxoho, payhawok eykhe atnéssesek eñama megkólteméssesso chá'a naqsók sélxeyenma, aptéma nak ma'a séláneykha Job apteméssessama chá'a naqsók sexeyenma.”

⁹Apkelxegkek axta m'a Elifaz, Bildad tén han Sofar, apkelánegko m'a apkeltamhókxa axta elanagkok ma'a Wesse' egegkok, apmeyk axta han takha' Wesse' egegkok apkelmaxnagko m'a Job.

¹⁰Keñe axta natámen apkelmaxnéssesso Job ma'a apkelxegexma'a nak, apmeyásekxeyk axta makham Dios ektaqmalma apheykha, ektéma axta m'a nanók axta, apyeykhássessekmók axta apkelmésso m'a aqsok, cham'a ekwánxa axta ekyetnama m'a sekxók axta.

¹¹Keñe axta apkelyo'ókmo apyókxoho aptáha meyk'a m'a apkelyáxeg apkelennay'a, tén han kelwán'ák tén han ma'a apnámakkok nak, keñe han ma'a apyókxoho nanók apkelweteykxa nak, apkelánegkek axta xamók ektámáxche ekyawe m'a apxagkok. Apkelxénchek axta han éllapwámegkoho xamo', tén axta aptaqmelchessásekxo apwáxok, eñama m'a ekyókxoho aqsok ekmaso apchahe axta m'a Wesse' egegkok. Xama axta han chá'a apmeyásak selyaqye, tén han ma'a kélatchesso kélaphék sawo ekyátekto ekmomnáwa.

¹²Appasmomchek axta Dios amonye' yaqwayam katnégwók néxa apha m'a Job, apyeykhássesseykmók axta apkelmésso aqsok ma'a ekweykenxa axta m'a nanók axta. Catorce mil axta apweykmok nepkések apnaqtósso, seis mil yányátnáxeg, mil axta m'a weyke kéltéteykekxa nak mók, keñe mil yámelyeheykok.

¹³Catorce axta han apyókxoho apketchek apkelennay'a, keñe ántánxo m'a apketchek kelwán'ák.

¹⁴Jemimá axta apteméssessók ekwesey m'a katnaha étkok nak, keñe axta m'a ektétéyak nak Quesiá, keñe axta m'a mók nak Queren-hapuc.

¹⁵Méko axta han kelán'a éltaqmalma agko' ekyókxoho keso nélwanmeygkaxa', ektéma axta m'a Job apketchek. Apxeyenmeyk axta han elmeyásekxak aqsok apagkok neptámen ma'a yáp, yetlo m'a kelyapma nak.

¹⁶Ciento cuarenta apyeyam apagkok axta han weykmok apha Job natámen xa, apwányamók apagko' axta aptemék apketsapma, apkelwetayók axta m'a apketchek, aptawán'ák tén han ma'a pók aptawán'ák nak, tén han ma'a apketchek aptawán'ák nak.