Read Lengua Sur Job 7 Bible Online

Job 7 - Lengua Sur bible

Job 7

¹Yentexek ektémakxa apha énxet keso náxop, hawók ma'a ektémakxal'a apkelane aptamheykha sẽlpextétamo,

²máxa m'a kélásenneykha naqsa apmáheyól'a eykhe chá'a exek ma'a pessesse, máxa m'a kélásenneykha ekpekhéssól'a emok ekyánmaga aptamheykha.

³Yókxoho pelten eyaqhémo sekweynchámeykha, yókxoho axta'a eklegeykegkoho ewáxok.

⁴Eytek chá'a, keñe kawegqagkok aqsa chá'a axta'a; héleklamok sélpeynchamaxche sekyetno, ekwokmoho ekyexwasakmo, keñe katnehek chá'a ewáxok se'e: ¿Wokmeya sekxátekheykxa'?

⁵Apsawheykekxók émpehek yápa apketkók, kelyenneykekxeyk han émpe'ék sélyense, kelpexyaweykenteyk nahan cháwen émpehek élenmaga sélyense.

⁶Chágketwokmek néxa sekha, méko kaxwók aleyxek, yahamok agko' ekxega máxa m'a yámet ekmanyehel'a kélatcháseyak kélótma.

⁷Oh Dios, kaxén apwáxok ekhawo ko'o sekyennaqte m'a ektémól'a xama nentekkesso nennama, móteyekxók sa' chá'a ekpayheykekxa ewáxok.

⁸Méko sa' nahan héteyekxohok chá'a; hélanok sa' eykhe exchep, mehétyehek sa' eyke, hakte amassegwók sa'.

⁹Temék aphagwayam nak chá'a takhaxpop ma'a ektémól'a yaphope kayeykha', keñe kamassegwók: mopwanchek chá'a etaqhohok apkeñamakxa', melwetekxók han chá'a m'a apnámakkok nak.

¹¹Cháxa keñamak mamako nak ko'o awanmeyekxa'. Mamágwakxeyk sa' axénmakha seklegeykegkoho, tén han eklo ewáxok.

¹²¿Yegmen askok ekyawe ya ko'o eyeneyk, ekyetnama nak wátsam ekwányam, apkeltamho nak héllanha?

¹³Wának chá'a ko'o ótak séllókasso sekyampe néten sekyetnamakxa, keñe han kamasseksek seklegeykegkoho m'a sekteyenma,

¹⁴keñe chá'a exchep hégwakkashok apagko' hexekmósek aqsok sekwanmagko, ¡hégwakkasek chá'a hexekmósek sekwanmagko ekmaso!

¹⁵Tásek xeyep eyaqhápok eyespok; émenyeyk ko'o watsapok, mómenyeyk aweynchamha chá'a.

¹⁶Massék sélenmáxexko. Mómenyeyk alenxanmagkohok sekha. Ná hélya'es kaxwók exma', hawók ko'o sekyennaqte m'a ektémól'a nentekkesso nennama.

¹⁷¿Yaqsa m'a nentáha nak énxet, apmopmenyého nak chá'a? ¿Yaqsa ektéma ekyetnakhassamo nak chá'a apwáxok?

¹⁸¿Yaqsa ektéma apkeláneykencha'a nak chá'a yókxoho ekhem? ¿Yaqsa ektéma apyekkeynma chá'a?

¹⁹¿Yaqsa ektéma melwátéssama séláneykha yenmexhok mók nekha', yaqwayam enxoho wawának sekxók anaqsepekxak émánog?

²⁰Élanak agkok ko'o may'assáxma, megkatnéssessamók exma ekmaso exchep, apkeláneykha nak chá'a énxet'ák. ¿Yaqsa ektéma sepeykessamo nak chá'a ko'o semakte yágke apagkok? ¿Ekyentaxnéssegkeya ko'o apha exchep?

²¹¿Mopwancheya heyásekhekxohok xép sektémakxa may'assáxma? ¿Mopwancheya heyásekhekxohok sektémakxa sélane aqsok ekmaso? Kaxwók sa' eytek náxop: hektamok sa', amassegwók sa' eyke.