Read Lengua Sur Job 8 Bible Online

Job 8 - Lengua Sur bible

Job 8

¹¿Háxko ekwánxa elwátessók apteme appeywa xa ektáha nak, ekho nak éxchahayam ekyennaqte?

³Hakte Dios ekha nak Apyennaqte, mopwanchek elának ma'a aqsok megkapéwomo nak, kapéwhok chá'a m'a aqsok apkelanakxa enxoho.

⁴Apketchek kexa keñamak apkeláneyak melya'assáxma nápaqtók Dios, keñe apméssama apkellegeykegkoho ekpayhawo nak etnéssesek.

⁵Ektam Dios ekha nak Apyennaqte, elmaxna yának kapyóshok elanok xép.

⁶Aptemék sa' agkok xép eyáxñeyo aptémakxa tén han ekpéwomo, tén sa' elanha chá'a, keñe sa' egkeyásekxak makham ma'a apxagkok, ekpayhawo nak exkekxak eñama ekpéwomo aptémakxa.

⁷Megkaxók sa' ekwánxa axta ekxámokma aqsok apagkok peya nak étak natámen xa, kayeykhágwomhok sa'.

⁸Etegyaha sa' amya'a ektémakxa axta apheykha m'a apyapmeyk nano', eltámesáp sa' ektémakxa axta aqsok apkelwete m'a nanók énxet'ák.

⁹Kaxwe eyke negko'o, magya'ásegkok aqsok; hawók ektémakxa negko'o negheykha náxop ma'a ektémól'a kayeykhak pessesse.

¹⁰Apwanchek eyke exchep eltennasha m'a nanók énxet'ák nak, tén han elxekmósek ekxámokma agko' aqsok.

¹¹Wánxa awanchek kaktog ekho' m'a ekyawakxa nak yegmen, tén han tappo;

¹²kalyameyk eyke aqsa megkólyaqtennákxoho, tén han élyápaqmatakxoho áwa', amonye' élyamaye m'a mók pa'at nak.

¹³Cháxa ektémakxa han ma'a élmasagcha'a nak apkeltémakxa, megkalxeyenma nak apkelwáxok Dios: megkatyepek ma'a aqsok apkelhaxnéyak.

¹⁴Máxa yaweyke támpagkok ma'a apkelásenneykekxa nak chá'a, tén han ma'a apcháyo nak chá'a.

¹⁵Emáwhok sa' eykhe elmágwok ma'a yátépépe nak, eyetyapok sa' aqsa; emáwhok sa' eykhe elyepetchak ma'a yaweyke támpagkok nak, melmagkehek sa' eyke.

¹⁶Aphawók énxet'ák élmasagcha'a apkeltémakxa m'a ektémakxa nak pa'at élyápaqmátamo nak áwa' éltátchessól'a mayáhat, eksawheykekxohol'a m'a ekyókxoho nak pánaqte exnók kélcheneykekxexa';

¹⁷élpextehetmal'a kepmenák ma'a meteymog, tén han élyepetchél'a,

¹⁸apkelpátekkessek agkok énxet ma'a émhakxa nak, méko han kay'asagkohok émhakxa axta m'a.

¹⁹Cháxa ektémakxa kamassegwók ektaqmalma apha, keñe katépekxak makham mók pa'at ekyaqmagkasso.

²⁰Meyenyawha eyke Dios ma'a énxet ekpéwomo nak aptémakxa, mepasmehek eyke m'a élmasagcha'a nak apkeltémakxa.

²¹Sa' egkeyásekxak makham xép apkektegmeykha m'a, tén han apwóncháseykha kapayhekxak apwáxok;

²²elmegqáwhok apagko' sa' eyke m'a apkelenmexma, kólmasséssessók sa' nahan apxanák ma'a élmasagcha'a nak apkeltémakxa.