Read Lengua Sur Salmos 10 Bible Online

Salmos 10 - Lengua Sur bible

Salmos 10

¹Wesse', ¿yaqsa ektéma mexma nak ketók negheykegkaxa? ¿Yaqsa ektéma segyexánegkessama nak ekwa'a enxoho ekyentaxno negheykha?

²Yetlo éleymáxkoho apkelwáxok chá'a apmáheyók enaqtawasagkohok élmasagcha'a nak apkeltémakxa m'a meyke nak aqsok apagkok; kalmekxohok sa' eyke agko' ma'a kelhanma apnegkenéyak apmáheyo elmok ma'a énxet'ák.

³Kaltaqmalmakha chá'a apkelpeywa elxénmakha élmámenyého apkelwáxok ma'a élmasagcha'a nak apkeltémakxa; elwanyaha eyke chá'a Wesse' egegkok ma'a apkelmopmenyého nak exámasagkok aqsok apagkok, exénmakha chá'a ekmaso.

⁴Elsekheykha chá'a elyeheykha etnehek elpaqmétek élmasagcha'a nak apkeltémakxa s'e: “Méko Dios. Méko hexénchásekxohok sektémakxa.” Wánxa ektémakxa élchetamso apkelwáxok xa.

⁵Tásek chá'a katnehek ekteyapma m'a ekyókxoho aqsok apkelánégkaxa enxoho. Megkaxegkáseykha elya'asagkohok ma'a ektémakxa nak xép apkelyekpelchémo énxet'ák. Elesmaksek aqsa m'a apkelenmexma nak,

⁶kalxének chá'a apkelwáxok méko kaltaqhesha, tén han melwetyehek chá'a ekmaso apheykha.

⁷Kelánexkók ekmaso m'a ektémakxa nak apkelpeywa, apkelmopwancha'a amya'a, apkelyemneykha apnámakkok; apkelpóssegkek chá'a apkelpeywa apmáheyo enaqtawasagkohok apnámakkok, tén han elanagkok aqsok ekmaso.

⁸Apkelyexanmeykha chá'a m'a neyáwa nak apheykegkaxa énxet'ák, elyexakpohok chá'a yaqhek ma'a énxet meyke nak aptémakxa. Meyenyókasek chá'a apaqtek elanha m'a énxet meyke nak ekmasma:

⁹máxa m'a méwa ekyetnól'a kañe' meteymog áxwa, elanha chá'a énxet apmopyósa m'a apkelyexanmeykegkaxa nak, eleyxek chá'a éphagwók ma'a apheykegkaxa nak, apmeyk agkok xa, éñawaksek chá'a yaqxegkesek yám'én apagkok.

¹⁰Exnagkok chá'a, elyaqsekxohok chá'a emáwhok elnextog, keñe ethánek chá'a m'a meyke nak ekmasma.

¹¹Yának chá'a kalwagqakmok Dios ma'a élmasagcha'a nak apkeltémakxa, yának chá'a yaqlásak nápat, keñe métyehek chá'a exma.

¹²¡Wesse', yempekxa néten, ellegássesagkoho! ¡Nágkalwánaqma m'a énxet'ák kélyentaxnéssesso nak apheykha!

¹³Dios ahagkok, ¿yaqsa ektéma apwanyémo nak xép ma'a élmasagcha'a nak apkeltémakxa, apkenagkama exchep melxénchásekxók apkeltémakxa?

¹⁴Apweteyak xép ma'a apkeltémakxa ekmaso senlókassamo nak anlano'; ¡apweteyak xép, etnéssesek sa' han ma'a ekpayhawo nak etnéssesek! Apkelyexánegweykmek xép ma'a meyke nak élmasma; xép appasmo chá'a m'a élyéheykha nak.

¹⁵¡Elekkexches apaktegák ma'a élmasagcha'a nak apkeltémakxa! ¡Ellegássesagkoho eñama apkeltémakxa ekmaso, ekwokmoho eksawheyxkoho agko' ma'a apkeltémakxa ekmaso!

¹⁶Wesse' egegkok apteme Wesse' apwányam memassegwayam, ¡kólántekkesek sa' apkelókxa m'a melya'áseyak nak Dios!

¹⁷Wesse', yeyxhok chá'a exchep apkelmaxnagko m'a énxet'ák meyke nak élmasma, elwasqakkásekxohok chá'a, elanha nahan chá'a.

¹⁸Etaqmelchessásekxa ekheykha m'a élyéheykha nak, tén han ma'a kélnaqtawáseykegkoho nak: ¡kamaskok sa' aptekkesso élmeneymáxche m'a énxet apkeñama nak apkelánamap xapop!