Read Lengua Sur Salmos 102 Bible Online

Salmos 102 - Lengua Sur bible

Salmos 102

¹Wesse', yeyxho sélmaxnagko, ¡yoho kawakxohok sekwóneykha m'a aphakxa nak!

²Ná etne ko'o mehelányo ekwa'a enxoho ekyentaxnamo sekha; ¡heyeyxho sa'! ¡heyátegmowák sa' heykxa sekwóneyncha'a enxoho chá'a!

³Hakte massegwokmek ko'o sekyennaqte ektémól'a éten, kelmexneyk exchakkok ektémól'a táxa,

⁴yelqáxcheyk ko'o ewáxok, ektémól'a pa'at élyamaye; ¡massegwokmek han ekmátsa sekmáyhe sekto!

⁵Kelyepetchákxeyk émpehek ma'a exchakkok eñama seyápentegeykha seklegeykegkoho.

⁶Máxa sawe ektemék apyáqtol'a yókxexma meykexa énxet, máxa leklek ektemék apyáqtol'a nepyeseksa tegma aphopák appalleyam.

⁷Matyenmak ko'o. Máxa náta ektemék ekyáqtól'a axakkók néten tegma.

⁸Megkeytyapwágweykmok setaqnaweykha m'a sélenmexma nak, apmeykha chá'a sekwesey apkeltémo katnégwomhok exma ekmaso énxet'ák.

⁹Táhap aqsa ektók, matók ma'a nento nak chá'a; kenchahamaxchekxeyk ahaqta'ák égmen'ák ma'a sekya nak,

¹⁰eñama exchep aplo, tén han setaqnagko, ey'assegkek néten yaqwayam heyenyók.

¹¹Hawók ko'o sekha m'a ektémól'a pessesse kayeykha'; máxa pa'at élyamaye temék émpehek ekyamáya.

¹²Wesse', megkamassegwomek eyke exchep apteme Wesse' apwányam; ¡kaxénwakxohok sa' aqsa chá'a kélwáxok apwesey!

¹³Yempekxa néten, kayósho elanok Sión, hakte wokmek kaxwók ekhem yaqwayam yásekhekxoho'!

¹⁴Apkelásekhayók xép apkeláneykha m'a meteymog ekpalleyam nak tegma; chaqhegkek apkelwáxok kélteméssessama nápakha'a apketkók.

¹⁵Apyókxoho énxet'ák sa' etnehek apcháyo apwesey m'a Wesse' egegkok, apyókxoho apkelwesse'e apkelwányam apheykha nak keso náxop sa' etnehek apcháyo m'a apcheymákpoho,

¹⁶cham'a apxátekhásekxo sa' makham ma'a Sión apxekmowáseykpekxoho sa' makham yetlo apcheymákpoho,

¹⁷aphaxneykxoho sa' makham apkelmaxneyéyak ma'a meyke nak ekpasmo, apma sa' makham takha' m'a aqsok apkelmaxneyeykha.

¹⁸Kanaqtáxésaxchek sa' weykcha'áhak xa, yaqwayam sa' kaleyxek makham ma'a aptépeykekxa sa' makham egmonye', yaqwayam sa' elpeykeshok Wesse' egegkok ma'a mepallakmo nak makham.

¹⁹Apkenmexeykentamok náxop Wesse' egegkok ma'a aphamakxa nak néten, cham'a néten aphamakxa ekpagkanamaxchexa nak,

²⁰yaqwayam yeyxhok apkelápentegeykha ekmáske m'a apkelmomap nak, tén han elántekkesek ma'a apkelxénamap nak kólnápekxa';

²¹yaqwayam enxoho kaxénaxchek apwesey Wesse' egegkok ma'a Sión, cham'a Jerusalén, tén han kólpeykesho',

²²apchaqnákxo sa' yaqwayam elpeykeshok apyókxoho énxet'ák apheykha nak keso náxop.

²³Matnamók sekwányamók semasséssessama sekyennaqte; eyaqwátéssessamók sekweynchámeykha.

²⁴Axta ektáhak ko'o s'e: “Dios ahagkok, nágyoho watsapok sektáhakxoho étkok.” ¡Méko néxa exchep apha!

²⁵Appekkenmeyk axta xapop ma'a sekxók eyeynókxa axta; xép apagko' axta apkelane m'a néten.

²⁶Kalmassegwók sa' eyke ekyókxoho xa, keñe exchep memassegwome'. Apák sa' katnahagkok ekyókxoho xa, aptémól'a apáwa etnehek aphápak; ¡elyaqmagkasek sa' xép mók keñe sa' kalyaqmagkasek mók, ektémól'a kólyaqmagkasek pók apáwa kólyenyók!

²⁷Meyaqmagkassemek eyke chá'a aptémakxa exchep, megkatnégwomek néxa apha.

²⁸Egkések sa' meyke ektáhakxa apheykha m'a apkeláneykha aptawán'ák neptámen nak; eltaqmelchesek sa' chá'a m'a egketchek nentámen.