Read Lengua Sur Salmos 105 Bible Online

Salmos 105 - Lengua Sur bible

Salmos 105

¹¡Kólmés ekxeyenma kélwáxok Wesse' egegkok! ¡Kólxén ma'a apwesey nak! Kóltennasha énxet'ák ma'a aqsok apkelane nak.

²Kólmeneykmásses negmeneykmasso. ¡Kólxén ektémakxa nak élyawe aqsok apkelane!

³Kaqheykha kélwáxok ma'a apwesey ekpagkanamaxche nak. ¡Kalpayhekxoho kélwáxok kéxegke, kélchetamso nak chá'a Wesse' egegkok!

⁴Kólyo'ókxa chá'a Wesse' egegkok, tén han ma'a apmopwána nak, kólyo'ókxa chá'a Wesse' egegkok yókxoho ekhem.

⁵Kaxénwakxoho chá'a kélwáxok ma'a ektémakxa axta aqsok ekyawe apkelane, cham'a aqsok sempelakkasso nak agweta', tén han ma'a apxeyenma axta elyekpelkohok énxet'ák;

⁶kéxegke Abraham aptawán'ák neptámen apteme axta apkeláneykha, kéxegke Jacob axta apketchek apteme axta apkelyéseykha.

⁷Cham'a apteme Dios Wesse' egagkok ma'a; ¡sawheykekxók han apteme Wesse' apwányam keso náxop!

⁸Megkamassegwomek chá'a ekxéneykha apwáxok ma'a ekhémo mók nélpaqhetchásamáxkoho apagkok, tén han ma'a appeywa apmésso axta megkatnégwayam néxa',

⁹cham'a ekhémo mók apkelpaqhetchásamákpoho apméssama axta m'a Abraham, apteméssessama axta naqsók elanaksek ma'a Isaac

¹⁰apkelánéssama axta segánamakxa m'a Jacob, apteméssessama axta ekhémo mók apkelpaqhetchásamákpoho meyke néxa m'a Israel,

¹¹cham'a aptéma axta apkenagkama s'e: “Agkések sa' xép xapop Canaán, apxaweykekxa ekpayhawo nak exkekxa'.”

¹²Apqántawók axta eykhe m'a, máxa mók nekha apkeleñama axta aptamheykegkok apheykencha'a xa yókxexma nak,

¹³apkelmaheykegkek axta chá'a mók apheykegkaxa, keñe han mók yókxexma,

¹⁴axta eyke yahayók Dios enaqtawasagkohok xama énxet enxoho; weykmók axta han aptéma apkelanagkama kelwesse'e apkelwányam se'e:

¹⁵“Nágkólteméssesha aqsa ektáha nak ko'o sélyéseykha, nágkólnaqtawasagkoho han ma'a apkellegasso nak sekpeywa.”

¹⁶Aptekkessessegkek axta meyk segaqhe m'a apchókxa nak, apmassésseykmek axta ekyókxoho nento,

¹⁷apcháphassegkek axta eyke José apmonye'e m'a, kélyamasma axta yaqwayam etnehek kélásenneykha naqsa.

¹⁸Kelásséssessegkek axta apmagkok kélnaqtehetchessama cadenas, ¡kéltehetchessegkek axta sawo apyespok!

¹⁹Yepkónmeyk axta José m'a Wesse' egegkok appeywa, ekweykmoho ektéma m'a apxeyenma axta chá'a José.

²⁰Apkeltémók axta kólyenyekxak ma'a wesse' apwányam, apkeláneykencha'a axta chá'a apxámokma apagko' énxet'ák;

²¹apteméssessegkek axta apkemha apmonye', tén han wesse' m'a apxagkok, tén han apkeláneykha m'a ekyókxoho aqsok apagkok ekyetnakxa nak,

²²yaqwayam enxoho elxekmósek chá'a m'a ekha nak chá'a kéláyo, tén han etnéssesek chá'a apkelya'áseykegkoho m'a apkelpaqhetcháseykha nak chá'a wesse' apwányam.

²³Keñe axta apwaya nahan ma'a Israel, cham'a Jacob, aphegkek axta Egipto megkatnahakxa nak apchókxa, xapop nak ma'a Cam.

²⁴Apxámassáseykekxeyk axta énxet'ák apagkok ma'a Dios, apkelyennaqtéssamok apagko' axta han, apyeykhásseykmok axta m'a egipcios.

²⁵Apkeltémok axta elenmexek egipcios ma'a énxet'ák apagkok, tén han elyexanchesha m'a Dios apkeláneykha nak.

²⁶Keñe axta Dios apcháphassama apkeláneykha Moisés, tén han Aarón, cham'a ektáha axta apkelyéseykha,

²⁷apkeláneykegkek axta aqsok sempelakkasso nak agwetak ma'a yókxexma meykexa nak énxet eñama nak Dios: ¡Aqsok sempelakkasso nak agwetak élyawe m'a xapop nak Cam!

²⁸Apcháphassegkek axta Dios ekyáqtessóxma, eyapma axta ekyókxoho aqsok, axta eyke yaháxenmok appeywa m'a egipcios.

²⁹Éma axta aptemessáseykekxak yegmen ma'a wátsam apagkok nak, apkelnáhakkassegkek axta han kelasma;

³⁰apsawhessáseykekxók axta apchókxa napnekteg, apwagkassamok axta m'a apteyenmakxa nak wesse' apwányam.

³¹Appaqmeyesmeyk axta Dios, tén axta appayheykekxo apxámokma apagko' sempéhe, tén han páye m'a xapop apagkok nak egipcios.

³²Apcháphassegkek axta yegmen élyennaqte, tén han táxa eyáléwe m'a apchókxa, keñe ekmámeye megyáphassama.

³³Apkelekkexchessegkek axta anmen yámet apkeneykekxa, tén han higo yámet. ¡Apkelekkexmeyk axta han yenta'a élyawe m'a Egipto!

³⁴Appaqmeyesmeyk axta Dios, keñe axta apkelwaya sawa'; ¡apxámok apagko' axta m'a, mogwanchek axta ólyetsetek!

³⁵¡Apteykegkek axta pa'at ma'a yókxexma, tén han ma'a ekyókxoho aqsok ektekkesso axta xapop!

³⁶¡Apkelnapmeyk axta chá'a apyókxoho kélketchek appalleyam nak apmonye'e, étchek ma'a kelán'ák Egipto, cham'a kañe' nak Egipto!

³⁷Keñe axta natámen Dios apkelántekkessama énxet'ák apagkok, yetlo apkelso sawo ekyátekto élmomnáwa, tén han sawo élmope élmomnáwa, méko axta han xama enxoho énxet appelápeyam.

³⁸Kelpayheykekxeyk axta apkelwáxok énxet'ák Egipto apkelweteya apkelxegama, hakte apkeláyak apagko' axta.

³⁹Appeykessegkek axta yaphope Dios yaqwayam kápok, tén han táxa yaqwayam kalsássesek exma axta'a.

⁴⁰Apkelmaxnagkamchek axta aptéyak, keñe apcháphássessama sénhek, apkelyaqkánegkessegkek axta apkeleykegko m'a nento éleñama nak néten.

⁴¹Appáxqatmeyk axta meteymog, keñe axta ekteyapma yegmen, máxa wátsam axta temék ényahama m'a yókxexma meykexa nak énxet.

⁴²Hakte xeyenmeyk axta apwáxok appeywa ekpagkanamaxche', apméssama axta m'a apkeláneykha Abraham.

⁴³Apkelántekkessegkek axta Dios énxet'ák apagkok ektáha axta apkelyéseykha, yetlo apkelwehéseykha élpayheykekxa apkelwáxok,

⁴⁴apméssegkek axta m'a xapop apagkok nak pók énxet'ák, tén han aqsok ekyexna nak apkeneykekxa,

⁴⁵yaqwayam enxoho elyahakxohok chá'a m'a Wesse' egegkok segánamakxa apagkok, tén han elanagkok chá'a m'a nélxekmowásamáxche' apagkok nak. ¡Aleluya!