Read Lengua Sur Salmos 106 Bible Online

Salmos 106 - Lengua Sur bible

Salmos 106

¹¡Aleluya! Kólmés ekxeyenma kélwáxok Wesse' egegkok, hakte tásek apwáxok ma'a, megkamassegwomek chá'a segásekhayo.

²¿Yaqsa awanchek kaxének ma'a aqsok ekyawe apkelane nak Wesse' egegkok? ¿Yaqsa awanchek katnehek kalpeykeshok ma'a ekpayhawo nak chá'a kóltéhek kélpeykessamo?

³Apkeleñémo énxet apkelane nak chá'a aqsok ekpéwomo, tén han apkelane nak chá'a ekpayhawo nak chá'a etnehek.

⁴Wesse', kaxén sa' ko'o apwáxok apteméssesa sa' ektaqmela m'a énxet'ák apagkok; náhelwánaqma aqsa ko'o apya'aweykto sa' elwagkasek teyp,

⁵yaqwayam sa' ko'o ótak ektáhakxa ekpayheykekxa apkelwáxok ma'a apkelyéseykha nak, yaqwayam sa' ko'o kapayhekxak ewáxok tén han alsawaksohok xamók ma'a énxet'ák ektáha nak xép apagkok.

⁶Nenláneykegkek negko'o mólya'assáxma, neghawók ma'a ẽlyapmeyk nano' axta; nennaqtawásamáxche'; nenláneykegkek aqsok ekmaso.

⁷Axta yáyók ẽlyapmeyk nanók aqsok ekyawe apkelane apheykegkaxa axta m'a Egipto; kelwagqámeykegkek axta m'a ektémakxa ekyawe segásekhayo, apkenmexeykekxeyk axta exchep ma'a neyáwa nak Wátsam Ekwányam Ekyexwase.

⁸Apkelwagkassegkek axta eyke teyp ma'a Dios, apxekmóssegkek axta apmopwána eñama apmasma m'a apwesey.

⁹Appaqhetchessegkek axta Wátsam Ekwányam Ekyexwase, yetlómok axta han ekyamaye. Apkelyeykháseykekxeyk axta m'a kañók agko' nak wátsam ekwányam, máxa axta apteméssessók ma'a xapop ekyamáyekxal'a exma.

¹⁰Apkelwagkassegkek axta teyp nepyeseksa m'a apkelenmexma, tén han neyseksa apkelma m'a apkeltaqnaweykencha'a axta chá'a.

¹¹Chápeykekxeyk axta yegmen ma'a apkelenmexma, méko axta han xama enxoho apkeymomap.

¹²Cháxa eyápaqhágwokmo axta melya'ásseyam ma'a appeywa axta apmésso Dios, apkelmeneykmássek axta nahan apkelpeykásawo.

¹³Ñohók axta eyke han élwagqámeykegko m'a aqsok apkelane axta Dios, axta elhaxanmak eltennaksek ma'a ekxeyenma axta apwáxok etnéssesek.

¹⁴Apyekkeynmeyk axta Dios ma'a yókxexma meykexa nak énxet, meykexa nak xama aqsok, apkeltémo elmések ma'a aqsok apkelmopmenyého.

¹⁵Apméssegkek axta Dios ma'a aqsok apkelmaxneyeykha, apchahayak axta eyke han negmasse segaqhamo nak.

¹⁶Apnathamakpek axta eyke han Moisés ma'a apkelpakxeneykegkaxa axta, tén han Aarón, cham'a apkelpagkanma axta Wesse' egegkok.

¹⁷Keñe ekmayheykekxo xapop, chápeykekxeyk axta han ma'a Datán, yetlo m'a Abiram axta apkelxegexma'a.

¹⁸¡Táxa axta kelwatnók ma'a apyókxoho nak! ¡Táxa eyáléwe axta kelwatnók ma'a élmasagcha'a axta apkeltémakxa!

¹⁹Apkeláneykegkek axta xama weyke étkok kéleykmássesso m'a egkexe Horeb nak, kéleykmássesso kélpeykáseykekxa axta m'a sawo ekyátekto ekmomnáwa nak, apkelpeykessamók axta:

²⁰¡apkelwátéseykegkek axta apkelpeykessamo m'a Dios apcheymákpoho nak, aptamheykekxeyk axta apkelpeykessamo m'a weyke kéleykmássesso ektómo nak pa'at!

²¹Kelwagqámeykegkek axta m'a Dios Apkelwagkasso nak Teyp, apkeláneyo axta chá'a aqsok élyawe agko' ma'a Egipto,

²²apkeláneya axta chá'a aqsok sempelakkasso agwetak ma'a apchókxa Cam, tén han ma'a aqsok segyegwakkassamo nak agwetak ma'a Wátsam Ekwányam Ekyexwase.

²³Apxeyenmeyk axta eykhe Dios emasséssók; apnókáseykha axta eyke m'a Moisés, cham'a aptáha axta apkelyéseykha, apmasséssessegkek axta aplo m'a Dios, apmasma emasséssók.

²⁴Néwomók axta han aptaqnawágweykmo m'a apchókxa ektaqmalma, apkelya'ásseykmek axta m'a apmésso axta appeywa Dios;

²⁵kalesagchaha axta chá'a apkelpeywa exének Wesse' egegkok ma'a kañe' apkelpakxenéyak, melyahakxeyk axta chá'a m'a apkeltamhókxa enxoho chá'a etnehek.

²⁶Tén axta apya'asa néten apmek, apxéna naqso' yának eletsapwók ma'a yókxexma meykexa nak énxet,

²⁷tén han apxéna eletsapok ma'a aptawán'ák neptámen, tén han apxéna yexpánchesha elya'aksek nepyeseksa m'a apyókxoho pók énxet'ák melya'áseyak nak Dios.

²⁸Apkelyetleykekxeyk axta m'a Baal-peor, apteykegkek axta han chá'a m'a kélnáhakkasso nak aqsok kéláyókxa meyke élennama nak.

²⁹Aplókáseykegkek axta Dios apkeláneykegko apkeltémakxa ekmaso, tén axta ekpayheykekxo nepyeseksa m'a negmasse ekmaso.

³⁰Tén axta Finees apkempeykekxo néten aplegassáseykegkoho m'a ektáha axta apkelsexnenagko, tén axta ekmassama m'a negmasse.

³¹Apxeyenmeyk axta han Dios ekpayhawo xa aqsok apkelane yaqwayam katnehek chá'a meyke néxa, ekweykekxoho m'a apyapmeyk, tén han apketchek.

³²Aplókassegkek axta han Dios ma'a nekha nak ekteyapmakxa yegmen Meribá, axta keñamak ekmasagko ektémakxa Moisés eñama apsexnenagko xa énxet'ák nak,

³³aplókassessegkek axta apwáxok, appaqmeyesmeyk axta aqsa chá'a meyke apkeláneykegkoho appeywa.

³⁴Axta emassésseykmok ma'a énxet'ák apkeltémo axta emasséssók Wesse' egegkok.

³⁵Appaxqeykekxeyk axta aqsa m'a melya'áseyak nak Dios, aptamheykegkek axta han ma'a aptamheykegkaxa axta chá'a:

³⁶apkelpeykessamók axta m'a kéleykmássesso apagkok nak xa pók énxet'ák nak, élsexnenagkama axta appalleykmo,

³⁷hakte apkelméssegkek axta chá'a apketchek apkelennay'a tén han kelwán'ák apkelnáhakkassama xa kelyekhama nak.

³⁸Apkelnapmeyk axta m'a meyke nak éltémakxa, cham'a apketchek apkelennay'a nak, tén han kelwán'ák, apkelméssegkek axta chá'a m'a aqsok kéláyókxa nak Canaán. Kenyetséssegkek axta xapop ma'a éma agkok nak,

³⁹apkelenyetséssegkek axta apyempe'ék apkeláneykegko ekyókxoho apkeltémakxa ekmaso, apnaqtawásamákpek axta, eñama ektémakxa axta aqsok apkelánéyak.

⁴⁰Apkeltaqnaweykegkek axta Wesse' egegkok ma'a énxet'ák apagkok nak, massegkek axta ekleklamo apwáxok ma'a ektáha axta apagkok;

⁴¹apkexakhamchek axta apkelméssama m'a melya'áseyak nak Dios, apkeláneykha axta aptemék ma'a apkelenmexma nak;

⁴²apkelhayak axta m'a apkelenmexma nak, mékoho axta aptemessáseykekxak apkelmoma.

⁴³Hágkaxwe axta eykhe elwagkasek teyp ma'a Dios, apkenmexeykekxeyk axta eyke aqsa chá'a m'a ekxeyenmakxa apwáxok etnéssesek, apyánchesseykmok axta aqsa apkeltémakxa ekmaso.

⁴⁴Keñe axta apweteya apkellegeykegkoho, tén han aplegaya apkellekxagweykha,

⁴⁵xénweykekxók axta apwáxok ma'a ekhémo mók apkelpaqhetchásamákpoho apkelánesso axta, tén axta apyaqmagkasa yaqwánxa etnehek, hakte awanhók agko' ma'a segásekhayo nak:

⁴⁶¡apkeltamhók axta han kapyóshok elanok ma'a ektáha nak apkelma!

⁴⁷Wesse', Dios egagkok, ¡hẽlwagkas negko'o teyp! ¡heganchásekxa, hennaqlósawakxa negko'o m'a nepyeseksa nak pók aptémakxa énxet'ák, yaqwayam sa' ólpeykeshok apwesey ekpagkanamaxche', yaqwayam sa' kalpayhekxak egwáxok ólpeykeshok xép!

⁴⁸¡Apcheymákpoho sa' chá'a kólteméssesek Wesse' egegkok, Dios apagkok nak Israel, megkatnégwayam néxa'! Apyókxoho énxet'ák sa' chá'a etnehek se'e: “¡Amén!” ¡Aleluya!