Read Lengua Sur Salmos 108 Bible Online

Salmos 108 - Lengua Sur bible

Salmos 108

¹Dios ahagkok, ekpenchessek eyke ko'o séláneykekxa ewáxok, ekpenchessek yaqwayam anneykmássesek negmeneykmasso. Ewáxok, kaxatakha';

²exatakha' arpa, tén han yát'axpog, ¡axatakhak sa' ko'o axto'ók agko'!

³Wesse', alpeykeshok sa' ko'o exchep nepyeseksa énxet'ák, anneykmássesek sa' nepyeseksa pók aptémakxa nak énxet'ák.

⁴Hakte awanhek xép segásekhayo, yeykhágweykmók ma'a néten nak. ¡Weykmok ektémakxa mehegyenyaweykha m'a yaphope ekyápaqmate nak!

⁵Dios ahagkok, aphegkek xép ma'a teyp nak néten. ¡Sawheykekxók xép apcheymákpoho nélwanmeygkaxa!

⁶Hẽlwagkas negko'o teyp yetlo apmopwána, yaqwayam enxoho elwagkasakpok teyp ma'a ektáha nak chá'a apchásekhayo. ¡Hegátegmowák!

⁷Aptáhak appaqmeta Dios ma'a tegma appagkanamap apagkok nak: “¡Yetlo ekpayheykekxa ewáxok sa' ko'o almésagkok énxet'ák ahagkok ma'a xapop nak Siquem, tén han ma'a ekyapwátegweykenxa nak xapop Sucot, sekmallana sa'!

⁸Ahagkok ko'o m'a Galaad, tén han Manasés; Efraín akke apteme sétchesso épátek; Judá akke apteme yámet sekmeykencha'awól'a chá'a sekteme wesse';

⁹Moab akke apteme sokpayhe ekwányam sélyenyessamakxal'a chá'a emék; ayenyók sa' ko'o séltéto emagkok ma'a neyseksa Edom, magkenatchesso sektáha ahagkok; ¡anneykmaksek sa' sélma sa' ma'a filisteos!”

¹⁰¿Yaqsa sa' heyentemekxak ko'o m'a tegma apwányam kélhaxtegkesso nak nepyáwa? ¿Yaqsa sa' heyentemekxak ekweykekxoho m'a Edom?

¹¹Hakte egkexakhamchek negko'o exchep Dios; ¡massék apkelyetlawa m'a sẽlpextétamo egagkok!

¹²Hempásem negko'o ólenmexek ma'a nélenmexma nak, hakte mékoho agko' ma'a sempasmo nak énxet.

¹³Anlának sa' negko'o ekyawe agko' aqsok yetlo sempasmo m'a Dios; ¡elteyammaha sa' nélenmexma nak!