Read Lengua Sur Salmos 112 Bible Online

Salmos 112 - Lengua Sur bible

Salmos 112

¹¡Aleluya! Apkeleñémo énxet apcháyo nak chá'a Wesse' egegkok, ekpeykeseykekxoho nak chá'a apwáxok ma'a apkeltémókxa nak chá'a antéhek.

²Kóltaqmelchessesek sa' chá'a apheykha m'a aptawán'ák neptámen nak énxet meyke aptémakxa, apmelyeyha'ak sa' han etnahagkok keso náxop.

³Xámok sa' katnehek aqsok apagkok ma'a apxagkok, megkamassegwomek sa' chá'a aptémakxa memasma aqsok apagkok.

⁴Kalsássesek chá'a exma cháléwasso ekyáqtésakxa exma m'a énxet'ák meyke nak apkeltémakxa, tén han ma'a apmopyósa nak chá'a elanok pók, tén han ma'a ektaqmalma nak apkelwáxok, tén han ma'a ekpéwomo nak chá'a apkeltémakxa.

⁵Tásek sa' chá'a katnehek apha m'a énxet apmássáseykha nak chá'a aqsok apagkok pók yetlo memyágweykekxa', tén han aptaqmelchessamo nak chá'a apxegkesso m'a aqsok apkexeykekxa';

⁶megkasógwomek sa' chá'a apxega. ¡Kaxének sa' chá'a kélwáxok ma'a énxet ekpéwomo nak aptémakxa!

⁷Megyekyek ma'a amya'a ekmaso nak; kayhek apteme megkay'ásseyam apwáxok Wesse' egegkok.

⁸Megkatneykha apwáxok; megyekyek nahan, megkeyxek chá'a apkelányo yetlo apya'ásseyam ma'a apkelenmexma nak.

⁹Emlaskok chá'a eyeyméxchexa aqsok ma'a meyke nak aqsok apagkok, megkamassegwomek sa' chá'a aptémakxa memasma aqsok apagkok, tásek sa' chá'a katnehek apxénamap.

¹⁰Elwok chá'a apwet'a enxoho m'a ekmaso nak aptémakxa; eltakxek chá'a apma'ák eñama apteme mékoho. Kamassegwók sa' chá'a m'a aqsok apmáheyo nak chá'a elanagkok ma'a ekmaso nak apkeltémakxa.