Read Lengua Sur Salmos 115 Bible Online

Salmos 115 - Lengua Sur bible

Salmos 115

¹Wesse', ná hentemésses negko'o néleymáxkoho, xép akke payhawók kólteméssesek apcheymákpoho, ¡eñama segásekhayo tén han apteme ekmámnaqsoho mehegyenyaweykha!

²Yaqsa ektéma aptéma nak chá'a sẽlmaxneyeykencha'a pók énxet'ák se'e: ¿Háxko aphakxa Dios kélagkok?

³Apheyk Dios egagkok ma'a néten, elának chá'a ekyókxoho m'a apmakókxa enxoho elána'.

⁴Sawo ekyátekto ekmomnáwa, tén han sawo ekmope ekmomnáwa kéleykmássesso apagkok ma'a pók énxet'ák nak, aqsok apkelane apagko' nak chá'a m'a énxet:

⁵yetneyk atña'ák, yawanchek eyke kalpaqmétek; yetneyk aqta'ák, yawanchek eyke kalwetak exma;

⁶yetneyk aheyk'ák, megkallegyek eyke ektemegweykmoho exma; yetneyk awéhek, yawanchek eyke katekhánek;

⁷yetneyk amék, yawanchek eyke kalpaknegwomhok aqsok; yetneyk amagkok, yawanchek eyke kalxog; ¡megkatyepek xama enxoho élpeywa!

⁸Elxohok sa' chá'a apyókxoho ektáha nak chá'a apkeláneyak xa kéleykmássesso nak, tén han apkeláyo nak chá'a.

⁹Énxet'ák Israel, ¡nágkólya'ássem Wesse' egegkok! Hakte cha'a sempasmo chá'a m'a, tén han segmasma.

¹⁰Kéxegke, kélmaxnéssesso nak chá'a Dios énxet'ák apagkok, ¡nágkólya'ássem Wesse' egegkok! Hakte cha'a sempasmo chá'a m'a, tén han segmasma.

¹¹Kéxegke, kéláyo nak chá'a Wesse' egegkok, ¡nágkólya'ássem! Hakte cha'a sempasmo chá'a m'a, tén han segmasma.

¹²¡Xeyenwákxok negko'o apwáxok ma'a Wesse' egegkok, hegmések sa' nahan ektaqmalma negheykha! Egkések sa' ektaqmalma apheykha m'a israelitas, tén han ma'a apkelmaxnéssesso nak Dios énxet'ák apagkok,

¹³etaqmelchessesek sa' han apheykha m'a ektáha nak chá'a apcháyo, kelwesse'e tén han ma'a meyke nak aqsok apagkok.

¹⁴¡Exámassesagkok sa' kéxegke kélketchek ma'a Wesse' egegkok, tén han kéltawán'ák kélnentámen!

¹⁵Etaqmelchessesek sa' kéxegke kélheykha m'a Wesse' egegkok, apkelane nak néten tén han keso náxop.

¹⁶Wesse' egegkok apagkok ma'a néten, keñe énxet apméssama xapop.

¹⁷Mopwanchek elpeykeshok Wesse' egegkok ma'a apkelmahéyak nak élwóneykegkaxa exma, cham'a apkeletsapma nak;

¹⁸negko'o eyke, nélyenna nak makham, ólpeykeshok sa' chá'a, kaxwo' nak tén han megkatnégwayam néxa. ¡Aleluya!