Read Lengua Sur Salmos 116 Bible Online

Salmos 116 - Lengua Sur bible

Salmos 116

¹Wásekhohok chá'a ko'o Wesse' egegkok, hakte apháxenmok chá'a sekwóneykha,

²hakte aplegayók chá'a sekpeywa. ¡Awónmakha sa' chá'a neyseksa sekha!

³Élpextehetmeyk axta ko'o nétsapma, emomchek axta ko'o m'a takhaxpop ekyentaxnamakxa nak egwáxok, eyáyók ahagko' axta, eklegeykegkók agko' axta han.

⁴Keñe axta sekwóneykencha'a Wesse' egegkok, élmaxnagkamchek axta séltémo hewagkasek teyp.

⁵Wesse' egegkok apteme appéwomo, tén han apmopyósa henlano'; Dios egagkok apteme ekyawe segásekhayo.

⁶Eltaqmelcheshok chá'a Wesse' egegkok ma'a énxet'ák megkamopwána nak chá'a elmeyawakpohok apagko'. Ewagkassek axta ko'o teyp ekmassa axta sekyennaqte.

⁷Méko kaxwók ektáhakxa ewáxok, hakte taqmeleykha apwáxok sélányo m'a Wesse' egegkok,

⁸emallahanchessek nahan nétsapma, tén han sélekxagweykha, tén han sélpelapmeykha.

⁹Sélyeheykekxoho Wesse' egegkok sa' ko'o atnehek se'e apheykegkaxa nak apkelyenna nak makham.

¹⁰Élenxáneykmek axta aqsa ko'o sekteme may'ásseyam, neyseksa eykhe sekxéneykha ekyentaxno seklegeykegkoho.

¹¹Ekxeyenmeyk axta aqsa ko'o apyókxoho énxet'ák apteme apkelmopwancha'a amya'a, neyseksa may'áseyak sektáhakxa.

¹²¿Háxko atnehek ko'o ayaqmagkásekxak ekyókxoho ektaqmela setnéssessamakxa nak ma'a Wesse' egegkok?

¹³¡Ay'aksek sa' ko'o néten ma'a egheykok segwagkassamo nak teyp, keñe sa' awónmakha m'a apwesey!

¹⁴Alának sa' ko'o séltennassama axta alának Wesse' egegkok, nápaqta'awók ma'a apyókxoho énxet'ák apagkok.

¹⁵Kaqhek chá'a apwáxok Wesse' egegkok étak eletsapok ma'a apkelásekhayo nak chá'a.

¹⁶¡Oh Wesse', ko'o sekteme apkeláneykha! ¡Ko'o sekteme étche m'a apkeláneykha nak! Apkelyétekkessegkek xép ma'a táma sélpextehetma axta.

¹⁷Alnáhakkasek sa' ko'o exchep aqsok seknaqtósso eñama sekmésso ekxeyenma ewáxok, awónmakha sa' ko'o exchep apwesey Wesse' egegkok.

¹⁸Alának sa' ko'o séltennassama axta alának Wesse' egegkok, nápaqta'awók ma'a apyókxoho énxet'ák apagkok,

¹⁹cham'a apwáxok nak Wesse' egegkok tegma appagkanamap apagkok, ¡nepyeseksa nak xép Jerusalén! ¡Aleluya!