Read Lengua Sur Salmos 119 Bible Online

Salmos 119 - Lengua Sur bible

Salmos 119

¹Apkeleñémo énxet meyke nak apkelane xama aqsok ekmaso, apyetlókasso nak chá'a m'a ektémakxa nak Wesse' egegkok segánamakxa apagkok.

²Apkeleñémo apkelane nak chá'a m'a apchánamakxa nak chá'a antéhek, apketamsamo apagko' nak chá'a ekweykmoho kañók agko' apkelwáxok,

³melánéyak nak chá'a xama enxoho m'a aqsok ekmaso, apkelyetlo nak chá'a m'a Wesse' egegkok ámay apagkok.

⁴Apkeltémók chá'a exchep kalanaxchek ma'a apkeltémókxa nak antéhek meyke kélyetnakhásseyam.

⁵¡Émenyeyk eykhe ko'o mayensemek sélyeheykekxoho m'a segánamakxa apagkok nak!

⁶Méko katnehek ko'o xama aqsok semegqasso sélana enxoho ekyókxoho m'a apkeltémókxa nak antéhek.

⁷Alteméssesek sa' chá'a ko'o apcheymákpoho yetlo ekpéwomo élchetámeykha ewáxok, séltámeka sa' ma'a apchánamakxa nak antéhek ekpéwomo.

⁸¡Émenyeyk ko'o alának ma'a segánamakxa apagkok! ¡Ná heyenyow chá'a xama enxoho!

⁹¿Háxko etnehek elanagkohok aptémakxa wokma'ák elának aptémakxa ekpéwomo? ¡Etnehek ma'a ektémakxa nak xép appeywa!

¹⁰Étamsamók agko' ko'o exchep ekweykmoho kañók agko' ewáxok; nágyoho ayenyók ko'o m'a apkeltémókxa nak antéhek.

¹¹Ekpekkenmeyk ko'o ewáxok ma'a appeywa nak xép, yaqwayam enxoho malanyek may'assáxma nápaqto' xép.

¹²¡Wesse', élpeykessamók chá'a ko'o exchep! ¡Hélxekmós ko'o segánamakxa apagkok!

¹³Axének sa' chá'a ko'o ekyókxoho m'a apchánamakxa nak antéhek, apxeyenma nak chá'a exchep.

¹⁴Kapayhekxohok agko' sa' ko'o ewáxok eytlakxak ma'a apchánamakxa nak antéhek, megkaxók sa' ma'a ekweykenxa nak chá'a ekpeykáseykekxa ewáxok ekxámokma aqsok ahagkok.

¹⁵Altámesaxchek sa' ko'o m'a apchánamakxa nak antéhek, alanok sa' chá'a m'a ámay apagkok nak.

¹⁶Hepeykessásekxak sa' ko'o ewáxok ma'a segánamakxa apagkok, mehelwánaqmágwomek sa' ma'a appeywa.

¹⁷¡Kataqmalmakha chá'a ko'o apwáxok hélano', ko'o sektáha xép apkeláneykha! ¡Alyahakxohok sa' chá'a ko'o appeywa!

¹⁸Hexekmós yaqwayam sa' ko'o ótak ma'a aqsok éltaqmela nélxekmowásamáxche apagkok nak.

¹⁹Ko'o sekteme sekwe yaqwatakxoho keso náxop; ná hekpósses ko'o m'a apkeltémókxa nak antéhek.

²⁰Legeykegkók ko'o ewáxok yókxoho ekhem, eñama sekmámenyého ay'ásegwók ma'a apchánamakxa nak antéhek.

²¹Elpaqhetchesek chá'a exchep ma'a megkalyexnegwayam nak chá'a apkelpeywa, tén han ma'a apkeltaqnómap nak chá'a, apkelyetnakhasso nak chá'a m'a apkeltémókxa nak antéhek.

²²Hétnakhásses ko'o m'a sénmexeykha tén han sewanyeykha, hakte éláneyak chá'a ko'o m'a apchánamakxa nak chá'a antéhek.

²³Elanagkokxak sa' eykhe aptamhágkaxa emáwhok hetnéssessamhok exma ekmaso m'a kelwesse'e nak, altámesaxchek sa' eyke aqsa ko'o segánamakxa apagkok, ko'o sektáha nak xép apkeláneykha.

²⁴Hepeykessásekxohok chá'a ko'o ewáxok ma'a apchánamakxa nak chá'a antéhek; cha'a ekteme ko'o sepaqhetcháseykha chá'a m'a.

²⁵Ketók ko'o sétsapmakxa'; ¡hegkés sekyennaqte, ekhawo aptémakxa nak appeywa!

²⁶Éltennassegkek ko'o exchep sektémakxa, eyátegmoweykegkokxeyk han. ¡Hélxekmós ko'o segánamakxa apagkok!

²⁷Hegkés ko'o sekya'áseyak, yaqwayam enxoho eytlók ma'a apchánamakxa nak antéhek, hakte émenyeyk ko'o altámesaxchek ma'a aqsok éltaqmalma apagkok nak.

²⁸Eyeykhágweykmók ko'o sélekxagweykha seklegeykegkoho ekmáske; ¡hénnaqtés ko'o, ekhawo ektémakxa nak xép appeywa!

²⁹Nágyoho ko'o eytlók ma'a ámay ekyetnamakxa nak negmowána amya'a, hey'assásegwom ko'o m'a nélxekmowásamáxche apagkok nak.

³⁰Élyéseykha ko'o m'a ámay ekmámnaqsoho, émenyeyk ko'o m'a apchánamakxa nak antéhek.

³¹Wesse', ekyetlamchek ko'o m'a apchánamakxa nak antéhek, ¡nágyoho amegqáwhok ahagko'!

³²Hepekhésha chá'a ko'o alának ma'a apkeltémókxa nak antéhek, hakte hepeykessásekxak chá'a exchep ewáxok.

³³Wesse', hélxekmós ko'o ektémakxa nak segánamakxa apagkok, hakte émenyeyk ko'o eytlók ma'a ekweykmoho néxa.

³⁴Hegkés ko'o sekya'áseyak, yaqwayam alának ma'a nélxekmowásamáxche apagkok nak; ¡émenyeyk ko'o alyahakxoho', ekweykmoho kañók agko' ewáxok!

³⁵Héntemekxa ko'o m'a ámay agkok nak apkeltémókxa antéhek, hakte cha'a ekyetnamakxa ko'o ekpayheykekxa ewáxok.

³⁶Yána kalkohok ko'o ewáxok ma'a apchánamakxa nak antéhek, nágyoho kámenyéhok ewáxok ma'a aqsok élmeñexamaxche nak.

³⁷Nágyoho ko'o katsapok egkenyek alanok ma'a aqsok mékoho nak; ¡hegkés sekyennaqte, yaqwayam enxoho eytlók ma'a ámay apagkok nak!

³⁸Elána sa' ma'a séltennassama axta elána', ko'o sektáha nak apkeláneykha, apkelánéssamo nak chá'a m'a ektáha nak chá'a apcháyo.

³⁹Hétnakhásses ko'o m'a sektaqnómaxche seyáya nak chá'a ko'o, hakte keltásók agko' ma'a apchánamakxa nak chá'a antéhek.

⁴⁰Émenyeyk ko'o m'a apchánamakxa nak antéhek, ¡hegkés sekyennaqte, hakte xép apteme appéwomo!

⁴¹Wesse', hexekmós ko'o seyásekhayo, tén han sewagkasso teyp, ekhawo séltennassama axta hetnéssesek.

⁴²Keñe sa' ewanchek wátegmowagkokxak ma'a setaqnagko nak chá'a, hakte may'ásseykmok ko'o exchep appeywa.

⁴³Nágyoho kamassegwók sekxeyenma amya'a ekmámnaqsoho, hakte eyásenneykekxeyk chá'a ko'o m'a apchánamakxa nak antéhek.

⁴⁴¡Émenyeyk ko'o alának ma'a nélxekmowásamáxche apagkok nak, ekyókxoho ekhem megkatnégwayam néxa!

⁴⁵Keñe sa' aweynchamha chá'a eyáxñekxa', meyke seyekakxa', hakte ekyetlamchek ma'a apchánamakxa nak antéhek.

⁴⁶Axének sa' chá'a ko'o apchánamakxa antéhek nápaqta'awók kelwesse'e apkelwányam, mamegqayhek sa' chá'a.

⁴⁷Hakte eyásekhayók ko'o m'a apkeltémókxa nak antéhek, hepeykessásekxak chá'a ewáxok.

⁴⁸Wásekhohok chá'a ko'o m'a apkeltémókxa nak chá'a antéhek, wámenyéhok han chá'a, kaxénhok agko' han chá'a ewáxok ma'a segánamakxa apagkok nak.

⁴⁹Nágkalwánaqma aqsa m'a appeywa segkésso axta exchep, ko'o sektáha nak apkeláneykha, hakte cha'a keñamak apkeltémo axta exchep aleyxmakha m'a,

⁵⁰keso setaqmelchessáseykekxa nak chá'a ko'o ewáxok neyseksa ekyentaxno ewáxok: cham'a appeywa segkésso nak sekyennaqte.

⁵¹Megkayetyapwágweykmok setaqnaweykha m'a megkalyexnegwayam nak chá'a apkelpaqmeyesma, makke ko'o ayenseykmok ma'a nélxekmowásamáxche apagkok nak.

⁵²Kaxénwakxohok chá'a ewáxok ma'a apchánamakxa nak antéhek nano' nak, Wesse', cha'a sekweteykxa chá'a ko'o ektaqmeleykekxa ewáxok ma'a.

⁵³Elókassegkek ko'o m'a élmasagcha'a nak apkeltémakxa, apyamasma nak nélxekmowásamáxche apagkok.

⁵⁴Sekmeneykmasso ko'o ektemék segánamakxa apagkok keso náxop, sekhamakxa nak yaqwatakxoho.

⁵⁵Wesse', kaxének chá'a ko'o exchep ewáxok axta'a; ¡émenyeyk ko'o alának ma'a nélxekmowásamáxche apagkok nak!

⁵⁶Keso yaqwayam nak chá'a alának ko'o s'e: alyahakxohok ma'a apchánamakxa nak antéhek.

⁵⁷Wesse', Xép apteme wánxa ahagkok neyseksa m'a ekyókxoho aqsok ahagkok; ekxénchek ko'o alának ma'a appeywa nak xép.

⁵⁸Ekwasqápeykekxók ko'o ekweykmoho kañók agko' ewáxok séltémo apeykessásekxak apwáxok; kapyósho sa' hélano', ekhawo ektémakxa nak xép appeywa.

⁵⁹Kelchetagkassegkek axta ko'o ewáxok sektémakxa, tén axta sélyeheykekxoho makham apchánamakxa nak xép antéhek.

⁶⁰Apekhésha chá'a ko'o alának ma'a apkeltémók nak antéhek, yahamók chá'a alána'.

⁶¹Ewakhassegkek chá'a ko'o kelhanma m'a élmasagcha'a nak apkeltémakxa, mehelwánaqmeyk eyke chá'a ko'o m'a nélxekmowásamáxche apagkok.

⁶²Axta'a eyseksók chá'a axatakhak agkések ekxeyenma ewáxok, eñama élpéwomo m'a apchánamakxa nak antéhek.

⁶³Sélxegexma'a ko'o apyókxoho m'a aptáha nak chá'a apcháyo, tén han apkeláneyak nak chá'a m'a apchánamakxa nak antéhek.

⁶⁴Wesse', sawheykekxók xép segásekhayo keso náxop; ¡hélxekmós ko'o segánamakxa apagkok!

⁶⁵Wesse', tásek xép setnéssessamakxa ko'o sektáha nak apkeláneykha, ekhawo ektémakxa nak xép appeywa.

⁶⁶Hélxekmós yaqwayam atnehek ektaqmalma sekya'áseyak tén han sekyekpelchémo, hakte eyáyók ko'o m'a apkeltémókxa nak antéhek.

⁶⁷Xámok axta aqsok magwaqhémo, mehenyassáseykegkaxa axta, élyaheykekxók eyke kaxwók ma'a appeywa.

⁶⁸Tásek xép apwáxok, aqsok ektaqmela nahan chá'a elána'; ¡hélxekmós ko'o segánamakxa apagkok!

⁶⁹Apkelmopwancha'a amya'a chá'a etnahagkok hesexnenak ma'a megkalyexnegwayam nak chá'a apkelpeywa, éláneyak eyke chá'a ko'o ekweykmoho kañók agko' ewáxok ma'a apchánamakxa nak antéhek.

⁷⁰Mopwanchek elya'asagkohok aqsok, peykáseykekxeyk eyke ko'o ewáxok ma'a nélxekmowásamáxche apagkok nak.

⁷¹Tásek setnéssessamakxa setnessáseykekxo mékoho, cháxa keñamak séltámeya nak ma'a segánamakxa apagkok.

⁷²Tásók agko' ko'o sélányo m'a nélxekmowásamáxche apagkok, megkaxnawok ma'a ekwánxa nak ekyókxoho m'a selyaqye nak keso náxop.

⁷³Xép apagko' axta sélane, tén han apkelane sekyókxa'; ¡hegkés ko'o sekya'áseyak aqsok, yaqwayam sa' héltamek ma'a apkeltémókxa nak xép antéhek!

⁷⁴Kalpayhekxak sa' apkelwáxok sét'a enxoho m'a apcháyo nak chá'a exchep, hakte may'ásseykmok ko'o m'a appeywa nak xép.

⁷⁵Wesse', ekya'ásegkók ko'o apchánamakxa nak antéhek ekteme élpéwomo, ekya'ásegkók han chá'a ekpayhawo m'a señássásegkoho enxoho chá'a.

⁷⁶¡Setaqmelchessáseykekxa ewáxok sa' ko'o katnehek ma'a seyásekhayo nak xép, séltennassama axta hetnéssesek!

⁷⁷Yepyósho ko'o hélano', tén sa' aweynchamha makham, hakte atsók agko' chá'a ko'o kaxének ewáxok nélxekmowásamáxche apagkok.

⁷⁸Elmegqágwakxohok apagko' sa' ma'a éleymáxkoho nak chá'a apkelpeywa, cham'a setwáseykegkoho nak chá'a ko'o meykexho ektáhakxa; émenyeyk ko'o kalchetagkasha ewáxok ma'a apchánamakxa nak antéhek.

⁷⁹Tásek sa' hey'ótak ma'a apcháyo nak chá'a exchep, apkelya'áseykegkoho nak chá'a apchánamakxa nak xép antéhek.

⁸⁰Kalyahakxohok sa' ko'o ewáxok ma'a ekyókxoho segánamakxa apagkok, yaqwayam sa' mamegqayhek chá'a.

⁸¹Élhaxanmók ahagko' ko'o exchep hewagkasek teyp; ¡may'ásseykmok ko'o m'a appeywa nak xép!

⁸²Kelyelqamaxcheyk ko'o ahaqta'ák sélhaxanma m'a séltennassama axta, atnehek chá'a s'e: “¿Háxko sa' ekwánxa ekhem hey'ótak hetaqmelchessásekxak ewáxok?”

⁸³Sekwányamók mékoho eykhe ko'o, magwásekhamaxche', makke hélwagqeykmok ma'a segánamakxa apagkok nak xép.

⁸⁴¿Háxko sa' ekwánxa kammok néxa sélhaxanma? ¿Yaqsa sa' ekhem elyekpelchásseshok ma'a sénmexeykha nak chá'a ko'o?

⁸⁵Emétegkessegkek ko'o máxek ámay ahagkok ma'a éleymáxkoho nak chá'a apkelpeywa, cham'a melyetleykekxa nak xép nélxekmowásamáxche apagkok.

⁸⁶¡Hepásem ko'o, élyaqmáseykha ko'o meykexho sektáhakxa! ¡Naqsók agko' ekyókxoho m'a apkeltémókxa nak antéhek!

⁸⁷Xegkessegkek ko'o hélmasséssók keso náxop, makke ayenseykmok ma'a apchánamakxa nak xép antéhek.

⁸⁸Hegkés sekyennaqte, eñama seyásekhayo, keñe sa' alának apchánamakxa nak xép antéhek.

⁸⁹Wesse', megkamassegwomek xép appeywa; ¡yetnegkek ma'a néten!

⁹⁰Megkamassegwomek ektémakxa mehenyenyaweykha; appekkenmeyk xép xapop, yetnegkek nahan.

⁹¹Heykegkek makham ekyókxoho aqsok, ekhawo ektémakxa nak apchánamakxa antéhek, kalyahakxohok chá'a m'a ekyókxoho aqsok.

⁹²Kaxtemék axta mehegkésso ekpayheykekxa ewáxok ma'a nélxekmowásamáxche apagkok, heyaqhek axta ekyentaxno ewáxok.

⁹³Mehelwánaqmeyk sa' chá'a ko'o m'a apchánamakxa nak antéhek, hakte cha'a segkésso ko'o sekyennaqte m'a.

⁹⁴¡Hewagkas teyp, hakte ko'o sekteme exchep apagkok, ekyetlamchek ma'a apchánamakxa nak antéhek!

⁹⁵Apkelhaxanmeyk ko'o kataqmelekxak seté m'a élmasagcha'a nak apkeltémakxa yaqwayam heyaqhek, makke ko'o ayenseykmok ekxéneykha ewáxok ma'a apchánamakxa nak antéhek.

⁹⁶Ekweteyak ko'o ekyókxoho aqsok, yetneyk chá'a néxa', méko eyke néxa m'a apkeltémókxa nak antéhek.

⁹⁷¡Awanhek ko'o seyásekhayo nélxekmowásamáxche apagkok! ¡Yókxoho ekhem chá'a élchetagkáseykha ewáxok!

⁹⁸Ahagkok ko'o m'a apkeltémókxa nak antéhek meyke néxa; eyeykhássesseykmok sekmowána aqsok, kaxnók ma'a sélenmexma nak.

⁹⁹Ekya'ásegkók aqsok, ekyeykhásseykmók ma'a sélxekmósso nak chá'a, hakte xeyenmók agko' ko'o ewáxok ma'a apchánamakxa nak antéhek.

¹⁰⁰Ekya'ásegkók aqsok, ekyeykhásseykmók ma'a apkelwányam nak, hakte élyaheykekxók ko'o m'a apchánamakxa nak antéhek.

¹⁰¹Meytleykekxak chá'a m'a ekyókxoho ámay ekmaso, yaqwayam alyahakxohok ma'a appeywa.

¹⁰²Mayamasmak ko'o m'a apchánamakxa nak antéhek, hakte xép chá'a sélxekmowáseyak.

¹⁰³Atsók agko' ma'a appeywa nak, yeykhásseykmok ektémakxal'a atwok yányawhéna' apyegmenek.

¹⁰⁴Apchánamakxa antéhek keñamak sekweteya ko'o sekya'áseyak; cháxa keñamak sektaqnagkama nak ekyókxoho m'a nentémakxa megkamámnaqsoho nak.

¹⁰⁵Xép appeywa ekteme cháléwasso sélsássesso chá'a exma sekmahágkaxa enxoho chá'a, séltátchessesso chá'a m'a ámay ahagkok.

¹⁰⁶Éltennássek axta exchep alának aqsok, alának sa' nahan: ¡alának sa' ma'a apchánamakxa nak antéhek élpéwomo!

¹⁰⁷Wesse', eklegágkok ahagko' ko'o; ¡hegkés sekyennaqte, apxeyenma axta exchep!

¹⁰⁸Wesse', ema takha' sekmésso nak ekxeyenma ewáxok, hélxekmós apchánamakxa nak antéhek.

¹⁰⁹Hágkaxwe chá'a ko'o kagketagkoho watsapok, makke hélwagqeykmok ma'a nélxekmowásamáxche apagkok nak.

¹¹⁰Epekkenchessegkek ko'o kelhanma m'a élmasagcha'a nak apkeltémakxa, makke ayamasmak ko'o m'a apchánamakxa nak antéhek.

¹¹¹Aqsok ahagkok meyke néxa ko'o m'a apchánamakxa nak antéhek, hakte cháxa sepeykessáseykekxa chá'a ko'o ewáxok ma'a.

¹¹²Ekméssamók ahagko' ko'o ewáxok yaqwayam alának ma'a segánamakxa apagkok, ekwokmoho sekwagkasa néxa sekha.

¹¹³Altaqnawhok ko'o m'a énxet'ák apkelmopwancha'a amya'a nak, eyásekhayók eyke ko'o m'a nélxekmowásamáxche apagkok.

¹¹⁴Xép apteme semasma, tén han setaqmelchesso; may'ásseykmok ma'a appeywa nak.

¹¹⁵¡Kólántép sekhakxa, élmasagcha'a nak kéltémakxa! ekmakók ko'o alának ma'a apchánamakxa nak antéhek Dios ahagkok!

¹¹⁶Hegkés sekyennaqte, apxeyenma axta exchep, keñe sa' aweynchamha chá'a; ¡nágyoho katnehek eyaqhémo sélhaxneykha!

¹¹⁷Hepásem, keñe sa' katnehek meyke ektáhakxa sekha; keñe sa' alának chá'a m'a segánamakxa apagkok.

¹¹⁸Melmehek chá'a exchep takha' m'a apkelyetnakhasso nak chá'a segánamakxa apagkok, hakte mékoho agko' ma'a ektémakxa nak chá'a élchetámeykha apkelwáxok.

¹¹⁹Máxa aqsok apák kélchexakha apkelányo exchep ma'a élmasagcha'a nak apkeltémakxa keso náxop; cháxa keñamak seyásekhayo nak ko'o m'a apchánamakxa nak antéhek.

¹²⁰Kelpexyennegkek ko'o ekyókxoho émpehek seyeye nápaqto' xép, eyáyók ma'a apchánamakxa nak antéhek.

¹²¹Malwátésseykmok chá'a ko'o sélane m'a aqsok ekpéwomo; ná heyenyaw aqsa hegkések ma'a setwáseykegkoho nak chá'a.

¹²²Etne sa' sepasmo chá'a; nágyoho hetwasagkohok ma'a éleymáxkoho nak apkelpeywa.

¹²³Kelyelqamáxchek ko'o ahaqta'ák sélhaxanma hewagkasek teyp, élhaxanmeyk hemallahanchesek, apxeyenma axta exchep.

¹²⁴Hetnésses ko'o ekhawo ektémakxa nak xép segásekhayo, ko'o sektáha nak apkeláneykha; ¡hélxekmós segánamakxa apagkok!

¹²⁵Ko'o, xép apkeláneykha. Hegkés sekya'áseykegkoho, hakte émenyeyk ko'o ay'asagkohok apchánamakxa nak antéhek.

¹²⁶Wesse', tásek kaxwók xép elának aqsok, hakte megkólyaheykekxohok ma'a nélxekmowásamáxche apagkok.

¹²⁷Cháxa keñamak sekmámenyého nak ko'o m'a apkeltémókxa nak antéhek, megkaxnawok ekwánxa nak sekmámenyého m'a sawo ekyátekto ekmomnáwa ektaqmalma.

¹²⁸Cháxa keñamak seyhayo nak hepékessesagkok ma'a apchánamakxa nak antéhek, ataqnawhok ko'o ekyókxoho m'a nentémakxa megkamámnaqsoho nak.

¹²⁹Keltásók agko' ma'a segánamakxa apagkok nak; cháxa keñamak sélyeheykekxoho nak.

¹³⁰Hẽlsássesek chá'a exma sẽltennáseyncha'a enxoho chá'a m'a appeywa, kaltamaksek chá'a m'a énxet'ák meyke nak apkelya'áseyak.

¹³¹Amayhohok agko' chá'a ko'o amáwhok ma'a appeywa, hakte émenyeyk ma'a apkeltémókxa nak antéhek.

¹³²Yepyósho ko'o hélano', apteméssessamól'a chá'a exchep ma'a apkelásekhayo nak.

¹³³Hélánesák chá'a sekxega ekhawo ektémakxa nak appeywa; nágyoho kamok ewáxok ma'a aqsok ekmaso.

¹³⁴Hemallahanches ko'o nepyeseksa m'a apkelyennaqteyáseykha nak chá'a apyempe'ék, hakte émenyeyk ko'o alának ma'a apchánamakxa nak antéhek.

¹³⁵Kataqmalmakha apwáxok hélanok ko'o, sektáha nak apkeláneykha, hélxekmós segánamakxa apagkok.

¹³⁶Kelpexyaweykenteyk ko'o ahaqta'ák égmenek sélekxagweykha, hakte megkóláyók ma'a nélxekmowásamáxche apagkok nak.

¹³⁷Wesse', xép apteme appéwomo; kelpéwók han ma'a apchánamakxa nak antéhek.

¹³⁸Kelpéwók ekyókxoho m'a apchánamakxa nak antéhek, naqso' nahan.

¹³⁹Alwok ahagko' chá'a ko'o ótak kalwagqamagkok appeywa m'a sélenmexma nak.

¹⁴⁰Xámok élmalláneyak ekyekkónamaxche m'a appeywa nak; cháxa keñamak seyásekhayo nak ko'o, sektáha nak apkeláneykha.

¹⁴¹Mékoho ko'o, tén han magwásekhamaxche', makke hélwagqeykmok ma'a apchánamakxa nak antéhek.

¹⁴²Megkatnégwomek chá'a néxa ekpéwomo m'a ektémakxa nak chá'a ekpéwomo apkelánéseykekxa apheykha énxet'ák, naqsók nahan ma'a nélxekmowásamáxche apagkok nak.

¹⁴³Ekweteyak chá'a ko'o ekyentaxno ewáxok, tén han may'áseyak sektáhakxa, hepeykessásekxak eyke chá'a ewáxok ma'a apkeltémókxa nak antéhek.

¹⁴⁴Megkatnégwomek chá'a néxa ekteme élpéwomo m'a apchánamakxa nak antéhek; ¡hegkés sekya'áseyak, keñe sa' aweynchamha makham!

¹⁴⁵Wesse', ekwóneyha exchep ekweykmoho kañók agkók ewáxok; ¡heyátegmowák, hakte émenyeyk ko'o alának ma'a segánamakxa apagkok nak!

¹⁴⁶Élmaxnakkek ko'o exchep, hepásem yaqwayam alyahakxohok ma'a apchánamakxa nak antéhek.

¹⁴⁷Amonye' élseye chá'a axatakhak yaqwayam almaxnak hepasmok, may'ásseykmok ko'o m'a apxeyenma axta exchep.

¹⁴⁸Mayenmaha chá'a amonye' ekyáqtésso yaqwayam kalchetagkasha ewáxok ma'a appeywa.

¹⁴⁹Wesse', yeyxho sekpeywa, eñama seyásekhayo, hegkés sekyennaqte, ekhawo ektémakxa nak xép ekpéwomo segyekpelchémo.

¹⁵⁰Apchágketchessa'ak ko'o sekhakxa m'a seyaqmáseykha apkello nak, makke kalxegkáseykha elya'asagkohok ma'a nélxekmowásamáxche apagkok nak.

¹⁵¹Wesse', apheyk xép keto', naqsók nahan ekyókxoho m'a apkeltémókxa nak antéhek.

¹⁵²Nanók agko' ko'o sekya'áseyak ma'a apchánamakxa nak antéhek, appekkenmeyk axta exchep meyke néxa'.

¹⁵³Elano ektémakxa seklegeykegkoho, hemallahanches, hakte mehelwagqeykmok ko'o m'a nélxekmowásamáxche apagkok nak.

¹⁵⁴Hepásem ko'o ektémakxa nak sekxénamaxche', hemallahanches neyseksa aqsok ekyentaxno, ¡hegkés sekyennaqte, apxeyenma axta exchep!

¹⁵⁵Megkalxegkáseykha exchep epasmok ma'a élmasagcha'a nak apkeltémakxa, hakte melyetlók ma'a ektémakxa nak segánamakxa apagkok.

¹⁵⁶Wesse', awanhók agko' xép apmopyósa henlano'; hegkés sekyennaqte, ekhawo ektémakxa nak xép ekpéwomo segyekpelchémo.

¹⁵⁷Apxámok ko'o m'a sélenmexma nak, tén han setwáseykegkoho nak chá'a, makke ayamasmak ma'a apchánamakxa nak antéhek.

¹⁵⁸Megkalchek ko'o ewáxok alanok ma'a apkelyenseyam nak chá'a aptamhéyak melya'ásseyam, melyaheykekxoho nak ma'a apkeltémókxa nak antéhek.

¹⁵⁹Wesse', elano ektémakxa nak ko'o sekmámenyého m'a apchánamakxa nak antéhek; ¡hegkés sekyennaqte eñama seyásekhayo!

¹⁶⁰Ekmámnaqsoho agko' ekyókxoho m'a appeywa nak; kelpéwók nahan ekyókxoho m'a apchánamakxa nak antéhek, megkamassegwomek han.

¹⁶¹Énmexeykha chá'a ko'o meykexho sektáhakxa m'a énxet'ák apkelwesse'e nak, cháyók eyke ko'o ewáxok ma'a appeywa nak.

¹⁶²Kapeykásekxak chá'a ko'o ewáxok ma'a appeywa, máxa m'a énxet apweteykekxal'a ekxámokma aqsok élmomnáwa.

¹⁶³Ataqnawhok chá'a ko'o m'a ekmowána amya'a nak, megkalchehek chá'a ewáxok, eyke eyásekhayók ma'a nélxekmowásamáxche apagkok nak xép.

¹⁶⁴Alpeykeshok chá'a ko'o exchep yókxoho ekhem, eñama apchánamakxa antéhek élpéwomo.

¹⁶⁵Awanhek chá'a katnehek meyke ektáhakxa apheykha m'a apchásekhayo nak chá'a nélxekmowásamáxche apagkok, méko han awanchek katlápagkasek.

¹⁶⁶Wesse', élhaxneyk ko'o exchep hewagkasek teyp, hakte éláneyak ko'o m'a apkeltémókxa nak antéhek.

¹⁶⁷Alyahakxohok chá'a ko'o m'a apchánamakxa nak antéhek, wásekhohok ahagko' han chá'a.

¹⁶⁸Élyaheykekxók ko'o m'a apchánamakxa nak antéhek; ¡apya'ásegkok xép ekyókxoho sektémakxa!

¹⁶⁹Wesse', ema takha' ko'o sekwóneykha, ¡hegkés sekya'áseyak, ekhawo ektémakxa nak appeywa!

¹⁷⁰Ema takha' sélmaxnagko; ¡hemallahanches ektémakxa ekyentaxno sekha, apxeyenma axta exchep!

¹⁷¹Malwátéssemek sa' chá'a sélpeykessamo, hakte élxekmóssegkek xép segánamakxa apagkok.

¹⁷²Anneykmaksek sa' ko'o ektémakxa nak xép appeywa, hakte kelpéwók ekyókxoho m'a apkeltémókxa nak antéhek.

¹⁷³Eleyxmakha sa' chá'a yaqwayam hepasmok, hakte élyéseykha ko'o m'a apchánamakxa nak antéhek.

¹⁷⁴Wesse', ¡émenyeyk ko'o exchep hewagkasek teyp! ¡Peykáseykekxeyk ko'o ewáxok nélxekmowásamáxche apagkok nak!

¹⁷⁵Émenyeyk ko'o aweynchamha chá'a, yaqwayam alpeykesho'; hepasmok sa' ko'o m'a ektémakxa nak segyekpelchémo.

¹⁷⁶Ekxegáneykmek ko'o, aptémól'a nepkések, ¡hey'óta' hektamok! Mehelwagqeykmok ko'o m'a apkeltémókxa nak antéhek.