Read Lengua Sur Salmos 132 Bible Online

Salmos 132 - Lengua Sur bible

Salmos 132

¹Wesse', kaxénwakxoho apwáxok David, tén han ma'a ekyókxoho ektémakxa axta ekyentaxno apha;

²kaxénwakxoho apwáxok apkeltennassama axta elanaksek ma'a David, xép apteme nak Jacob Dios apagkok ekha Apyennaqte, aptéma axta apkenagkama s'e:

³“Mamyekxeyk sa' exagkok, meytek sa' nahan allókasek sekyampe,

⁴megkalyenmaha sa' ahaqta'ák, matyenek sa' xama enxoho,

⁵móteyasakxa enxoho makham apxagkok ma'a Wesse' egegkok, Jacob nak Dios apagkok ekha Apyennaqte.”

⁶Neglegayak axta negko'o ekxénamaxko yántéseksek ekhémo mók nélpaqhetchásamáxkoho, negheykegkaxa axta Efrata, keñe negwetágweykmo m'a yókxexma nak Jáar.

⁷¡Ólmeyekxak Wesse' egegkok tegma appagkanamap apagkok! ¡Óltekxeyagkok sa' entapnák ma'a amonye' nak apkelteyammomakxa'!

⁸Wesse', éxyem yetlo yántéseksek apagkok ekyetchesamaxkoho nak apyennaqte, emyenta m'a egkexe yaqwánxa sa' exek chá'a meyke néxa'.

⁹Etnahagkok sa' chá'a ekpéwomo apkeltémakxa m'a apkelmaxnéssesso nak chá'a énxet'ák apagkok; elwónchesha sa' kalpayhekxak apkelwáxok ma'a apteme nak chá'a melyenseyam apkelyetleykha.

¹⁰Ná etne aqsa chá'a melányo exchep ma'a wesse' apwányam ektáha nak apkelyéseykha, eñama apchásekhayo m'a David, apteme nak apkeláneykha.

¹¹Apkeltennassegkek axta Wesse' egegkok elanaksek ekmámnaqsoho aqsok ma'a David, mopwanchek chá'a epeynchámekxak appeywa aptéma axta apkenagkama s'e:

¹²“Atnéssesek sa' ko'o wesse' apwányam xama aptáwen neptámen. Apkelyahákxók sa' agkok apketchek ma'a ekhémo mók nélpaqhetchásamáxkoho ahagkok, tén han ma'a séltémókxa nak chá'a etnahagkok, peya nak ko'o alxekmósek, etnahagkok sa' han kelwesse'e apkelwányam apketchek nak xa énxet'ák nak meyke néxa.”

¹³¡Apkelyéseykha Wesse' egegkok ma'a egkexe Sión! ¡Apkelyéseykha yaqwayam exek chá'a m'a!

¹⁴“Keso egkexe sekmáheyókxa nak chá'a ko'o axek meyke néxa s'e; axek sa' chá'a ko'o s'e, hakte émenye'.

¹⁵Almések sa' chá'a ko'o ekxámokma nento s'e Sión nak, amasséssesek sa' meyk élnapma m'a énxet'ák agkok meyke nak aqsok apagkok.

¹⁶Alewánessesek sa' ko'o apkelmaxnéssesso énxet'ák ahagkok yaqwayam elwetaksek chá'a apkelwagkásamap teyp eñama nak ko'o, elwónchesha sa' kalpayhekxak apkelwáxok ma'a apteme nak chá'a melyenseyam apkelyetleykha.

¹⁷Wának sa' ko'o etépekxak makham xama wesse' apwányam ekha apyennaqte David aptáwen neptámen. Ekpenchessessek ko'o xama cháléwasso yaqwayam agkések wesse' apwányam sélyéseykha nak.

¹⁸Almegqaksohok ahagko' sa' ma'a apkelenmexma nak, keñe sa' ma'a atnéssesek apcheymákpoho.”