Read Lengua Sur Salmos 135 Bible Online

Salmos 135 - Lengua Sur bible

Salmos 135

¹¡Aleluya! Kólpeykesho Wesse' egegkok; kólpeykesho kéxegke kélteme nak apkeláneykha,

²kéltamheykha nak chá'a m'a Wesse' egegkok tegma appagkanamap apagkok, cham'a kañe' nak Dios egagkok tegma appagkanamap apagkok.

³Kólpeykesho Wesse' egegkok, hakte tásek apwáxok ma'a; kólmeneykmásses chá'a negmeneykmasso kólxének apwesey, hakte kataqmalmakha chá'a apwáxok henlano'.

⁴Hakte apkelyéseykha m'a Jacob, cham'a Israel, yaqwayam etnehek apagkok apagko'.

⁵Ekya'ásegkók ko'o Dios Wesse' egegkok apteme apwányam apagko', megkaxnawok ma'a ekyókxoho aqsok kéláyókxa.

⁶Elának chá'a ekyókxoho Wesse' egegkok ma'a apmakókxa enxoho elána', cham'a néten nak, tén han keso náxop, tén han ma'a wátsam ekwányam nak, ekweykekxoho m'a kañók agko' nak.

⁷Elya'ásekxak chá'a néten yaphope éleñama m'a makhawók agko' nak nélwanmeygkaxa, etekkesek chá'a apkelyenma magkenatchesso peya kamme', etekkesek chá'a éxchahayam eñama m'a appekkenmakxa nak.

⁸Axta apkelnapma kélketchek appalleyam apmonye'e apyókxoho étchek ma'a kelán'ák Egipto, tén han émha amonye' nak ekpalleyam étkók ma'a apnaqtósso.

⁹Apcháphassegkek axta aqsok sempelakkasso nak agwetak ma'a neyseksa nak Egipto, apchahaya m'a faraón, tén han ma'a apkelámha apmonye'e apagkok nak.

¹⁰Apkelnapmeyk axta apxámokma pók aptémakxa énxet'ák, apkelnapmeyk axta kelwesse'e apkelwányam apkelyennaqte axta:

¹¹cham'a Sihón, wesse' apwányam apagkok axta amorreo, tén han Og, wesse' apwányam axta Basán, tén han ma'a apyókxoho kelwesse'e apkelwányam axta m'a Canaán;

¹²apmeyáseykekxeyk axta han énxet'ák apagkok Israel, xapop apagkok axta xa kelwesse'e apkelwányam nak, yaqwayam etnehek apagkok.

¹³Wesse', megkamassegwomek xép apwesey; kaxénwakxohok sa' aqsa chá'a kélwáxok.

¹⁴Elánekxések chá'a apheykha Wesse' egegkok ma'a énxet'ák apagkok; apyósekak chá'a elanok apkeláneykha.

¹⁵Sawo ekyátekto ekmomnáwa, tén han sawo ekmope ekmomnáwa kéleykmássesso apagkok ma'a pók énxet'ák nak, aqsok apkelane apagko' nak chá'a m'a énxet.

¹⁶Yetneyk atña'ák, yawanchek eyke kalpaqmétek; yetneyk aqta'ák, yawanchek eyke kalwetak exma;

¹⁷yetneyk aheyk'ák, megkallegyek eyke ektemegweykmoho exma; ¡méko han ma'a élennama!

¹⁸Elxohok sa' chá'a apyókxoho ektáha nak chá'a apkeláneyak xa kéleykmássesso nak, tén han apkeláyo nak chá'a.

¹⁹Israelitas, kólpeykesho Wesse' egegkok; kélmaxnéssesso nak chá'a Dios énxet'ák apagkok, kólpeykesho Wesse' egegkok;

²⁰levitas, kólpeykesho Wesse' egegkok; kéxegke, kéláyo nak chá'a Wesse' egegkok, kólpeykesho.

²¹¡Kataqmalmakha sa' chá'a apxénamap Wesse' egegkok ma'a Sión, cham'a aphama nak Jerusalén! ¡Aleluya!