Read Lengua Sur Salmos 14 Bible Online

Salmos 14 - Lengua Sur bible

Salmos 14

¹Yának chá'a méko Dios ma'a énxet'ák élyeyháxma nak: apyókxoho chá'a enaqtawasakpok, apkeláneykegkek ma'a nentémakxa ekmaso agko' nak, ¡méko xama enxoho apkelane ektaqmalma aptémakxa!

²Apkeláneykha chá'a Wesse' egegkok énxet'ák ma'a aphakxa nak néten, yaqwayam enxoho éta', yetneyk kexa énxet apya'áseykegkoho aqsok, apketamso nak chá'a Dios.

³Apyókxoho eyke apkelmeheykegkok ma'a eyesagkexa nak ámay; apyókxoho apagko' apnaqtawásamákpok. ¡Méko xama enxoho apkelane aqsok ektaqmela! ¡Méko xama enxoho!

⁴Máxa meyke apkelya'áseyak aqsok aptamheykegkok ma'a élmasagcha'a nak apkeltémakxa, máxa apteméssessók énxet'ák ahagkok ma'a énxet aptól'a pán, melmaxnagko nak chá'a m'a Wesse' egegkok.

⁵Awanhók agko' sa' katnehek apkelpexyennama apkelyegwakto, hakte Dios apteme apkelxegexma'a m'a énxet'ák apkelyeheykekxoho nak.

⁶Kólasmaksek chá'a kéxegke m'a apkelmopmenyého nak chá'a m'a apkelmopyóseka nak, eltaqmelcheshok eyke chá'a Wesse' egegkok ma'a.

⁷¡Émenye' nak la'a ko'o kawak nélwagkásamáxche teyp ma'a Israel, eñama m'a Sión! Apyaqmagkassessek sa' agkok mók Wesse' egegkok ektémakxa apheykha m'a énxet'ák apagkok nak, kalpayhekxak sa' apkelwáxok ma'a Jacob aptawán'ák neptámen, cham'a apyókxoho énxet'ák nak Israel.