Read Lengua Sur Salmos 140 Bible Online

Salmos 140 - Lengua Sur bible

Salmos 140

¹Wesse', hewagkas ko'o teyp nepyeseksa élmasagcha'a nak apkeltémakxa; hetaqmelches ko'o nepyeseksa m'a apkelyennaqteyáseykha nak chá'a apyempe'ék,

²cham'a apkeláneykekxa nak chá'a aptáhakxa yaqwayam elanagkok aqsok ekmaso, aptekkesso nak chá'a éllámaxche' yókxoho ekhem.

³Ahamtakcha'ak apaxkok ma'a, máxa yéwa; máxa yéwa ekmáske hentakxek ma'a apkelpeywa nak.

⁴Wesse', nágyoho hemok ko'o élmasagcha'a nak apkeltémakxa, hetaqmelches ko'o nepyeseksa m'a apkelyennaqteyáseykha nak chá'a apyempe'ék, apkeláneykekxa nak chá'a aptamhágkaxa yaqwayam hetegkesek.

⁵Epekkenchessegkek ko'o kelhanma emonye' xa apkeleymákpoho nak; etegyéssessegkek yám'én emonye', tén han táma; epekkenchessegkek kelhanma m'a ekpayho nak ámay.

⁶Ektáhak ko'o seyáneya Wesse' egegkok se'e: “Xép apteme Dios ahagkok; ¡yeyxho sekwóneykha séltémo hepasmok!

⁷Wesse', Dios Sewagkasso nak teyp, etaqmelchessegkek axta exchep neyseksa kempakhakma.”

⁸Wesse', ná egkés aqsok apkelmopmenyého m'a élmasagcha'a nak apkeltémakxa; nágyoho katyapok ma'a aqsok apmáheyo elanagkok. Apkeleykpok ma'a apheykha nak neyáwa' sekhakxa; ¡yána kápekxak ma'a aptamhágkaxa nak apkelpeywa apkeltamho hetnégwomhok exma ekmaso ko'o!

¹⁰Kapálwaták sa' ma'a átex éláléwe nak; kólchexák sa' máxek, yaqwánxa sa' melántépekxók chá'a.

¹¹Megkawegqók sa' apheykha náxop ma'a megkalyexnegwayam nak chá'a apkelpeywa; ekmaso apheykha sa' aqsa chá'a katnehek ma'a apkelyennaqteyáseykha nak chá'a apyempe'ék, ekwokmoho ekmasséssekmo.

¹²Ekya'ásegkók ko'o elánekxéshok chá'a apheykha Wesse' egegkok ma'a meyke nak aqsok apagkok, emyókashok han chá'a ektémakxa nak chá'a apheykha m'a ekyentaxno nak apheykha.

¹³Elpeykeshok sa' chá'a exchep apwesey m'a énxet'ák meyke nak apkeltémakxa; ¡exmakha sa' chá'a aphakxa exchep ma'a énxet'ák éltaqmalma nak apkeltémakxa!