Read Lengua Sur Salmos 145 Bible Online

Salmos 145 - Lengua Sur bible

Salmos 145

¹Dios ahagkok, Wesse' apwányam ahagkok, axének sa' chá'a exchep apteme apwányam, axénmakha sa' chá'a ektaqmela apwesey meyke néxa.

²Ekyókxoho ekhem sa' chá'a axénmakha ektaqmela; alpeykeshok sa' chá'a apwesey meyke néxa.

³Apwányam apagko' ma'a Wesse' egegkok, payhawók agko' nahan kólteméssesek apcheymákpoho; mogwanchek agya'asagkohok ekyókxoho m'a ektémakxa nak apteme apwányam.

⁴Eltennasha sa' chá'a apketchek apyapmeyk ma'a ektémakxa nak xép aptamheykha, elpeykeshok sa' chá'a m'a aqsok élyawe nak apkelane.

⁵Exénakpok sa' chá'a apteme apcheymákpoho, tén han wesse', keñe sa' chá'a ko'o axének aqsok éltaqmalma nak apkelane.

⁶Kaxénaxchek sa' chá'a m'a aqsok élyawe nak apkelane, negaye nak agweta', keñe sa' ko'o axének apteme apwányam.

⁷Kaxénaxchek sa' chá'a ekyawe ektaqmeleykha apwáxok, meleysagkók sa' chá'a elmeneykmaksek elxének apteme appéwomo.

⁸Wesse' egegkok apteme ektaqmeleykha apwáxok henlano', tén han apmopyósa henlano', tén han mepekhésamap, awanhek han segásekhayo.

⁹Kataqmalmakha chá'a apwáxok Wesse' egegkok elanok ma'a apyókxoho énxet'ák nak, eláhapmakha chá'a elanha m'a aqsok apkelane nak.

¹⁰¡Wesse', kalpeykeshok sa' xép ekyókxoho aqsok apkelane! ¡Kaltaqmalmakha sa' apkelpeywa exének ma'a melyenseyam nak chá'a apkelyetleykha!

¹¹¡Elxének sa' chá'a ekteme eyeymáxkoho m'a aptémakxa nak Wesse' apwányam! ¡Elxének sa' aqsok apkelane élyawe nak!

¹²¡Yaqwayam sa' elya'asagkohok apyókxoho énxet'ák ma'a apmopwána nak, tén han eyeymáxkoho ekyawe m'a aptémakxa nak Wesse' apwányam!

¹³Megkamassegwomek ma'a aptémakxa nak xép Wesse' apwányam, megkatnégwomek chá'a néxa apteme Wesse'.

¹⁴Elchampásekxak chá'a néten Wesse' egegkok ma'a énxet'ák appalleyam nak, keñe elmagkok chá'a m'a apkelyelqamákpoho nak.

¹⁵Kelenmexmók xép aphakxa ekyókxoho aqsok élhaxanma elmésagkok ektéyak ekmayhágko enxoho chá'a.

¹⁶Apkelméssek agkok chá'a, yetlo ektaqmeleykha apwáxok chá'a elyaqkánegkesek ekyókxoho aqsok ekha nak élennama.

¹⁷Péwók ekyókxoho aqsok apkelane nak Wesse' egegkok, kataqmalmakha chá'a apwáxok elanok ma'a aqsok apkelane nak.

¹⁸Exek chá'a ketók Wesse' egegkok ma'a ektáha nak chá'a apwóneykha, apwóneykha nak chá'a yetlo megkeyxamaxkoho apwáxok.

¹⁹Elanaksek chá'a aqsok apkelmopmenyého m'a ektáha nak chá'a apcháyo; apkelmaxnakkek agkok chá'a yának epasmok, yeyxhok chá'a, keñe elwagkasek chá'a teyp.

²⁰Eltaqmelcheshok chá'a Wesse' egegkok ma'a ektáha nak chá'a apkelásekhayo, emasséssamhok eyke chá'a m'a élmasagcha'a nak apkeltémakxa.

²¹¡Alpeykeshok sa' chá'a ko'o Wesse' egegkok! ¡Kaltaqmalmakha sa' chá'a apkelpeywa exének apwesey apyókxoho énxet'ák, kaxwo' nak tén han megkatnégwayam néxa!