Read Lengua Sur Salmos 146 Bible Online

Salmos 146 - Lengua Sur bible

Salmos 146

¹¡Aleluya! Alpeykeshok sa' ko'o Wesse' egegkok, ekweykmoho kañók agko' ewáxok.

²Alpeykeshok sa' chá'a ko'o Wesse' egegkok sekyennákxa nak makham; anneykmássesek sa' ko'o negmeneykmasso Dios ahagkok, sekhakxa nak makham.

³Nágkólawho chá'a énxet ekyawe nak kéláyo, cham'a énxet apkeletsapmo nak chá'a, megkamopwána nak hegwagkasek teyp,

⁴hakte apkeletsekkek agkok ma'a xapop chá'a etnahagkokxa', cháxa néxa han chá'a katnehek ma'a aqsok apmáheyo elanagkok.

⁵Apkeleñémo énxet appasmo nak chá'a m'a Jacob nak Dios apagkok, apkelhaxanma nak chá'a Wesse' Dios apagkok,

⁶apkelane nak néten, xapop, wátsam ekwányam, tén han ekyókxoho aqsok ekhéyak nak kañe'. Mepeynchámekxeyk appeywa m'a.

⁷Elánekxések chá'a apheykha m'a kélnaqtawáseykegkoho nak, elagkok nahan chá'a aptéyak ma'a meyk át'ák nak. Elántekkesek chá'a Wesse' egegkok ma'a apkelmomap nak;

⁸elwetásekxak chá'a exma Wesse' egegkok ma'a meyke nak apaqta'ák; elheyásekxak chá'a néten Wesse' egegkok ma'a appalleyam nak; elásekhohok chá'a Wesse' egegkok ma'a énxet'ák meyke nak apkeltémakxa;

⁹eltaqmelcheshok chá'a Wesse' egegkok ma'a énxet'ák apkeleñama nak mók nekha, epasmok chá'a m'a élyeyheykha nak, tén han xentampe'e nak, yetsagkasseshok eyke chá'a ámay apagkok ma'a élmasagcha'a nak apkeltémakxa.

¹⁰Oh Sión, etnehek sa' chá'a wesse' apwányam meyke néxa m'a Wesse' egegkok, etnehek sa' chá'a wesse' apwányam megkatnégwayam néxa m'a Dios agkok. ¡Aleluya!