Read Lengua Sur Salmos 147 Bible Online

Salmos 147 - Lengua Sur bible

Salmos 147

¹¡Aleluya! ¡Tásók agko' nak la'a agmeneykmássesek negmeneykmasso Dios egagkok, ¡Payhawók kólmeneykmássesek ekmátsa agko' ma'a!

²Apxátekhásekxeyk Wesse' egegkok Jerusalén, apchánchesákxeyk han ma'a israelitas kélexpánchesso axta kélya'asso megkatnahakxa apkelókxa.

³Eltaqmelchessásekxak chá'a apkelwáxok ma'a élyentaxno nak apkelwáxok, elpextehetchesagkok han chá'a m'a apkelyense.

⁴Exének han chá'a yaqwánxa etnehek apwánxa m'a yaw'a, enegkenchesagkok han chá'a apkelwesey xama.

⁵Apwányam apagko' ma'a Dios egagkok, awanhek han apmopwána; méko néxa m'a apya'áseykegkoho.

⁶Elheyásekxak chá'a néten Wesse' egegkok ma'a meyke nak éleymáxkoho apkelwáxok, elyaqhápenták eyke chá'a náxop ma'a élmasagcha'a nak apkeltémakxa.

⁷Kólmeneykmásses Wesse' egegkok, yetlo kélmésso ekxeyenma kélwáxok; kólmeneykmásses negmeneykmasso Dios egagkok, yetlo kélpáwasso arpa.

⁸Cha'a apcháhakkasso chá'a yaphope néten ma'a, emámeyaksek chá'a néten xapop, yektegkesek chá'a pa'at ma'a néten egkexe,

⁹elagkok chá'a ektéyak aqsok nawha'ák, tén han kágqag étkók élpáweyncha'a enxoho.

¹⁰Háwe ekleklamo apwáxok Wesse' egegkok ma'a ektémakxa nak apyennaqte yátnáxeg, tén han ma'a ektémakxa nak apkelyennaqte sẽlpextétamo;

¹¹eyke kalkohok chá'a apwáxok ma'a ektáha nak chá'a apcháyo, melya'ásseyam nak chá'a ektémakxa segásekhayo.

¹²Jerusalén, elpeykesho Wesse' egegkok; Sión, elpeykesho Dios apagkok.

¹³Hakte apyennaqtéssamók apkelápeykegkokxa atña'ák kélagkok ma'a, apkeltaqmelchessegkek han énxet'ák apagkok apheykha nak ma'a kañe' tegma apwányam.

¹⁴Meyke ektáhakxa apheykha apteméssessók énxet'ák ma'a xapop apagkok nak, apkelyaqkánegkessegkek apkeleykegko m'a hótáhap apaktek apkeltaqmalma apagko' nak.

¹⁵Yáphaksek chá'a appeywa keso náxop, keytlawhok nahan chá'a élánamáxche m'a aptáhakxa appeywa.

¹⁶Aptekkesso chá'a yeyam appok ma'a, ektémól'a nepkések apwa', yexpánchesha chá'a élyenneykekxa ektémól'a yagkamex.

¹⁷Cha'a apcháphasso chá'a yeyam appok ektamheykekxa nak yegmen élyennaqte; keynnaqtések chá'a yegmen ma'a ekmáxaqxo apcháphasso nak.

¹⁸Apméssek agkok appeywa, keñe elpayhekxa'; yának chá'a kaxchahá', keñe kanyehek yegmen.

¹⁹Cha'a apya'assásegwayam appeywa m'a Jacob, cham'a Israel, tén han ma'a segánamakxa apagkok ekweykekxoho m'a apkeltémókxa nak antéhek.

²⁰Metnéssessók han pók énxet'ák xa ektáha nak, melya'ásegko apagko' nak ma'a apchánamakxa antéhek. ¡Aleluya!