Read Lengua Sur Salmos 148 Bible Online

Salmos 148 - Lengua Sur bible

Salmos 148

¹¡Aleluya! ¡Kólpeykesho Wesse' egegkok kélheykha nak néten! ¡Kólpeykesho Wesse' egegkok kélheykha nak netnók agko'!

²¡Kólpeykesho kéxegke kélyókxoho kélteme nak apkelásenneykha! ¡Kólpeykesho kéxegke kempakhakma yapmeyk kélheykha nak néten!

³¡Ekhem, tén han pelten, kólpeykesho Wesse' egegkok! ¡Kólpeykesho kéxegke yaw'a kélápogwate nak chá'a!

⁴¡Néten, netno' agko' nak, kólpeykesho Wesse' egegkok, xe' han yegmen ekyetnama nak néten ma'a yaphope!

⁵Kólpeykesho Wesse' egegkok, hakte appeywa axta apméssók keñe élánamáxko ekyókxoho aqsok;

⁶apnegkenmeyk axta ekyókxoho meyke néxa', appekkenmeyk axta han xama segánamakxa yaqwayam kólyahakxohok chá'a.

⁷¡Kólpeykesho Wesse' egegkok kélheykha nak keso náxop, yegmen askok élyawe, tén han wátsam ekwányam ekmattawóneg nak!

⁸¡Takha' apkelyenma, tén han yegmen élyennaqte, yeyam appok, tén han téyáméten! ¡Éxchahayam ekyennaqte, élyeheykekxoho nak chá'a apchánamakxa katnehek!

⁹¡Egkexe netna'awo, tén han ma'a náxap'awo nak! ¡Ekyókxoho yámet cedros, tén han ma'a yenta'a ekha nak ekyexna!

¹⁰¡Aqsok kélnaqtósso, tén han ma'a élmeymentakcha'a nak! ¡Náta, tén han ma'a élpexyaweykegkoho nak náxop kalxog!

¹¹¡Kelwesse'e apkelwányam nak nélwanmeygkaxa, tén han apyókxoho énxet'ák! ¡Apyókxoho apkelámha apmonye'e, tén han apkeltaqmelchesso nak chá'a apkelókxa keso náxop!

¹²¡Apkelennay'a, kelwán'ák, wokma'ák, kelán'a étkók, apkelwányam tén han sakcha'a!

¹³¡Kólpeykesho kélyókxoho Wesse' egegkok apwesey, hakte wánxa ekteme meyke ekhémo apwesey m'a! ¡Hakte cha'a apteme ekyeykhágweykmoho apcheymákpoho néten ma'a, tén han keso náxop!

¹⁴¡Cha'a apkelyennaqtésso énxet'ák apagkok ma'a! ¡Elpeykeshok sa' apyókxoho m'a melyenyaweykha nak apkelyetleykha, cham'a israelitas, énxet'ák apagkok apkelásekhayo nak! ¡Aleluya!