Read Lengua Sur Salmos 17 Bible Online

Salmos 17 - Lengua Sur bible

Salmos 17

¹Wesse', yeyxho sélmaxnagko ekpéwomo, eñoho sekwóneykha, yeyxho sélmaxnagko, hakte matnék ko'o sekmowána amya'a.

²¡Xép sa' kañék sexeyenma ekpéwomo sektémakxa, hakte apya'ásegkok xép ma'a aqsok ekpéwomo nak!

³Apya'ásegkok xép élchetámeykha ewáxok; axta'a chá'a hey'ótak hélanha; apkelányók xép sektémakxa ektémól'a kóllanok ektémakxa ektaqmalma kólwatnek ma'a sawo, meteyk xama enxoho ekmaso sektémakxa. Maxeyenmak ma'a aqsok megkapayhawo nak axének

⁴aptamheykegko nak chá'a nápakha énxet'ák; ekyamasmeyk ma'a ektémakxa nak negyennaqteyáseykha egyempehek, éltémókxa nak antéhek ma'a segánamakxa apagkok.

⁵Ekyetlamchek aqsa meyke sekyenseyam ma'a ámay apagkok; mayenseykmok xama enxoho.

⁶Dios ahagkok, élmaxnakkek ko'o exchep, hakte heyátegmowagkok chá'a; heyeyxho, yeyxho sekpeywa.

⁷Hexekmós ko'o ektaqmalma m'a ektémakxa nak seyásekhayo, xép apkelwagkassamo nak chá'a teyp nepyeseksa apkelenmexma m'a apkelye'eykekxa nak chá'a yaqwayam kamyók ma'a apmopwána.

⁸Hetaqmelches, ektéma nak apkeltaqmelchessama m'a apaqta'ák, hexnés kóneg apxempenák,

⁹hewagkas teyp neyseksa sektáméyam ma'a élmasagcha'a nak apkeltémakxa, ¡ewakhayak ko'o m'a sélenmexma apmáheyo nak heyaqhek!

¹⁰Kalyeyha'ak apkelwáxok ma'a, kaleyxkohok han chá'a apkelpeywa;

¹¹hétlawha chá'a m'a sekmahágkaxa enxoho, héleyxek chá'a emáwhok heyaqnegkesek náxop.

¹²Máxa méwa éllól'a élyexanmeykhal'a m'a ekheykegkaxa nak kaleyxek aqsok yaqwayam katnéssesek nekha'a étkók.

¹³Wesse', etnamha, ¡elenmex xép ma'a! ¡Epalchásenta náxop! Hewagkas ko'o teyp nepyeseksa élmasagcha'a nak apkeltémakxa, yetlo sókwenaqte apagkok;

¹⁴hewagkas ko'o teyp yetlo apmopwána nepyeseksa s'e énxet'ák; ¡elántekkes énxet'ák keso náxop, ekyetna nak ekyókxoho aqsok! Yáphásses apyókxoho kéllegassáseykegkoho kéltaqmelchessessama nak, ellegássesagkoho han ma'a apketchek nak, tén han ma'a aptawán'ák.

¹⁵Kapayhekxak sa' eyke ko'o ewáxok sekwet'a sa' ahaqta'ák ahagko', ¡sekha sa' nápaqto' sekxatakha'a enxoho!