Read Lengua Sur Salmos 18 Bible Online

Salmos 18 - Lengua Sur bible

Salmos 18

¹Wesse' egegkok, xép apteme sénnaqtésso, ¡eyásekhayók ko'o exchep!

²Xép apteme setaqmelchesso, sekyexánegweykekxexa', semallahanchesso, Dios ahagkok, semasma apyennaqte, seyáhakkásamáxche', sewagkasso teyp apmopwána, xép apteme sekyexanmomakxa netno' agko'.

³Wesse' egegkok, payhawók xép kólpeykesho'; ekwóneyha agkok chá'a, hewagkasek chá'a teyp nepyeseksa sélenmexma.

⁴Élpextehetmeyk axta ko'o nétsapma; eyáyak axta ko'o m'a yegmen ényé ekmassésseykmohol'a ekyókxoho aqsok.

⁵Ewakhayak axta ko'o m'a nétsapma; ¡ketók axta ko'o semomakxa m'a kelhanma segaqhamo nak!

⁶Ekwóneykha axta ko'o Wesse' egegkok ma'a ekyentaxnama axta setnamakxa', éltémok axta hepasmok Dios ahagkok, aplegayók axta ko'o sélmaxnagko m'a ekpayho nak tegma appagkanamap apagkok; ¡aplegayak axta sekwóneykha!

⁷Yetlómok axta ekyawheykha xapop ekyennaqte agko': kelyawheykha axta m'a egkexe ekweykmoho m'a awhók nak; Wesse' egegkok aplo axta kelyawheyáseykha.

⁸Apwéhek axta teyapmak ekpánma, keñe apátog ekteyapma táxa segaqhamo nak; ¡apátog axta kelánteyapmak átex éláléweyak nak!

⁹Apmeykáseykekxeyk axta néten, keñe axta apweyweykento. ¡Yentexek axta yaphope ekpésyam ma'a kóneg apkenmágkaxa axta!

¹⁰Apchántegkek axta m'a xama apchásenneykha ekha nak apxempenák, keñe axta apchampaya apmeyeykekxo néten, seykekxeyk axta éxchahayam.

¹¹Apmeykha axta apyexanmoma m'a ekyáqtessóxma ekyentaxno ekwakhaya axta, apmeykha axta aptéma appakxanma m'a yaphope ekpésyam ekláneyo m'a yegmen.

¹²Xama apkelyenma ekyennaqte agko' axta teyapmak ma'a apkenmágkaxa axta; palleykenteyk axta yegmen élyennaqte éleñama m'a yaphope nak, tén han átex éláléweyak.

¹³Kextegyawomchek axta appeywa Wesse' egegkok meyke nak Ekhémo m'a néten; neyseksa ektéyam yegmen élyennaqte, tén han átex éláléweyak.

¹⁴Máxa yágke aktek axta aptemék apkelnextegkessama apkelyenma, apkexpánchessegkek axta sélenmexma.

¹⁵Yáxña'akxoho axta tamheykekxak ma'a neysekso nak wátsam; negwetayók axta m'a awhak nak xapop, eñama Wesse' egegkok appeywa ekyennaqte agko', tén han apwátekhapma ekyennaqte.

¹⁶Ey'assáseykmek axta ko'o apmek Dios, etekkessegkek axta m'a wátsam ekyawe agko' nak.

¹⁷Ewagkassegkek axta teyp nepyeseksa m'a sélenmexma apkelyennaqte setaqnagkama axta, apmelyeyha'ak axta m'a, axta axnémók ko'o.

¹⁸Étámeykmek axta ko'o m'a neyseksa ekyentaxno sekha, epasmomchek axta eyke m'a Wesse' egegkok:

¹⁹etekkessegkek axta m'a eyesagkexa axta; ¡ewagkassegkek axta teyp hakte eyásekhayók ko'o!

²⁰Egkéssegkek axta ko'o ekyánmaga Wesse' egegkok ekpayhawo nak hegkések, eñama eyáxñeyo sektémakxa,

²¹hakte ekyetlamchek axta ko'o m'a Wesse' egegkok nak ámay apagkok; ¡mayenseykmok xama enxoho m'a Dios ahagkok!

²²Kaxénmakha chá'a ewáxok ma'a ekyókxoho apchánamakxa nak antéhek, ¡mayenseykmok xama enxoho m'a segánamakxa apagkok!

²³Méko agko' ko'o aqsok ekmaso sélane nápaqtók ma'a; ekyamasmeyk ma'a nentémakxa ekmaso.

²⁴Egkéssegkek ekyánmaga Wesse' egegkok eñama eyáxñeyo sektémakxa nápaqto'.

²⁵Wesse' egegkok, meyenyawha chá'a exchep ma'a énxet meyenyaweykha nak chá'a, kataqmalmakha chá'a apwáxok elanok ma'a énxet aptaqmelchásamákpoho nak chá'a,

²⁶exekmóshok eyke chá'a exchep apteme eyáxñeyo aptémakxa m'a énxet eyáxñeyo nak aptémakxa, ey'asagkohok eyke chá'a exchep aptémakxa m'a énxet apmopwána nak appeywa elának pók.

²⁷Elwagkashok eyke chá'a exchep teyp ma'a megkaleymáxkoho nak apkelwáxok, mékoho eyke chá'a etnessásekxak ma'a éleymáxkoho nak apkelwáxok.

²⁸Wesse' egegkok, xép sélsássesso chá'a exma; Dios ahagkok, xép sélsássesso exma m'a ekyáqtésakxa exma nak.

²⁹Epasmeyk sa' agkok xép aktamagkok sa' sélenmexma, almallanagkok sa' ma'a meteymog kélhaxtegkesso nak tegma apkelyawe apagkok.

³⁰Péwók ma'a Dios ámay apagkok; payhawók megkólya'ássemek ma'a apxeyenma nak elának Wesse' egegkok. ¡Eltaqmelcheshok chá'a Dios ma'a énxet'ák ektáha nak chá'a apcháyo!

³¹Dios apteme wánxa xama, méko pók. Méko mók aqsok kéláyókxa awanchek hentaqmelchesek.

³²Dios segkésso sekyennaqte; tén han setnéssesso ekpéwomo sektémakxa,

³³cha'a setnéssesso ko'o meyke sekpelápegwayam ma'a ektémól'a xenaq, cha'a segkésso han sekmowána atnamha m'a netnók agko' nak,

³⁴cha'a seltámésso han yaqwayam wampakhak ma'a, tén han segkésso sekyennaqte, yaqwayam weykesek axát'ák ma'a yágke sawo ekyexwase nak.

³⁵Xép setaqmelchesso, tén han sewagkasso teyp, hemagkok chá'a apmek apkelya'assamakxa'; ektaqmeleykha apwáxok sélányo keñamak setaqmelchessessama sekha.

³⁶Eyaxñássessegkek chá'a sekmaheykegkaxa', megkaltáxñek chá'a emagkok.

³⁷Élamheykegkek axta ko'o m'a sélenmexma, keñe séltahanyeykekxo, natámen seksawhoma sélnapma axta séxyeykmo makham.

³⁸Nápakha'a apketkók axta ekteméssessók. Axta enaqxétekhágweykmok. ¡Apkelyaqneneykegkek axta ekpayhókxa sénmágkaxa!

³⁹Xép axta segkésso sekyennaqte sémpakhe; xép axta apkeltémo elháxahagkok emonye' m'a énxet'ák sélenmexeykha axta chá'a,

⁴⁰tén han apkeltémo yenyahagkok emonye' m'a sélenmexma nak. Cháxa sekmassésseykmo axta ko'o m'a ektáha axta chá'a setaqnagko.

⁴¹Aptegyeykegkek axta eykhe ekpasmo, méko axta eyke ekpasmoma; apwóneykha axta eykhe chá'a Wesse' egegkok, axta eyke yátegmoweykegkok.

⁴²¡Ektepelchamók axta ektémól'a yagkamex kalsók éxchahayam! ¡Élteyammeykha axta, ektémól'a ólteyammaha yelpa' m'a ámay!

⁴³Emallahanchessegkek axta nepyeseksa m'a énxet'ák sénmexeykha axta chá'a, sémha emonye' axta etnéssessók ma'a nepyeseksa nak pók aptémakxa énxet'ák, éltemessáseykha axta ko'o m'a énxet'ák megkatnaha nak sélweteykxa'.

⁴⁴Apkelleg'ak agkok chá'a sekpeywa, hélyahakxohok chá'a; kaltaqmalmakha chá'a apkelpeywa hexének ma'a énxet'ák apkeleñama nak mók nekha',

⁴⁵kalyelqaxchek chá'a apkelwáxok hélanok énxet'ák apkeleñama nak mók nekha, elpexyennók chá'a elántépok ma'a apkelyexanmomakxa nak chá'a.

⁴⁶¡Megyetsepek chá'a Wesse' egegkok! ¡Apcheymákpoho sa' chá'a kólteméssesek ma'a setaqmelchesso nak chá'a! ¡Meyke ekhémo sa' chá'a kólteméssesek ma'a Dios sewagkasso nak teyp!

⁴⁷Cha'a apteme Dios seyaqmagkassáseykekxa nak chá'a mók sélteméssessamakxa m'a, tén han sélmésso m'a énxet'ák yaqwayam atnehek séláneykha.

⁴⁸Ewagkassegkek teyp nepyeseksa m'a sélenmexma apkello nak, cham'a sénmexeykha sektámeykmo nak chá'a ko'o. ¡Wesse', ewagkassegkek ko'o teyp xép, nepyeseksa m'a énxet'ák apkelyennaqteyáseykha nak chá'a apyempe'ék!

⁴⁹Cháxa keñamak sélpeykessamo nak chá'a exchep, nepyeseksa m'a pók aptémakxa énxet'ák, tén han sekmeneykmassama chá'a negmeneykmasso xép apwesey.

⁵⁰Apméssegkek xép apkelmalláneyak ekxámokma m'a wesse' apwányam ektáha axta apkelyéseykha; yásekhohok chá'a exchep ma'a David, tén han ma'a aptawán'ák neptámen.