Read Lengua Sur Salmos 21 Bible Online

Salmos 21 - Lengua Sur bible

Salmos 21

¹Wesse' egegkok, payhekxeyk apwáxok wesse' apwányam, hakte xép apmeyásak apyennaqte; ¡Payhékxók agko' apwáxok hakte xép apmeyásak apmallanma!

²Apméssek xép ekmámenyého nak apwáxok; memyágweykxak apmésa m'a aqsok apkelmaxneyeykha.

³Apkelanyexágkek yetlo apkelmésso aqsok éltaqmalma, apketchessessek han apqátek ma'a apketchesso apqátek sawo ekyátekto ekmomnáwa.

⁴Apkelmaxnakkek axta ekyennaqte apnények, apméssek axta han: cham'a ekwenaqte nak apha, tén han meyke néxa.

⁵Xép appasmo keñamak ekyáya m'a apmopwána; apméssegkek apcheymákpoho, tén han apxénamap ektaqmela.

⁶Megkamassegwomek sa' apteméssesso apkeleñémo; kapayhekxohok agko' sa' chá'a apwáxok ma'a apha enxoho xamo' xép.

⁷Xép, wesse' apwányam, megkóltaqhesha sa' chá'a exchep, hakte mey'ásseykmok chá'a m'a Wesse' egegkok; ¡hakte mey'ásseykmok chá'a m'a segásekhayo nak Meyke Ekhémo!

⁸Elmok sa' chá'a exchep yetlo apmopwána m'a apyókxoho apkelenmexma nak; elmok sa' ma'a aptaqnagko nak chá'a exchep;

⁹emasséssók sa' ektémól'a táxa axagkok, cham'a apwa'a sa' yaqwayam elyekpelkoho'. Esawhohok sa' elwatnek Wesse' egegkok yetlo aplo yahak ma'a táxa segaqhamól'a.

¹⁰Emasséssók sa' nélwanmeygkaxa, tén han nepyeseksa énxet'ák ma'a apketchek, tén han aptawán'ák neptámen.

¹¹Emáwhok sa' eykhe etnéssessamhok exma ekmaso exchep, elánekxak sa' eykhe apkelpeywa yaqwánxa etnéssesek yenmexek xép, megkatyepek sa' eyke yaqwánxa etnahagkok,

¹²hakte xép sa' emenxenek ma'a, emátchesek sa' yágke apagkok ekpayhókxa nak apchaqneykegkaxa'.

¹³Wesse', ¡exnekxa néten yetlo apmopwána! ¡Ólátsaha sa' yetlo nélmeneykmasso eñama apmallanma!