Read Lengua Sur Salmos 23 Bible Online

Salmos 23 - Lengua Sur bible

Salmos 23

¹Wesse' egegkok ko'o apteme séláneykha, méko aqsok eyeyméxchexa.

²Héllókassesek chá'a sekyampe m'a ekyetnamakxa nak pa'at ektaqmela, héntemekxak chá'a m'a ektaqmalmakxa nak ekyetno yegmen,

³hegkeyásekxak chá'a axnagkok sekyennaqte, hey'ásekxak chá'a m'a ámay ekpéwomo nak, eñama apmasma m'a apwesey.

⁴Ekxegkek agkok ekyáqtésakxa exma m'a ekyapwátegweykenxa nak xapop, magwakyek xama enxoho aqsok ekmaso, hakte sekxegexma ko'o exchep Wesse'; hegkések chá'a meyke ektamheykha ewáxok ma'a aptasqapeykha nak, apmeykencha'awól'a chá'a eltaqmelchesek nepkések.

⁵Ektámáxche ekyawe éláneyásak xép nápaqta'awók ma'a sélenmexma nak, éxpaqhássessek han épátek sokmátsa, elánessásawók han seyátegkesso sekya.

⁶Étleykha chá'a exchep yetlo ektaqmeleykha apwáxok neyseksa sekha makham tén han seyásekhayo. Wesse', axek sa' chá'a ko'o meyke néxa m'a apxagkok nak.