Read Lengua Sur Salmos 32 Bible Online

Salmos 32 - Lengua Sur bible

Salmos 32

¹Apkeleñémo énxet megkólyaqmagkáseykekxa nak apsexnánémap, tén han mey'assáxma.

²Apkeleñémo énxet meyke nak ekxéneykha apwáxok ekmaso, mexéncháseykekxoho nak Wesse' egegkok xama enxoho m'a aqsok megyaqhémo.

³Kaxtemék axta maltennáseykekxoho Dios may'assáxma, kataqmelchesagkohok axta aqsa eymhowak, eñama sélekxagweykha yókxoho ekhem,

⁴hakte yókxoho ekhem xép señassáseykegkoho tén han yókxoho axta'a. Máxa pánaqte exnók mayáhat ekyamassól'a entemék sekyókxa ekyelqamáxko.

⁵Éltennássek axta eyke ko'o exchep may'assáxma meyke seyáyam xama enxoho, tén han sektémakxa ekmaso; xénchek axta ko'o ewáxok altennaksek may'assáxma, keñe axta exchep, Wesse', meyaqmagkásekxo.

⁶Cháxa keñamak peya nak chá'a ewónmakha exchep ekwa'a enxoho chá'a ekmaso apheykha m'a melyenyaweykha nak chá'a exchep, katyapok sa' eykhe m'a yegmen ekmattawóneg nak, megkammók sa' eyke m'a apheykegkaxa nak.

⁷Xép apteme sekyexanmomakxa, heyeksek chá'a m'a aqsok ekmaso, kalmeneykmasaxchek chá'a neyáwa sekhakxa', eñama sewagkasso teyp.

⁸Aptáhak Wesse' egegkok se'e: “Éláneykha chá'a ko'o exchep. Alxekmósek sa', apaqhetchesha sa', axekmósek sa' ámay eyeyméxko nak étlók.

⁹Ná etne aqsa ektémakxal'a élyeheykok, tén han yátnáxeg, megkay'áseyak la'a, negatchessesso átog aqsa egwanchek agmagkok ma'a, tén han ma'a nétchessessól'a apqátek, mépetchegwomók han xép méko enxoho xa.”

¹⁰Xámok sa' katnehek apkellegeykegkoho m'a élmasagcha'a nak apkeltémakxa, kápok sa' eyke Wesse' egegkok apchásekhayo m'a aptáha nak chá'a mey'ásseyam.

¹¹Kalpayhekxa kélwáxok eñama Wesse' egegkok, kéxegke éltaqmalma nak kéltémakxa, tén han ma'a meyke nak kéltémakxa, ¡kalpayhekxa kélwáxok, kólwónchesha kólátsaha!