Read Lengua Sur Salmos 33 Bible Online

Salmos 33 - Lengua Sur bible

Salmos 33

¹Kéxegke éltaqmalma nak kéltémakxa, kólpeykesho Wesse' egegkok yetlo kélwehéseykha kélátseykha; payhawók elteméssesek apcheymákpoho Wesse' egegkok ma'a énxet'ák éltaqmalma nak apkeltémakxa.

²Kólmés ekxeyenma kélwáxok Wesse' egegkok, yetlo kélpáwasso arpa, kólmeneykmásses negmeneykmasso yetlo kélpáwasso m'a yát'axpog,

³kólmeneykmásses negmeneykmasso axnagkok, ¡kólpáwes yetlo kélmowána tén han kélwehéseykha kélátseykha!

⁴Wesse' egegkok appeywa ekteme ekmámnaqsoho agko'; payhawók negko'o agásenneykxak aqsok apkelane.

⁵Yásekhohok chá'a Wesse' egegkok ma'a aqsok ekmámnaqsoho, tén han ma'a nentémakxa ekpéwomo nak, ¡sawheykekxók segásekhayo keso náxop!

⁶Appeywa axta keñamak Wesse' egegkok apkeláneya m'a néten, apwátekhapma axta keñamak élánteyapma m'a ekyókxoho aqsok élápogwáteyák nak néten.

⁷Xama ekyetnamakxa axta aptemessáseykekxak apchánchásseykekxo yegmen ma'a wátsam ekwányam ekmattawóneg agko' nak.

⁸Kólteme kéláyo Wesse' egegkok kélyókxoho kélheykha nak keso náxop, ¡tén han kélyókxoho kélheykha nak keso nélwanmeygkaxa!

⁹Hakte appaqmeyesmeyk axta m'a, keñe élánamáxko ekyókxoho aqsok; apkeltémok axta katnehek, yetlómok axta han élánteyapma.

¹⁰Metekkessesek chá'a Wesse' egegkok ekyókxoho aqsok apmáheyo nak chá'a elanagkok ma'a énxet'ák melya'áseyak nak Dios, megyohók han chá'a katyapok aqsok apkeláneyak,

¹¹megkamassegwomek eyke m'a aqsok apmáheyo nak chá'a elának Wesse' egegkok.

¹²Apkeleñémo énxet apteme nak Dios apagkok ma'a Wesse' egegkok, cham'a énxet'ák apkelyéseykha nak yaqwayam etnehek énxet'ák apagkok.

¹³Apkenmexeykentamok chá'a Wesse' egegkok ma'a néten, apkelwetayók nahan chá'a m'a apyókxoho énxet'ák;

¹⁴apkeláneykha chá'a énxet'ák apheykha nak náxop, cham'a aphamakxa nak;

¹⁵cha'a apkelánesso nahan chá'a apkelwáxok énxet'ák ma'a, tén han apkeláneykha ekyókxoho apkelánegkaxa enxoho chá'a.

¹⁶Mewagkasakpek teyp xama wesse' apwányam eñama apxámokma m'a sẽlpextétamo apagkok, melwagkasakpek han teyp énxet'ák apkelyennaqte, eñama m'a apkelyennaqte apagko' nak;

¹⁷mopwanchek elwagkasek teyp énxet'ák ma'a yátnáxeg; apmelyeyha'ak eykhe katnehek, mopwanchek eyke elwagkasek teyp.

¹⁸Elanha eyke chá'a Wesse' egegkok ma'a ektáha nak chá'a apcháyo, tén han melya'ásseyam nak chá'a ektémakxa segásekhayo,

¹⁹yaqwayam elmallahanchesek chá'a nétsapma; tén han elmésagkok chá'a apkelyennaqte ektepa enxoho meyk segaqhe.

²⁰Magya'ásseykmok negko'o m'a Wesse' egegkok; ¡empasmomchek chá'a m'a! ¡ẽltaqmelchessegkek nahan!

²¹Ẽlpeykessásekxeyk negko'o egwáxok Wesse' egegkok; magya'ásseykmok ma'a apwesey ekpagkanamaxche nak.

²²¡Wesse', segásekhayo sa' chá'a keytek negyeseksa negko'o, ekhawo ektémakxa nak nélhaxanma exchep!