Read Lengua Sur Salmos 34 Bible Online

Salmos 34 - Lengua Sur bible

Salmos 34

¹Alpeykeshok sa' chá'a ko'o Wesse' egegkok ekyókxoho ekhem, malwátéssemek sa' chá'a sekteméssesso apcheymákpoho.

²Awanhek ko'o eyaqheykha ewáxok Wesse' egegkok eñama m'a aqsok apkelane; ¡kóleyxho, énxet'ák apkelmopyósa nak, kalpayhekxa kélwáxok!

³Ansawhaxkohok sa' ólpeykeshok Wesse' egegkok, anteméssesek ekwányam ma'a apwesey nak.

⁴Élmaxnakkek axta ko'o sétama Wesse' egegkok, eyátegmowágkek axta han, emallahanchessek axta ekyókxoho m'a aqsok seyáya nak.

⁵Kalpayhekxohok agko' chá'a apkelwáxok ma'a apkelye'eykekxa nak Wesse' egegkok, kamassegwomhok agko' nahan chá'a apkelmegqakto.

⁶Ekwóneyha axta ko'o Wesse' egegkok, ko'o sektáha nak sekmayósa, ehaxnawók axta han, emallahanchessek axta han ekyókxoho ektémakxa ekmaso sekha.

⁷Eltaqmelcheshok chá'a Wesse' egegkok apchásenneykha m'a apkeláyo nak chá'a Wesse' egegkok, elwagkasek nahan chá'a teyp.

⁸Kólyepkeyn kólya'ásegwók Wesse' egegkok apteme ektaqmalma apwáxok. ¡Apkeleñémo énxet apye'eykekxa nak chá'a!

⁹Kóláwho chá'a Wesse' egegkok, kélpagkanchásamáxche nak chá'a m'a, hakte méko sa' katnehek eyéméxchexa m'a énxet apteme nak chá'a apcháyo.

¹⁰Meyke aqsok apagkok chá'a katnekxak ma'a énxet'ák ekxákma nak aqsok apagkok, ellegagkohok chá'a meyk, keñe m'a apkelchetamso nak chá'a Wesse' egegkok, megkeymaxchék sa' chá'a xama aqsok enxoho.

¹¹Kéxegke kélketkók nak, kólchexyem, kóleyxho sa' sekpeywa: alxekmósek sa' nentémakxa agáwhok Wesse' egegkok.

¹²¿Kélmenyéya kawegqohok kélweynchámeykha? ¿Kélmenyéya kapayhekxak kélwáxok neyseksa kélheykha?

¹³Kólmágwakxa chá'a kélpeywa peya enxoho kólpaqmétek ekmaso, nágkólteme chá'a kélmowána amya'a.

¹⁴Kólyetnakhés nentémakxa ekmaso, kóllána aqsok ektaqmela; kólchetam meyke ektáhakxa nak negha, nágkólyensem nahan.

¹⁵Elanha chá'a Wesse' egegkok ma'a énxet'ák meyke nak apkeltémakxa, yeyxhok nahan chá'a m'a apkelmaxneyéyak nak.

¹⁶Elenmexekxak chá'a Wesse' egegkok ma'a élmasagcha'a nak apkeltémakxa, yaqwayam enxoho emasséssók chá'a apkelxénamap keso náxop.

¹⁷Yeyxhok chá'a apkelmaxneyéyak Wesse' egegkok ma'a meyke nak apkeltémakxa, elmallahanchesek chá'a ekyókxoho m'a ekmaso apheykha.

¹⁸Ketók chá'a exek Wesse' egegkok yaqwayam elwagkasek chá'a teyp ma'a élyentaxno agko' nak chá'a apkelwáxok, tén han ekmassegwayam nak apkelhaxneykha yaqwayam kólpasmok.

¹⁹Xámok katnehek aqsok ekmaso apkeltahanye m'a énxet'ák meyke nak apkeltémakxa, Wesse' egegkok akke chá'a elmallahanchesek neyseksa xa ekyókxoho aqsok nak.

²⁰Eltaqmelchessesek chá'a apkelyókxa', megkalekkexaxcheyk chá'a xama enxoho m'a apexchakkok.

²¹Apkeltémakxa ekmaso chá'a kalnápekxak ma'a élmasagcha'a nak apkeltémakxa; kóllegássesagkohok sa' ma'a apkeltaqnagko nak chá'a énxet'ák meyke apkeltémakxa.

²²Elwagkashok eyke chá'a teyp Wesse' egegkok ma'a apkeláneykha nak; ¡megkóllegássesagkók sa' chá'a m'a apkelye'eykekxa nak!