Read Lengua Sur Salmos 38 Bible Online

Salmos 38 - Lengua Sur bible

Salmos 38

¹Wesse', ná hepaqhetches aqsa ko'o ekyennaqte eñama setaqnagko, ná heñássesagkoho aqsa ko'o aplawa enxoho.

²Élyaqxakkak ko'o m'a yágke aktek apagkok, ¡etekpogkek han apmek señassásegkoho!

³Aplo keñamak eklegágkoho sekyókxa, méko ektaqmelakxa enxoho exchakkok, eñama may'assáxma

⁴Eyeykhágweykmók ko'o may'assáxma; yentexók agko', malenmáxamáxche'.

⁵Seyeyháxma ko'o keñamak élesógweykmo agko' ma'a sélyense, keltahapmek nahan.

⁶Yókxoho ekhem ekyaqhápeykha ewáxok, sekháxaheykha, tén han sélapwayam.

⁷Mexanmeyk agko' émpehek; ¡eklegeykegkók ekyókxoho émpehek!

⁸Ekyelqamáxcheyk ahagko', meyke sekyennaqte temék; ¡legeykegkók ewáxok, eyápentegkessegkek ekmáske!

⁹Wesse', apya'ásegkok xép ekyókxoho aqsok sekmámenyého, ¡megkaxyánegkessók ektémakxa seyápentegeykha!

¹⁰Tayha agko' egkenyek, eyenyókek sekyennaqte, ¡wokmok ahaqta'ák élhánaqte!

¹¹Weykmók nahan mehepetchegweyktámho m'a sélxegexma'a sélásekhayo nak, tén han ma'a énámakkok ahancha'awo' nak, apcháya m'a sélyense.

¹²Kelhanma chá'a epekkenchessók emonye' m'a apmáheyo nak chá'a heyaqhek; hexének chá'a hemasséssók ma'a apmáheyo nak chá'a hetnéssessamhok exma ekmaso, yókxoho ekhem élxeyenma apkelwáxok hesexnenak ko'o.

¹³Máxa meyke eheyk'ák akke ko'o ektemék, máxa mañeya ektemék; mapaqmeyesmak han, máxa ektemék ma'a meyke sekpeywal'a.

¹⁴Máxa ektemék ko'o m'a énxet meñél'a ektemegweykmoho exma, megyátegmowéyak la'a eñak apxénamap.

¹⁵Wesse', Dios ahagkok, élhaxanmeyk eyke ko'o exchep heyátegmakkasagkok.

¹⁶Wánxa eyke aqsa sélmaxneya exchep, maltamho ko'o wasmésaxche', tén han kalpayhekxak apkelwáxok énxet'ák eñama sektéyam.

¹⁷Ketók ko'o sekyaqnenmakxa'; meheyamasmak xama enxoho seklegeykegkoho.

¹⁸¡Axének sa' ko'o may'assáxma, hakte tawáseykha élchetamso ewáxok!

¹⁹Apxámágkek ko'o sélenmexma, apxámok ma'a setaqnagko nak ko'o meykexho ektáhakxa.

²⁰Ekmaso chá'a apyaqmagkáseykekxak sekteméssessamakxa ektaqmela; élenmexeykekxeyk chá'a ko'o eñama séltémo alának aqsok ektaqmela.

²¹Wesse' ¡ná heyenyow ko'o exakko'! Dios ahagkok, ¡ná heyenyow aqsa ko'o!

²²Dios, Sewagkasso nak chá'a teyp, epekhaksoho hepásegwata'.