Read Lengua Sur Salmos 39 Bible Online

Salmos 39 - Lengua Sur bible

Salmos 39

¹Ekxeyenmeyk axta ko'o alanagkohok sektémakxa, tén han mehélanaksek may'assáxma m'a sekpeywa, tén han amágwakxak chá'a sekpeywa, apchaqnáncha'a enxoho chá'a emonye' m'a élmasagcha'a nak apkeltémakxa.

²Ekwanmagkamchek axta aqsa: axta apaqmeyesmak xama enxoho. ¡Weykmok axta maxeyenma m'a aqsok ektaqmela! Maxta eyke kahaxanmak ekyágweykmoho seklegeykegkoho;

³¡pekhéssegkek axta ewáxok! Xénchek agkok chá'a ewáxok, kapekhaksek chá'a, keñe axta sektáha sekpaqmeta ekyennaqte s'e:

⁴“Wesse', héltennés hana, háxko sa' ko'o hetnehek, háxko sa' ekwánxa ekhem aweynchamha, yaqwayam enxoho ay'asagkohok yaqwátawok sekha.

⁵Yaqwátawók ko'o exchep segkésso sekha, yaqwátawók ko'o sekyennaqte nápaqto' xép. ¡Apyókxoho énxet apteme máxa éxchahayam ekmassegweykmohol'a aqsa!

⁶¡Apyókxoho énxet apteme aphémo pessesse ekmallanel'a! Kaqhok exámasagkok aqsok apagkok, hakte mey'asagkehek yaqsa sa' kalmekxak ma'a aqsok nak.

⁷Wesse', ¿yaqsa eyke aleyxek ko'o kaxwo'? ¡Xép akke aqsa may'ásseykmok!

⁸Heyenyókas ko'o ekyókxoho may'assáxma; nágyoho hésmaksek ma'a énxet'ák élyeyháxma nak.

⁹“Ekwanmagkamchek aqsa ko'o, mapaqmeyesmak, hakte xép axta setnéssesso xa ektáha nak.

¹⁰Elwatés señassáseykegkoho, hakte peyk ko'o watsapok eñama setekpageykha.

¹¹Elánekxések chá'a exchep apkeltémakxa énxet'ák, ellegássesagkohok eñama apkeltémakxa melya'assáxma, xapop chá'a etnessásekxak ma'a aqsok negásekhayo egagko' nak chá'a. ¡Apyókxoho énxet apteme máxa éxchahayam!

¹²“Wesse', yeyxho sélmaxnagko, ¡etaqmelchesho apháxenmo sélekxagweykha! ¡ná ewanma aqsa elanok ahaqta'ák égmen'ák nak! Ko'o sekteme sekwe yaqwatakxoho nápaqto' xép, ektémól'a m'a náta ekwél'a yaqwatakxoho, ektéma axta m'a ẽlyapmeyk nano'.

¹³Elwatés séláneykha, heyho sekxók amekxak ekpayheykekxa ewáxok, amonye' sekxega, tén han sekmassegwayam.”