Read Lengua Sur Salmos 47 Bible Online

Salmos 47 - Lengua Sur bible

Salmos 47

¹¡Kóltekpogmakha kélmék kélyókxoho kélheykha nak keso náxop! ¡Kólpeykesho Dios, yetlo kélwehéseykha kélátseykha!

²Hakte apcheymap ma'a Wesse' egegkok apteme nak Meyke Ekhémo; cha'a apteme Wesse' apwányam ekyókxoho keso náxop.

³Ẽlmallahanchessek nepyeseksa énxet'ák, ẽlméssek yaqwayam anlanha m'a pók aptémakxa énxet'ák.

⁴Ẽlyessáseykha yaqwayam anxewekxak ma'a xapop, eyaqheykencha'a nak apwáxok ma'a Jacob, apteme nak apchásekhayo.

⁵¡Apmeyákxeyk Dios Wesse' egegkok ma'a néten ekyetnamakxa nak aptaháno eyeymáxkoho, yetlo kélwehéseykha élpayheykekxa kélwáxok, tén han kélpáwasso kélaqkahasso!

⁶¡Kólmeneykmés, kólmeneykmásses negmeneykmasso m'a Dios! ¡Kólmeneykmés, kólmeneykmásses negmeneykmasso m'a Wesse' apwányam egagkok!

⁷¡Kólmeneykmásses negmeneykmasso ektaqmalma m'a Dios, hakte cha'a apteme Wesse' apwányam ma'a ekyókxoho keso náxop!

⁸¡Dios apteme Wesse' apwányam nepyeseksa apyókxoho pók aptémakxa énxet'ák! ¡Apheyk Dios ma'a néten aptaháno ektaqmalma nak!

⁹Apyepetchákxeyk kelwesse'e apkeláneykha nak apchókxa m'a Dios énxet'ák apagkok, cham'a Abraham nak Dios apagkok,

¹⁰hakte Dios apteme apagkok nélwanmeygkaxa. ¡Cha'a apteme néten ekyókxoho aqsok ma'a!