Read Lengua Sur Salmos 48 Bible Online

Salmos 48 - Lengua Sur bible

Salmos 48

¹¡Apwányam apagko' Wesse' egegkok! ¡Payhawók kólteméssesek apcheymákpoho Dios egagkok ma'a tegma apwányam apagkok nak, tén han ma'a egkexe ekpagkanamaxche apagkok nak!

²¡Tásók agko' nak la'a m'a egkexe netno' nak Sión, cham'a ekpayho nak nexcheyha! ¡Cha'a élpeykessáseykekxa chá'a apwáxok apyókxoho énxet'ák apheykha nak keso náxop! Wesse' apwányam tegma apwányam apagkok ma'a.

³Apheyk Dios ma'a tegma apkelyawe nak Jerusalén; Apkeltennásamákpek Dios apteme negyexanmomakxa meyke ektáhakxa negha.

⁴Apyepetchákxeyk pók ma'a kelwesse'e apkelwányam nak, apyókxoho han apkelxegakmok apya'awa yaqwayam elnapakpok ma'a.

⁵Xama axta apwetágwa'a tegma apwányam, kelpekhekak axta apkelwáxok, apkelyegwakkek axta, keñe apkenyahágko.

⁶Taxneyk axta apkelwáxok apkelaye: apkelpexyawáha axta apkellegágkoho ekmáske, máxa axta aptamhágkok ma'a kelán'a ekmáheyól'a katnehek naqláwa;

⁷ektémól'a m'a éxchahayam eñama nak teyapmakxa ekhem, élekkexma axta m'a yántakpayhe ekyawe eñama nak Tarsis.

⁸Egaqta'ák egagko' axta negko'o negwet'ak ma'a ektémakxa axta sẽltennáseykha, cham'a tegma apwányam apagkok nak Dios egagkok, Wesse' egegkok ekha nak apyennaqte, ¡apmáheyo chá'a elanha Dios meyke néxa m'a Jerusalén!

⁹Oh Dios, kaxének chá'a negko'o egwáxok ekyawe segásekhayo m'a kañe' nak tegma appagkanamap apagkok.

¹⁰Oh Dios, kólteméssesek chá'a exchep apcheymákpoho ekyókxoho keso náxop, ekhawo ektémakxa nak ekxénamaxche' apwesey, hakte yetlo apmopwána chá'a exchep etaqmelchessásekxak apheykha m'a énxet'ák.

¹¹¡Kalpayhekxa kélwáxok kélheykha nak egkexe Sión! ¡Kólnextegmakha néten kalpayhekxak kélwáxok kélheykha nak tegma apkelyawe Judá, eñama ekpéwomo apkelánekxésso kélheykha m'a Dios!

¹²Kólweynchamha m'a neyáwa nak Sión, kólyetset tegma apkelwenaqte aphágko nak ma'a;

¹³kóllano m'a kélhaxtegkesso nak nepyáwa, tén han ma'a tegma apkelyawe apkeltaqmalma agkok nak, yaqwayam enxoho kóltennasha chá'a m'a kéltawán'ák peya nak elántépekxak makham egmonye',

¹⁴aptémakxa m'a Dios meyke néxa. ¡Cha'a apteme segyentameykha meyke néxa m'a!