Read Lengua Sur Salmos 5 Bible Online

Salmos 5 - Lengua Sur bible

Salmos 5

¹Dios Wesse' apwányam ahagkok, eñoho ko'o sekpeywa, yeyxho élekxagweykha ewáxok, eñoho ko'o sélmaxnagko, hakte élmaxnakkek ko'o exchep.

³Yeyxhok chá'a exchep sekpeywa axto'o, axto'ók agko' chá'a altennaksek ma'a setnamakxa nak, aleyxek chá'a exchep heyátegmowagkokxa'.

⁴Háwe exchep Dios ekleklamól'a apwáxok ma'a nentémakxa ekmaso nak; mopwanchek xép exek xamo' ma'a élmasagcha'a nak apkeltémakxa,

⁵megyohok han exmakha aphakxa m'a éleymáxkoho nak apkelwáxok. Eltaqnaweygkohok chá'a m'a énxet'ák élmasagcha'a nak apkeltémakxa,

⁶emasséssamhok chá'a exchep ma'a énxet'ák apkelmopwancha'a nak amya'a, eltaqnaweygkohok chá'a exchep ma'a énxet'ák appelakkassesso nak chá'a esexnenak pók, tén han ma'a ekhéyak nak chá'a apkelyógkexma'.

⁷Ewanchek eyke ko'o atxek tegma appagkanamap apagkok eñama seyásekhayo ko'o exchep; ¡Ewanchek alpeykeshok yetlo ekyawe agko' seyáyo, wanmexhok ma'a apyetnamakxa tegma appagkanamap apagkok!

⁸Wesse', hepékessessák ko'o yaqwayam atnehek ma'a aptémakxa nak xép ekpéwomo aptémakxa, hakte apxámok ma'a sélenmexma nak, heyaxñásses ma'a ámay apagkok nak.

⁹Metnéssesek chá'a ekmámnaqsoho apkelpeywa m'a; ¡asagko' agko' ektémakxa apkelwáxok! Máxa takhaxpop megkólápeykekxal'a m'a apatña'ák nak, ¡apkelmopwancha'a amya'a chá'a etnahagkok!

¹⁰¡Dios ahagkok, ellegássesagkoho m'a énxet'ák nak! ¡Yána kalpehewakxak ma'a aqsok apmáheyo nak elanagkok! Elyetnakhés eñama ekxámokma melya'assáxma, hakte apkenmexeykekxeyk xép ma'a.

¹¹Kalpayhekxak sa' eyke apkelwáxok ma'a énxet'ák apkelchetamso nak ektémakxa exchep sentaqmelchesso; elmeneykmaksek sa' chá'a yetlo apkelsawassamo, hakte apkelmasmeyk xép. Kalpayhekxak chá'a apkelwáxok eñama exchep ma'a ektáha nak chá'a apchásekhayo,

¹²hakte xép Wesse' egegkok, eltaqmelchesseshok chá'a apheykha m'a ektáha nak meyenyaweykha, eláhakkashok chá'a m'a apchásekhayo nak, ektémól'a negáhakkásamaxche'.