Read Lengua Sur Salmos 55 Bible Online

Salmos 55 - Lengua Sur bible

Salmos 55

¹Dios ahagkok, yeyxho ko'o sélmaxnagko; ná etne megyaháxenmo sekwóneykha.

²Hélyahakxoho, heyátegmowák; ekwóneyha ko'o exchep eyesagko setnahakxa. Élpexyennegkek ko'o seyeye apkelpeywa m'a sélenmexma, tén han apkelpáxameykha m'a élmasagcha'a nak apkeltémakxa. Egkéssek ekyentaxno sekha; apkellókók apagko' sektamokmo.

⁴Tayha egkenyek, eyáhapwa'ak ma'a negaye nak ótsapok.

⁵Taxneyk ewáxok sélmenaye ekyawe; ¡élpexyennegkek seyeye!

⁶Keñe sektáha s'e: “Kaxho anna axtal'a ko'o exempenák aptémól'a wáx'ay; tén axta wampa', amhagkok yaqwánxa allókasek sekyampe.

⁷Wampak axta amhagkok makhawók agko'; axnamok axta m'a yókxexma meykexa nak énxet.

⁸Wanyehek axta ekpekhe agko' eyxánegkesek ma'a éxchahayam ekyennaqte, tén han segyettekhane.”

⁹Wesse', emasséssem xép ma'a énxet'ák nak, yána kalxeganmok ektémakxa apkelpaqmeyesma, wánxa aqsa sekweteya chá'a ko'o m'a apkelyennaqteyáseykha apyempe'ék, tén han apkelenmexamap,

¹⁰yókxoho ekhem ektépeykha m'a kañe' nak tegma apwányam, tén han yókxoho axta'a. Yetnegkek kañe' m'a ekmaso nentémakxa', tén han nélenmexamaxche'; yetnegkek nahan ma'a negmenyexma;

¹¹sawheykekxók negyennaqteyáseykha egyempehek ma'a apkelyánmagkásamákpexa nak chá'a énxet'ák, tén han nélyexancháseykha egmók.

¹²Mehetaqnagkók ko'o m'a xama sénmexma, sekmowána nak ko'o magwanmexók chá'a; mehektámeykmok han chá'a m'a aptáha nak chá'a sénmexeykha, sekmowána nak chá'a ko'o eyxánegkesek.

¹³¡Xép akke etaqnagkók, apteme nak sekxegexma, apteme nak sekxegexma ahagko',

¹⁴sektémo nak chá'a sekxegexma m'a Dios tegma appagkanamap apagkok, yaqwayam ólpaqhetchesaxkohok yetlo éltaqmeleykha egwáxok, sektéma nak chá'a sekxegexma ólweynchamha nepyeseksa énxet'ák apxámokma!

¹⁵¡Katlakkas eletsapok sélenmexma nak ko'o! ¡Exnagwom yetlo apaqta'ák apkelmaheykegkaxa nak apkeletsapma, hakte yetnegkek apkelwáxok ma'a aqsok ekmaso!

¹⁶Awónmakha sa' eyke ko'o m'a Dios; hewagkasek sa' teyp ma'a Wesse' egegkok.

¹⁷Apaqmeyesmakha sa', alekxagwaha sa' han axto'o, taxnám, tén han axta'a, yeyxhok sa' nahan ko'o sekpeywa m'a.

¹⁸Hewagkasek sa' teyp ma'a neyseksa kempakhakma; megyohok sa' watsapok, apxámok sa' eykhe etnehek ma'a sélenmexma nak.

¹⁹Eñak sa' ko'o sekpeywa m'a Dios, apteme nak wesse' apwányam meyke néxa', keñe sa' etnessásekxak mékoho, hakte melyaqmagkasseykmok apkeltémakxa m'a, megyeyek nahan ma'a Dios.

²⁰Apkelxegexma'a apagko' apkenmexeykekxa'; meláneykegkok ma'a aptémakxa axta apkelpaqmeyesma yaqwayam elásekhakpoho'.

²¹Elmaha chá'a m'a apkelpeywa éltaqmalma nak, ekyeykhágweykmohol'a m'a weyke nam'agkok apyegmenek pexmok agkok, keñe m'a apkelwáxok nak élxéneykencha'a m'a kempakhakma. Elmaha chá'a m'a apkelpeywa éltaqmalma nak, ekyeykhágweykmohol'a m'a pexmok égmenek, sawo élmahamtakcha'a eyke m'a apkelpeywa nak.

²²Egkés Wesse' egegkok ma'a aqsok ekyetnakhassamo nak apwáxok, sa' ewasqakkasek xép ma'a; megyohok chá'a eyaqnenek ma'a énxet apkelyeheykekxoho nak.

²³Dios ahagkok, megkawegqók sa' chá'a apkelweynchámeykha m'a énxet'ák ekyetno nak chá'a apkelyógkexma', tén han ma'a apkelmopwancha'a nak chá'a amya'a; xép sa' epalchesegmak ma'a kañók agko' nak takhaxpop, keñe ko'o may'ásseykmok xép.