Read Lengua Sur Salmos 58 Bible Online

Salmos 58 - Lengua Sur bible

Salmos 58

¹Kéxegke kelwesse'e ekyawe nak kéláyo, ¿naqsóya kélxeyenma chá'a kéxegke ekpéwomo yaqwánxa kólteméssesek énxet? ¿Naqsóya ekpéwomo kélyekpelchémo chá'a énxet'ák?

²Megkóltemék chá'a kéxegke xa ektáha nak, yetlo ekmaso élchetamso kélwáxok chá'a kóllának aqsok ekmaso; kéltekkessegkek chá'a nenyennaqteyáseykha egyempehek ma'a apchókxa.

³Nanók aptamhéyak élmasagcha'a apkeltémakxa m'a élmasagcha'a nak apkeltémakxa, apheykegkaxa axta m'a egken awáxok, nanók han aptamhéyak apkelmopwancha'a amya'a, amonye' appalleyam axta m'a apkelmopwancha'a amya'a nak.

⁴Máxa yéwa m'a énxet'ák nak, segaqhamól'a hentakxek; ektémól'a ekho meyke aheyk'ák, élapmól'a aheyk'ák,

⁵yaqwayam enxoho megkañék apmeneykmasso m'a yohóxma yéwa yáp nak.

⁶Dios ahagkok, ¡elekkexches apma'ák! Wesse', ¡elekkexches élyawakxa am'ák xa yámakméwa nak!

⁷Emasséssem xép ma'a, ektémól'a yegmen ényé ekmassegwayam la'a; elyameyk sa', ektémól'a pa'at élteyammomaxche m'a ámay;

⁸elpayhekxak sa', ektémól'a kalpayhekxak ma'a akpog eymánog, ¡ektémól'a sakcha'a apketsapmal'a egken awáxok, méteyól'a ekhem éltátchesso!,

⁹eláléwak sa' ektémól'a yámet ekha nak am'ák kólwatnek, amonye' apkelya'ásegwayam; kólpátekkesek sa' yetlo apkeltaqnómap apagko', ektémól'a pa'at axnancha'ák.

¹⁰Kalpayhekxak sa' apkelwáxok kélyaqmagkassásekxo enxoho kélteméssessamakxa m'a apkelpéwomo nak; ¡elyássesek sa' apmagkok éma apagkok ma'a élmasagcha'a nak apkeltémakxa!

¹¹Keñe sa' etnehek elpaqmétek se'e: “¡Háwe eyaqhémo antéhek nempéwomo! ¡Apyetneyk xama Dios apteme nak apkelyekpelchémo apyókxoho énxet'ák keso nélwanmeygkaxa'!”