Read Lengua Sur Salmos 59 Bible Online

Salmos 59 - Lengua Sur bible

Salmos 59

¹Dios ahagkok, hewagkas ko'o teyp, neyseksa apmáheyo hemok sélenmexma; hemyow ko'o neyseksa sektámeyam ma'a énxet'ák.

²Hewagkas teyp nepyeseksa énxet'ák élmasagcha'a nak apkeltémakxa, nágyoho ko'o heyaqhek ma'a ekyetno nak chá'a apkelyógkexma',

³apyetneyk énxet'ák apkelyennaqte, sélhaxanma nak apmáheyo heyaqhek. Wesse', magwanmexeykekxak xép, malaneyk han may'assáxma;

⁴malaneyk ko'o aqsok ekmaso xama enxoho, makke kahaxanmak appekhéssamo sektámeyam. ¡Exatakha'! ¡hélanyexegma', elano!

⁵Wesse', Dios ekha nak apyennaqte, Dios apagkok nak Israel, exatakha', ellegássesagkoho xa énxet'ák melya'áseyak nak xép; nágkalapyósho elanok xa élmasagcha'a nak apkeltémakxa, apkelsexnenagko nak chá'a apnámakkok.

⁶Axta'a chá'a elchexyók, elpáwha chá'a ektémól'a semheg, elhaxnegchamok chá'a m'a tegma apwányam.

⁷Katyapok chá'a apkelpeywa ekmaso, máxa sókwenaqte sempexyekhayól'a m'a apkelpeywa, yának chá'a megkañáxchek apkelpeywa.

⁸Wesse', yesmaksek eyke chá'a exchep ma'a, elwanyohok chá'a exchep xa melya'áseyak nak xép.

⁹Dios ahagkok, sa' eyke ótak chá'a sekmeyamáxche m'a aphakxa nak, hakte xép apteme semasma apyennaqte, tén han setaqmelchesso.

¹⁰Hélanyexegmak sa' ko'o m'a Dios seyásekhayo nak; hexekmósek sa' apmenxena m'a sélenmexma.

¹¹Nágkalapyósho elano', yaqwayam sa' kalxénwakxohok chá'a apkelwáxok ma'a énxet'ák ahagkok nak; yexpánches yetlo apmopwána, etnessásekxa kóneg agko'. ¡Wesse' egegkok apteme sentaqmelchesso!

¹²Apkelpeywa chá'a kalanaksek melya'assáxma; ¡kalmekxak sa' ma'a ektémakxa nak éleymáxkoho apkelwáxok, tén han ma'a aptamhéyak nak chá'a apkelmopwancha'a amya'a apkelxeyenma elanagkok aqsok!

¹³¡Emasséssem, esawhoho yetlo aplo! ¡Melwetakpekxók sa' chá'a! ¡Kólya'asagkohok sa' Dios apteme Wesse' apwányam ma'a Israel, ekweykmoho m'a ektemegwánxa nak néxa xapop!

¹⁴Apkelchexyekmek sa' agkok axta'a, apkelpáwanto enxoho ektémól'a semheg, apkelhaxnegchágwa'akto enxoho tegma apwányam etegyagkok aptéyak, elwónchesha sa' eñama melyaqkányam.

¹⁶Keñe sa' ko'o, anneykmássesek xép axto'o alpeykesho'; magwésagkok sa' axének ektémakxa nak xép segásekhayo, tén han apmopwána. Hakte xép apteme setaqmelchesso, tén han sekyexanmomakxa ekwa'a enxoho ekmaso sekha.

¹⁷Dios ahagkok, anneykmássesek sa' ko'o exchep negmeneykmasso, hakte xép apteme semasma apyennaqte, tén han setaqmelchesso, ¡xép apteme Dios, seyásekhayo nak ko'o!