Read Lengua Sur Salmos 62 Bible Online

Salmos 62 - Lengua Sur bible

Salmos 62

¹Dios apteme wánxa segkésso meyke ektáhakxa sekha; cha'a keñamak sekwayam teyp ma'a.

²Wánxa apteme sewagkasso teyp ma'a, tén han setaqmelchesso. Meheltemessásekxeyk sa' kóneg, hakte cha'a apteme sekyexánegweykekxexa m'a.

³¿Yaqsa sa' ekhem kólwátesagkok sélchetámeykenta kéxegke, tén han kélmáheyo hélpekkenek náxop, ektémól'a nápakha tegma kélyaqnegkesso, essenhan han ma'a kélhaxtegkessól'a ketók ekyaqnenmakxa náxop?

⁴Wánxa aqsa élxéneykencha'a kélwáxok hélyaqnegkesek; atsek chá'a kéxegke kóltéhek kélmowancha'a amya'a. Kélpeywa aqsa chá'a kaltaqmalmakha hélxének, keñe m'a kélwáxok nak, élxéneykencha'a chá'a hélteméssessamhok exma ekmaso.

⁵Dios apteme wánxa segkésso meyke ektáhakxa sekha; hakte cha'a keñamak sélhaxneykha chá'a ko'o m'a.

⁶Wánxa apteme sewagkasso teyp ma'a, tén han setaqmelchesso. Meheltemessásekxeyk sa' kóneg, hakte cha'a apteme sekyexánegweykekxexa m'a.

⁷Dios keñamak ko'o sekwayam teyp, tén han kélteme chá'a séláyo; cha'a apteme chá'a setaqmelchesso m'a, tén han sekyexánegweykekxexa'.

⁸¡Énxet'ák ahagkok, nágkólya'ássem chá'a Dios! ¡Kóltennés chá'a ekyókxoho ektáhakxa kélwáxok! ¡Dios apteme negko'o segmasma!

⁹Aphawók énxet ma'a xama negwátekhapma ekmanyehel'a kamaskok, cham'a énxet meyke nak aqsok apagkok, tén han ma'a ekxámokma nak aqsok apagkok; kélyetsátegkek agkok xama kelyetsáteyák xa apyókxoho nak, exhok pók apkelexyawe.

¹⁰Nágkólásenneykxa m'a negyennaqteyáseykha nak egyempehek, ¡nágkaxénmakha kélwáxok kapasmok ma'a aqsok élmenyexamaxche'! Kéltemék sa' agkok ekxámokma aqsok kélagkok, nágkólásenneykxa m'a selyaqye kélagkok nak.

¹¹Hágkaxwe ko'o añak etnehek appeywa Dios se'e: ektáha apagkok ma'a apmopwána, tén han ma'a segásekhayo nak. Tén han apmésso chá'a xama énxet ekpayhawo nak chá'a ektémakxa aqsok apkelane.