Read Lengua Sur Salmos 65 Bible Online

Salmos 65 - Lengua Sur bible

Salmos 65

¹Oh Dios, apkeñama nak Sión, ¡payhawók xép kólteméssesek apcheymákpoho!, ¡payhawók xép kóllanaksek ma'a aqsok apkeltémo nak kóllanaksek,

²hakte yeyxhok chá'a exchep kélmaxnagko! Apyókxoho énxet sa' elyo'ótak xép.

³Ẽlmomchek negko'o m'a nentémakxa ekmaso, makke exchep eyaqmagkáseykekxak nentémakxa mólya'assáxma.

⁴Apkeleñémo énxet apkelyéseykha nak xép, apyentameykekxa nak xép ma'a aphakxa nak, apwáxok nak ma'a tegma appagkanamap apagkok. ¡Kalpeykásekxohok agko' sa' negko'o egwáxok ma'a aqsok éltaqmalma ekhéyak nak apxagkok, aqsok élpagkanamaxche ekhéyak nak ma'a tegma appagkanamap apagkok!

⁵Dios, Sẽlwagkasso nak teyp negko'o, egátegmowágkek negko'o exchep, yetlo ekyawe apkelane aqsok sentaqmelchessáseykekxo nak negheykha; megkólya'ásseykmok xép ekyókxoho keso náxop, ekweykmoho m'a énxet'ák apheykha nak makhawók agko', teyp wátsam ekwányam;

⁶apkeláncháseykegkek xép meteymog élwenaqte, yetlo apmopwána, tén han apyennaqte.

⁷Emasseksohok chá'a exchep éxtegyawà ekyennaqte m'a élyaqyahayam nak, tén han apyennegkesso exma nak énxet'ák;

⁸kawomhok apkelpexyennama elwetak aqsok sempelakkasso nak agwetak apkelane exchep ma'a énxet'ák apheykha nak makhawók agko' keso náxop; apkelwóncháseyha apkelátseyncha'a énxet'ák ma'a ekpayho nak ekteyapmakxa ekhem, tén han taxnegwánxa ekhem, eñama exchep.

⁹Xép aptaqmelchesso xapop; yáphássesek chá'a ekmámeye, etekkessesek han chá'a aqsok kélcheneykekxa; etekkesek chá'a exchep hótáhap kélcheneykekxa m'a ényahamakxa nak yegmen. ¡Cháxa aptémakxa exchep elának namyep xa!

¹⁰Eyássesek chá'a exchep ma'a xapop kélpeyncheyam nak, eyélaqteyásekxak chá'a m'a élekhahéyak nak; emámeyaksek chá'a ekyawe agko' yemhapaksek xapop, exámássesek chá'a ekyexna aqsok kélcheneykekxa'.

¹¹Exámaksek chá'a exchep aqsok ekwokmo enxoho néxa apyeyam, ekxeykxak chá'a exchep ekxámokma aqsok ekyexna neptámen, apyeykhagwánxa enxoho chá'a;

¹²kaltaqmelagkokxak chá'a pa'at ma'a yókxexma meykexa nak énxet, kasawhekxohok chá'a kalpayhekxak awáxok ma'a egkexe nak;

¹³kasawhekxohok chá'a élleykha kélnaqtósso m'a xóp ekpayhegwayam nak, esawhekxohok chá'a hótáhap kélcheneykekxa m'a élyapwátegweykenxa nak xapop, ¡kalmeneykmaksek chá'a ekyókxoho, kalwehesha chá'a kalátsaha!