Read Lengua Sur Salmos 69 Bible Online

Salmos 69 - Lengua Sur bible

Salmos 69

¹Dios ahagkok, hewagkas ko'o teyp, hakte ketók ko'o sekweyweykegkaxa;

²ekweywegkek ko'o kañe' yáma yelpa' ekmattawóneg, méko sélteyagwánxa. Ekwokmek ma'a éttawanyexa agko' nak yegmen, éñawássek yegmen ényé.

³Wagqakmek eyespok ekpayheykha ahátog; chássek eyespok; ¡kelyampa'ak ahaqta'ák séltémo ótak exegmak Dios!

⁴Apxámok apagko' ma'a setaqnagko nak chá'a meykexho sektáhakxa', apyeykhágweykmok ma'a ekwánxa nak ekxámokma éwa'; apxámágkek apagko' ma'a sélenmexma, apmáheyo nak chá'a hemasséssók meykexho sektáhakxa, apkeltémók han chá'a almeyásekxak ma'a aqsok megkatnaha nak sélmenyexma.

⁵Dios ahagkok, apya'ásegkok xép sektéma seyeyháxma ahagko'; mowanchek akpósek may'assáxma.

⁶Wesse' Dios ekha nak apyennaqte, ¡nágyoho aqsa elmegqeyk ma'a apcháyo nak chá'a exchep eñama ko'o sélsexnenagko! Israel Dios apagkok, ¡nágyoho aqsa kalyaqhapwomhok apkelwáxok apketamsamo apagko' nak chá'a exchep, eñama ko'o sélsexnenagko!

⁷Élmalláneykegkek ko'o sektaqnómaxche', eñama sekyetleykha exchep; ekmegqaktegke';

⁸¡máxa mók nekha séñama etnéssessók ma'a élyáxeg'a ahancha'awo' nak, máxa mehey'ásegko aptemék ma'a énámakkok nak!

⁹Magwéssók ko'o sélmeyeykencha'a m'a apxagkok nak xép; epheweykekxeyk ko'o sénmexeykha m'a apxéneykha nak chá'a ekmaso exchep.

¹⁰Élekxagweyha agkok chá'a yetlo mato sekto, hésmaksek chá'a;

¹¹ektaxneykxeyk agkok nahan chá'a m'a apáwa senlapwayam nak, hésmaksek chá'a m'a apyókxoho nak.

¹²Hexénmakha chá'a, elanagkok chá'a apkelmeneykmasso hexének ma'a anmen át'ák nak.

¹³Wesse', ekwóneyha eyke ko'o exchep. ¡Dios ahagkok, hepásem kaxwo'! ¡Heyátegmowák, eñama ekyawe segásekhayo! ¡Hewagkas teyp, eñama melwátésseyam sempasmo!

¹⁴¡Nágyoho ko'o aweywagkok negyelpa'! ¡Hewagkas ko'o teyp nepyeseksa m'a setaqnagko nak chá'a, tén han ma'a yegmen ekmattawóneg nak!

¹⁵¡Nágyoho heswok yegmen ényé! ¡Nágyoho heweykesagkok ma'a yegmen ényé ekyéhegwayam ekyennaqte nak, tén han heyápekxa'!

¹⁶Wesse', heyátegmowák ko'o, ¡tásek xép apwáxok, awanhek han segásekhayo! hepásegwata ko'o, eñama ekyawe apmopyósa henlano';

¹⁷¡ná etne aqsa mehelányo, ko'o sektáha nak xép apkeláneykha! ¡Heyátegmowák sa' heykxa', asagkek ko'o setnahakxa!

¹⁸¡Hépetchegwatámho, hewagkas teyp nepyeseksa sélenmexma!

¹⁹Apya'ásegkok xép seklegeykegkoho m'a sektaqnómaxche', tén han sekmegqakto, tén han sélxéneykha ekmaso; apya'ásegkok xép ma'a sélenmexma nak.

²⁰Etwassáseykha ko'o ewáxok ma'a sektaqnómaxche'; ¡eyélaqtéssegke', meyke sekyennaqte etnéssessók! Chaqhémok sektegyeykencha'a yaqwayam hepeykessásekxak ewáxok, tén han kapyósho hélano'.

²¹Pánaqte segaqhamo chá'a hénchahassásekxak sekto, hem agkok han chá'a eyaqhak, heyagkok chá'a m'a aqsok égmenek ekmáske amnáye nak.

²²¡Yána katnekxak aqsok ekmaso m'a aptéyak nak, yána katnekxak ekho kelhanma m'a mésa apagkok!

²³¡Yána katnahagkok meyke apaqta'ák, tén han kalpexyennamok apyay'ák meyke néxa!

²⁴Eyenyenta aplo nepyeseksa m'a; ¡káhapwaták sa' ma'a aplo ekyennaqte nak!

²⁵Meyke xama aqsok sa' katnekxak ma'a apheykegkaxa nak, méko sa' kaxek ma'a apkelpakxeneykegkaxa nak;

²⁶hakte apkelenmexeykha chá'a m'a apkellegassáseykegkoho nak xép apkelwáxok, apkelasméssegkek han chá'a apkelweteya m'a apkellegeykegkoho nak ekmáske, apkelyensáséyak nak xép.

²⁷Exnésho ekmaso apkellegassáseykegkoho ektémakxa ekmaso apkeltémakxa; ¡nágyoho elwetak megkólyaqmagkáseykekxa apkeltémakxa!

²⁸¡Emassés apkelwesey m'a weykcha'áhak eknaqtáxésamaxchexa nak apkelwesey m'a élyennaqte nak apnegya'ák! ¡Ná enaqtáxéssesák apkelwesey m'a ekheykegkaxa nak apkelwesey m'a énxet'ák apkelpéwomo!

²⁹Ko'o eyke, hexneyásekxa néten Dios ahagkok, sektáha nak sekháxamáxche', tén han ekyentaxno ewáxok, hewagkas teyp.

³⁰Anneykmaksek sa' ko'o negmeneykmasso axének Dios apwesey; alpeykeshok sa' yetlo sekmésso ewáxok,

³¹kayágwomhok sa' ekleklamo apwáxok Wesse' egegkok, megkaxók sa' ma'a sekmésa enxoho xama weyke kennawók seyaqhe, essenhan weyke yágkelwána yetlo kepet'ák nak, tén han aphék.

³²Kalpayhekxak sa' apkelwáxok apkellegeykegkoho nak ekmaso apheykha apkelwet'a enxoho xa, kalyennákxohok sa' apkelwáxok apkelchetamso nak chá'a Dios;

³³yeyxhok chá'a apkelmaxneyéyak Wesse' egegkok ma'a apkelmopyóseka nak, meltaqheksók chá'a énxet'ák apagkok apkelmomap nak.

³⁴¡Néten, xapop, wátsam ekwányam, kóltemésses apcheymákpoho Wesse' egegkok, tén han ma'a ekyókxoho ektáha nak chá'a élweynchámeykha m'a!

³⁵Hakte ewagkasek sa' teyp Dios ma'a Sión, enaqxátehásegkokxak sa' ma'a tegma apkelyawe nak Judá. Apkeláneykha apketchek sa' elxewekxak ma'a tegma apwányam; sa' exmakha m'a, apagkok sa' etnehek; ¡sa' exmakha chá'a apchásekhayo nak chá'a apwesey!