Read Lengua Sur Salmos 75 Bible Online

Salmos 75 - Lengua Sur bible

Salmos 75

¹Oh Dios, negméssek negko'o exchep ekxeyenma egwáxok, negméssek ekxeyenma egwáxok; negwóneyha apwesey, negmeneykmássessek han ma'a aqsok éltaqmela apkelane.

²Aptáhak Wesse' egegkok se'e: “Élyesáha sa' agkok ko'o xama ekhem, alyekpelkohok sa' yetlo ekpéwomo sektémakxa.

³Yawheyha sa' agkok xapop, yetlo m'a apyókxoho énxet apheykha nak kañe', eynnaqtések sa' eyke ko'o m'a awhak nak.”

⁴Ektáhak ko'o séláneya m'a apkelásennamap nak chá'a: “Nágkólxénmakha kéltémakxa” keñe sektáha séláneya m'a élmasagcha'a nak apkeltémakxa: “nágkóleyxkoho;

⁵nágkólxénmakha kélyennaqte, nágkólteme megkeyxnegwayam kélpaqmeyesma kélpaqmeta enxoho.”

⁶Hakte megkañamak nélyekpelchamáxkoho m'a ekteyapmakxa nak ekhem tén han ma'a taxnegwánxa ekhem, tén han ma'a meykexa nak énxet, tén han ma'a élámhakxa nak meteymog élwenaqte,

⁷Dios akke apteme segyekpelchémo: mékoho chá'a etnessásekxa nápakha, keñe chá'a pók elya'ásekxak néten.

⁸Apmeykha Wesse' egegkok ma'a apyeta nak aplo, vino kélencheheykekxa nak ma'a aqsok égmenek kéltahakkasso. Apyegkenchek sa' agkok ma'a vino, émaksohok sa' énagkok ma'a apyókxoho élmasagcha'a nak apkeltémakxa apheykha nak keso náxop.

⁹Keñe sa' chá'a ko'o axének ma'a Jacob nak Dios apagkok, anneykmássesek sa' han chá'a alpeykesho';

¹⁰hakte emasséssessók sa' ektémakxa nak apkeleymákpoho m'a élmasagcha'a nak apkeltémakxa, eyánchessessamhok sa' eyke apmopwána m'a énxet ektaqmalma nak aptémakxa.