Read Lengua Sur Salmos 77 Bible Online

Salmos 77 - Lengua Sur bible

Salmos 77

¹Ekyennaqtésawok ko'o sekpeywa sekwóneyncha'a Dios, yaqwayam enxoho heyeyxho'.

²Aktamok chá'a ko'o Wesse' egegkok élapwokmo enxoho chá'a ewáxok, malwátessemek chá'a sélya'ássesso néten emék, sélmaxneya enxoho axta'a. Makke óteyágweykmok sepeykessáseykekxa ewáxok.

³Xénchek agkok chá'a ko'o ewáxok Dios, awónek chá'a; kalchetmok chá'a ewáxok, keñe ayelqaxche' chá'a.

⁴Wesse', megyahayók chá'a exchep atyenek; ¡may'áseykegkok ko'o sektémakxa mowanchek sekmáheyo apaqmétek!

⁵Kaxének chá'a ewáxok ma'a ekhem, tén han ma'a apyeyam nentámen axta;

⁶kaxének chá'a ewáxok nélmeneykmassama axta chá'a axta'a. Katnehek chá'a kalchetamha ewáxok se'e, keñe atnehek chá'a almaxneyha:

⁷¿Megkamassegwomeya sa' sẽltaqnawéyak negko'o m'a Wesse' egegkok? ¿Mehẽlásekhóya sa' chá'a?

⁸¿Massegwokmeya sẽlásekhayo? ¿Néxa agkóya temégwokmok ma'a sẽltennassama axta henlanaksek?

⁹¿Kelwagqakmeya Dios ma'a ektémakxa nak chá'a ektaqmeleykha apwáxok henlano'? ¿Aplo enxeykel'a keñamak ekmassa apmáheyo kapyóshok henlano'?

¹⁰Wánxa eyke aqsa ko'o eyaqha ewáxok ekxéna Dios Meyke nak Ekhémo, ekmassama senteméssesso m'a senteméssessamakxa axta.

¹¹Kaxénwakxohok sa' ko'o ewáxok aqsok sempelakkasso nak agweta' apkelane axta Wesse' egegkok ma'a nano' axta;

¹²kaxének sa' ewáxok ma'a ekyókxoho aqsok apkelane axta.

¹³Oh Dios, élpagkanamaxche' ekyókxoho m'a aqsok apkelane nak xép; ¿yaqsa aqsok kéláyókxa ekhawo exchep?

¹⁴¡Xép apteme Dios apkelane nak chá'a aqsok sempelakkasso agweta'! ¡Apxekmóssegkek apmopwána m'a pók aptémakxa énxet'ák!

¹⁵Apmopwána axta keñamak apkelmeykekxo m'a énxet'ák apagkok, cham'a Jacob apketchek nak, tén han ma'a José.

¹⁶Oh Dios, xama axta exchep ekweteya wátsam ekwányam, cháyak axta, yawheykha axta m'a yegmen ekmattawóneg agko' nak;

¹⁷máméyak axta, appáweykha axta han chá'a takha' m'a néten, sawheykekxók axta nahan apkelyenma.

¹⁸Legamaxcheyk axta éxtegyawà apagkok neyseksa m'a éxchahayam ekyennaqte; keltátchessegkek axta apkelyenma apagkok ekyókxoho nélwanmeygkaxa', yawheykha axta xapop.

¹⁹Apmeykáseykekxeyk axta neyseksa wátsam ekwányam aptámeyeykekxo, apmallanegkek axta ekyawakxa yegmen, méko axta eyke ekwetassama apmenek.

²⁰Máxa nepkések axta apteméssessók apnaqleykencha'a énxet'ák apagkok, apchásenneykekxo axta m'a Moisés, tén han Aarón.