Read Lengua Sur Salmos 81 Bible Online

Salmos 81 - Lengua Sur bible

Salmos 81

¹¡Kólmeneykmásses Dios yetlo ekpayheykekxa kélwáxok, apteme nak segyennaqtésso! ¡Kólpeykesho yetlo kélwehéseykha kélátseykha m'a Jacob nak Dios apagkok!

²Kólmeneykmés yetlo kélpáwasso m'a aqsok élyaqye nak kélaqtáwasso, tén han ekmátsa kélpáwasso m'a arpa, tén han yát'axpog.

³Kólpáwes chá'a kélaqkahasso ekwokmo enxoho apteyapmakxa pelten apketkok, tén han apyennaya enxoho chá'a, hakte cháxa ekhem nenláneykxa chá'a nélsawássessamo ekwányam.

⁴Hakte cháxa apkeltémókxa nak antéhek apmésso axta Jacob Dios apagkok ma'a Israel;

⁵apchánamakxa axta antéhek, apmésso axta m'a José, apkempakhaya axta Dios ma'a Egipto. Ekleg'ak ko'o xama kélpeywa may'ásegko nak:

⁶“Eklekkessek ko'o exchep appata, éxyawassásekxeyk aptamheykha ekyentaxno.

⁷Ewóneykha axta exchep ekyentaxnama ektémakxa apha, keñe axta sekwagkassama teyp; eyátegmoweykegkek axta m'a sekhamakxa nak kañe' yaphope; élyepkónmeyk axta ko'o kéxegke, cham'a nekha nak yegmen Meribá.

⁸Kóleyxho, sélpaqhetchesso kéxegke énxet'ák ahagkok; ¡émenyeyk ahagko' ko'o kéxegke hélyahakxoho', Israel!

⁹Nágkóltegye aqsa mók aqsok kéláyókxa, éleñama nak mók nekha; nágkólpeykesho aqsa m'a aqsok kéláyókxa megkólya'ásegko nak.

¹⁰Ko'o sekteme Dios Wesse' kélagkok, ektáha axta sélántekkesso m'a Egipto; kólmayhe sa', alyaqkánegkesek sa' ko'o kéxegke.

¹¹“Makke heháxenmók ko'o m'a énxet'ák ahagkok; ¡mehélyaheykekxak ma'a Israel!

¹²Cháxa keñamak seyhayo aqsa apkeláneykegko m'a élxeyenmakxa nak chá'a apkelwáxok elanagkok, etnahagkok chá'a m'a apmakókxa enxoho chá'a etnahagkok.

¹³¡Ehaxnawók axta agkok ko'o m'a énxet'ák ahagkok! ¡Aptáha enxoho chá'a séltémókxa axta chá'a etnehek ma'a Israel,

¹⁴ekmanyehe agko' axta atnessásekxak mékoho m'a apkelenmexma nak, allegássesagkohok axta m'a apkelenmexeykha nak chá'a!”

¹⁵elyaqnenagkok axta chá'a apkelyegwakto m'a setaqnagko nak chá'a ko'o, sektáha nak Wesse', mopwanchek axta elegketakpok sekxeyenmakxa atnéssesek.

¹⁶Alagkok axta ko'o hótáhap apkeltaqmalma apagko' nak ma'a énxet'ák ahagkok, ko'o sektáha nak Dios, alagkok axta yányawhéna' apyegmenek alyaqkánegkesek.