Read Lengua Sur Salmos 84 Bible Online

Salmos 84 - Lengua Sur bible

Salmos 84

¹Wesse', ekha nak apyennaqte, ¡aptásók apagko' nak la'a exchep tegma appagkanamap apagkok!

²¡Émenye nak la'a ko'o axnamok ma'a kañe' tegma appagkanamap apagkok, pekheykha ewáxok amhagkok! ¡Ekmeneykmássessek ko'o ekmátsa agko' ekweykmoho kañók agko' ewáxok ma'a Dios memassegwayam nak!

³Oh Wesse', ekha nak apyennaqte, Wesse' apwányam ahagkok, Dios ahagkok, weykmok kesña'ay tén han yeptameygmen, élwetágweykmo ekheykegkaxa m'a nekha nak kélwatnéssamakxa chá'a aqsok, élánesseykemxa nak axanák ma'a étkók.

⁴¡Apkeleñémo ektáha nak chá'a apheykha m'a tegma appagkanamap apagkok, tén han apkelpeykessamo nak chá'a meyke néxa!

⁵¡Apkeleñémo apkelmésso nak chá'a exchep apkelyennaqte, apkelmopmenyého apagko' nak chá'a elmeyekxak ma'a egkexe apagkok nak xép!

⁶Apkelyeyk'ak sa' agkok ma'a xóp ekyapwate ekwesey nak Egaqtek Égmenek, etnessásekxak sa' ekteyapmakxa yegmen ektaqmela, kataqmelchesek sa' han aqsok ma'a ekmámeye;

⁷kántagkok sa' aqsa apkelyennaqte neyseksa apkelxega, elwetágwók sa' Dios meyke ekhémo m'a Sión.

⁸Wesse', Dios ekha nak apyennaqte, Jacob Dios apagkok, ¡yeyxho sélmaxnagko!

⁹Oh Dios, elano yetlo ektaqmeleykha apwáxok ma'a aptáha nak chá'a negko'o sẽltaqmelchesso, cham'a wesse' apwányam, ektáha axta exchep apkelyéseykha.

¹⁰¡Tásek axek chá'a ko'o xama ekhem ma'a kañe' nak tegma appagkanamap apagkok, kaxnók aweynchamha aqsa ekwenaqte m'a yókxexma! Émenyeyk ko'o atnehek sektaqmelchesso átog ma'a Dios ahagkok nak tegma appagkanamap apagkok, kaxnók axek ma'a apxanák nak élmasagcha'a apkeltémakxa.

¹¹Hakte Dios Wesse' egegkok sẽlsássesso chá'a exma, tén han sẽlmasma; elásekhohok chá'a Wesse' egegkok ma'a apkeláneykegkoho nak chá'a aqsok ektaqmela, kataqmalmakha chá'a apwáxok epasmok, elmések chá'a aqsok éltaqmela.

¹²Wesse', ekha nak apyennaqte, ¡apkeleñémo apcháyo nak chá'a exchep!