Read Lengua Sur Salmos 86 Bible Online

Salmos 86 - Lengua Sur bible

Salmos 86

¹Wesse', heyeyxho sa' ko'o, hakte yentexók agko' ko'o ewáxok, eyósek nahan;

²hemyow ko'o, hakte mayenyaweykha chá'a ko'o exchep. Xép apteme Dios ahagkok; ¡hewagkas ko'o teyp sektáha nak xép apkeláneykha, sekteme nak chá'a seyáyo exchep!

³Wesse', yepyósho ko'o hélano', ataxnegkeshok chá'a sekwóneykha exchep.

⁴Wesse', hepeykessásekxa ko'o ewáxok, sektáha nak xép apkeláneykha, hakte xeyep chá'a ko'o almaxna'.

⁵Wesse', tásek xép awáxok, meyaqmagkásekxeyk nahan nentémakxa; elásekhohok chá'a exchep ma'a apwóneykha nak chá'a.

⁶Wesse', yeyxho sélmaxnagko, ¡etaqmelchesho apháxenmo sekwóneykha!

⁷Awónmakha chá'a exchep eyesagko enxoho setnahakxa, hakte heyátegmowagkok chá'a.

⁸Wesse', ¡méko aqsok kéláyókxa aghéshok xép! ¡Méko kaxhok élane m'a aqsok apkelane nak xép!

⁹Oh Wesse', xép apkelane apyókxoho pók aptémakxa énxet'ák, sa' han xép elyo'ótak yaqwayam elpeykeshok ma'a, tén han elteméssesek eyeymáxkoho apwesey.

¹⁰Hakte xép apwánxa apagkok apteme Dios; ¡xép apteme apwányam, tén han apkelane chá'a aqsok sempelakkasso nak agweta'!

¹¹Oh Wesse', hélxekmós ko'o ámay apagkok, yaqwayam sa' eytlók chá'a ko'o meyke sekyenseyam. Yána alpeykeshok ko'o exchep ma'a apwesey.

¹²Dios Wesse' ahagkok, alpeykeshok sa' chá'a ko'o exchep ekweykmoho kañók agko' ewáxok, alteméssesek sa' chá'a eyeymáxkoho apwesey.

¹³¡Awanhók agko' ko'o exchep seyásekhayo! ¡Megyahayók amhagkok ma'a apkelmaheykegkaxa nak apkeletsapma!

¹⁴Oh Dios, apmáheyok ko'o hektámegmak ma'a énxet'ák élyenneykha nak chá'a apkelpeywa, tén han ma'a apkelyennaqteyáseykha nak chá'a apyempe'ék, megkalxeyenma nak chá'a exchep apkelwáxok, apmáheyok heyaqhek.

¹⁵Wesse', xép akke apteme Dios ektaqmeleykha apwáxok, tén han apmopyósa henlano', mepekhésamap, tén han ekyawe segásekhayo, apteme apmámnaqsoho.

¹⁶¡Yepyósho hélano'! ¡Hewagkas ko'o teyp sektáha nak xép apkeláneykha! ¡Hegkés sekyennaqte!

¹⁷Hexekmós ko'o xama aqsok yaqwayam eykpelkohok naqso' apteme seyásekhayo, keñe sa' elmegqágwakxak ektáha nak chá'a ko'o setaqnagko, apkelwet'a enxoho xa aqsok nak. ¡Wesse', epasmomchek xép, etaqmelchessáseykekxeyk ewáxok!