Read Lengua Sur Salmos 88 Bible Online

Salmos 88 - Lengua Sur bible

Salmos 88

¹Wesse', Dios ahagkok, Sewagkasso nak chá'a teyp, yókxoho ekhem ko'o séltémo exchep hepasmok tén han yókxoho axta'a,

²¡ema takha' sélmaxnagko! ¡etaqmelchesho apháxenmo sekwóneykha!

³Xámok agko' aqsok ekmaso seyáhapwe, ketók sétsapmakxa';

⁴¡ekhágweykxók ko'o m'a peya nak eletsapok, méko táhak sekyennaqte!

⁵Máxa sélyamasma táhak nepyeseksa apkeletsapma; máxa ektáhak ma'a aptekyawál'a kempakhakma, máxa táhak seyátawanyeyxko; máxa ektáhak ma'a ekmassel'a exchep apkelmasma, élwagqámeyak la'a exchep.

⁶Eyenyókek ma'a éttawanyexa agko' nak máxek, ekyáqtéssamakxa nak exma, tén han ekmattawóneg.

⁷Eyáhakkassegkek ko'o exchep aplo, ¡máxa yegmen élyaqyahayam aptemék seweykáseykegko!

⁸Éxakkassegkek ma'a énámakkok; éltaqnawássesseykmek ma'a sélxegexma'a. ¡Máxa sekmomaxche ektemék ko'o, mowanchek axyenmok!

⁹Máxa meyke ahaqta'ák ektemék eñama sélekxagweykha. Wesse', yókxoho ekhem ko'o exchep sekwóneykha, xép chá'a élya'ássessók néten emék.

¹⁰¿Exekmóshoya chá'a exchep aqsok sempelakkasso agwetak ma'a apkeletsapma nak? ¿Egkéshoya chá'a exchep ekxeyenma apkelwáxok ma'a apkeletsapma nak?

¹¹¿Kaxénaxkohoya chá'a ektémakxa mehegyenyaweykha m'a takhaxpop nak, tén han ektémakxa segásekhayo m'a apkelmaheykegkaxa nak apkeletsapma?

¹²¿Exhoya chá'a énxet apya'áseykegko aptémakxa appéwomo, tén han ektémakxa nak aqsok sempelakkasso apkelane m'a ekyáqtéssamakxa nak exma, megkaxénweykekxexa nak chá'a kélwáxok apyókxoho énxet?

¹³Wesse'; ekwóneyha eyke ko'o exchep, axto'ók chá'a almaxnak xép.

¹⁴Wesse', ¿yaqsa ektáha setaqheyásawo nak? ¿Yaqsa ektáha séxánegkesa nak ko'o?

¹⁵Nanók ko'o seklegeykegkoho, eyeynmo m'a sektémakxa axta wokma'ák, nanók setne ketók sétsapmakxa'; élenmáxamáxkok axta chá'a señássaseykegkoho, massék eyke kaxwók sélenmáxexko.

¹⁶Eyáhakkassegkek ko'o exchep aplo, maxnawok nahan;

¹⁷ewakhayak yókxoho ekhem ma'a aplo nak, máxa m'a yegmen ekyawel'a.

¹⁸Éxakkassegkek ma'a énámakkok, tén han sélxegexma'a, ekyáqtessóxma aqsa kaxwók sekxegexma.