Read Lengua Sur Salmos 9 Bible Online

Salmos 9 - Lengua Sur bible

Salmos 9

¹Wesse', ekmakók ko'o alpeykeshok xép, ekweykmoho kañók agko' ewáxok, tén han axének ma'a ektémakxa nak ekxámokma aqsok sempelakkasso agwetak apkelane.

²Xép Meyke nak Ekhémo, ekmakók ko'o exchep awónchessesha yetlo ekpayheykekxa agko' ewáxok, ¡ekmakók anneykmássesek ma'a apwesey nak xép!

³Yenyahagkok chá'a exchep apmonye'e m'a sélenmexma nak, elyaqnenagkok chá'a keñe eletsapok.

⁴Xép apteme segyekpelchémo appéwomo: apheyk ma'a aptaháno ektaqmalma nak yaqwayam hélánekxések amya'a ekpéwomo.

⁵Apkeltaqnaweykegkek ma'a melya'áseyak nak xép, apmassésseykmek xép ma'a élmasagcha'a nak apkeltémakxa, ¡apmassésseykmók apagko' apkelxénamap chá'a!

⁶Apkeletsekkek ma'a sélenmexma, apkeletsapawók xamo' ma'a tegma apkelyawe apagkok nak; xép apmassésseykmok, massegwokmók agko' nahan apkelxénamap.

⁷Wesse' egegkok eyke apteme wesse' apwányam megkatnégwayam néxa; appekkenmeyk aptaháno yaqwayam elyekpelkohok apkeltémakxa énxet'ák:

⁸Elyekpelkohok sa' énxet'ák apheykha nak keso nélwanmeygkaxa, yetlo ekpéwomo aptémakxa, exének sa' chá'a yaqwánxa etnéssesek énxet ekpayhawo nak chá'a yaqwánxa etnéssesek.

⁹Eltaqmelcheshok chá'a Wesse' egegkok ma'a kélnaqtawáseykegkoho nak chá'a, eltaqmelcheshok chá'a ekwa'a enxoho ekyentaxno apheykha.

¹⁰Wesse', mey'ássemek chá'a exchep ma'a énxet apya'áseykegkoho nak, meyenyewek chá'a m'a apya'eykekxa nak chá'a exchep.

¹¹Kólmeneykmásses negmeneykmasso Wesse' egegkok, apteme nak wesse' apwányam ma'a Sión; kóllegés énxet'ák ma'a aqsok apkelane nak.

¹²Kaxénhok chá'a apwáxok Dios ma'a ekyentaxnamo nak apheykha, megkalwagqámhek ma'a ektémakxa nak apkellekxagweykha; ellegássesagkohok chá'a m'a apkelyennaqteyáseykha nak chá'a apyempe'ék apnaqtawáseykegkoho.

¹³Wesse', yepyósho hélanok ko'o, elano ektémakxa nak séntaxnéssesso sekha m'a setaqnagko nak chá'a, ¡hewagkas teyp ketók sétsapmakxa'!

¹⁴Keñe sa' atnehek alának apyókxoho énxet neyseksa sénmeykha m'a atña'ák nak Jerusalén, payhawók xép kólteméssesek apcheymákpoho, axének sa' ekpayhékxo ewáxok hakte ewagkassek teyp xép.

¹⁵Epallekxohok chá'a apagkok máxek apkelmeta m'a melya'áseyak nak Dios, kalpextétekxohok chá'a agkok apmagkok ma'a yám'én aptegyésso apagko' nak.

¹⁶Apkeltennásamákpek aptémakxa m'a Wesse' egegkok: ¡apkelánekxésso chá'a apheykha énxet'ák ekpéwomo aptémakxa! Kalmekxohok chá'a agkok kelhanma apnegkenéyak ma'a élmasagcha'a nak apkeltémakxa.

¹⁷Exnagwók sa' apkelmaheykegkaxa nak apkeletsapma m'a élmasagcha'a nak apkeltémakxa, tén han ma'a melya'áseyak nak Dios, tén han élwagqámeyak nak ma'a Dios;

¹⁸megkatnehek sa' chá'a megkaxeyenma kélwáxok ma'a meyke nak aqsok apagkok, megkatnehek sa' chá'a eyaqhémo m'a ektémakxa nak apkelhaxneykha.

¹⁹Wesse', yempekxa néten, nágyoho keyxkohok apwáxok énxet; ¡yána elyekpelchekpohok énxet melya'áseyak nak xép nápaqto'!

²⁰Wesse', elyegwakkas xép, ¡yána elya'asagkohok aptamhéyak aqsa énxet!