Read Lengua Sur Salmos 91 Bible Online

Salmos 91 - Lengua Sur bible

Salmos 91

¹Énxet apchásenneykekxa nak Dios Meyke Ekhémo segmasma, cham'a Ekha nak Apyennaqte,

²etnehek chá'a yának Wesse' egegkok se'e: “Xép apteme sekyexánegweykekxexa', tegma apyennaqte ahagkok, Dios ahagkok seyásenneykekxo nak chá'a.”

³Wánxa aqsa apwanchek xép megyoho kamok ma'a kelhanma kélpósso nak, tén han ma'a negmasse ekmaso segaqhamo nak,

⁴eláhakkasek sa' chá'a m'a apxempenák, méko sa' katnehek apha m'a kóneg. ¡Máxa negáhakkásamaxche sa' katnehek kamyók ma'a ektémakxa nak mehenyenyaweykha!

⁵Megyekyek sa' chá'a xama aqsok ekmaso ekweyktámho nak chá'a axta'a, tén han ma'a yágke kélhaxtaqpaga nak ekhem.

⁶Megyekyek sa' nahan negmasse ekwayo nak chá'a ekyáqtésakxa exma, tén han ma'a ekmassésseykmo nak chá'a aqsok ekhakxoho ekhem;

⁷mil sa' eletsapok ma'a ekpayho nak nepsagqalwa, keñe sa' diez mil ma'a ekpayho nak apkelya'assamakxa, keñe sa' xép méko katnehek.

⁸Wánxa sa' aqsa étak xép kóllegássesagkohok élmasagcha'a nak apkeltémakxa.

⁹Aptemegkek xép apyexánegweykekxexa m'a Wesse' egegkok. Apmasma m'a Dios Meyke nak Ekhémo,

¹⁰megkáhapweyk sa' xama enxoho aqsok ekmaso, megkaweyk sa' han negmasse m'a apxagkok;

¹¹eláphaksek sa' chá'a apkelásenneykha elanha apmahágkaxa enxoho chá'a.

¹²Yeynmakha sa' chá'a, yaqwayam enxoho megkatlápagkasek xama enxoho m'a meteymog.

¹³Apwanchek sa' chá'a eweynchamha neyseksa yámakméwa, tén han yéwa ekha eyaqtáwa, tén han neptána, tén han yámakyéwa.

¹⁴“Awagkasek sa' chá'a ko'o teyp, ay'aksek sa' chá'a meykexa ektemégweykmoho exma, hakte eyásekhayók ko'o m'a, ey'ásegkok nahan.

¹⁵Ewóneyha sa' agkok chá'a, wátegmowagkok sa'; ¡ko'o ahagko' sa' han axek xamók ma'a! Amallahanchesek sa' ekyentaxno apha, ayánchesseshok sa' sekmésso apteme ekha kéláyo;

¹⁶agkések sa' ekwenaqte apha: ¡axekmósek sa' sekteme sekwagkasso teyp!”