Read Lengua Sur Salmos 92 Bible Online

Salmos 92 - Lengua Sur bible

Salmos 92

¹Wesse' egegkok, Meyke nak Ekhémo, ¡tásók agko' nak la'a exchep agmések ekxeyenma egwáxok, tén han agmeneykmássesek negmeneykmasso!

²Anxének chá'a axto'ók ekyawe agko' segásekhayo, keñe chá'a axta'a m'a ektémakxa mehegyenyaweykha,

³yetlo nélpáwasso yát'axpog, tén han ekmátsa nempáwasso m'a arpa.

⁴Oh Wesse', egkéssegkek chá'a ko'o ekmátsa ewáxok ma'a aqsok apkelane nak. ¡Peykáseykekxeyk ewáxok ma'a aqsok apkelane nak!

⁵Oh Wesse', élyawa agko' nak la'a m'a aqsok apkelane nak! ¡askehek agya'asagkohok ma'a ektémakxa nak élchetámeykha apwáxok!

⁶¡Wánxa aqsa melya'asagkehek ma'a élyeyháxma nak!

⁷Apxámákxeyk agkok ma'a élmasagcha'a nak apkeltémakxa ektémól'a pa'at, tén han ma'a apkeláneykegkoho nak chá'a aqsok ekmaso, kélmassésseyam meyke néxa aqsa chá'a etnahagkok ma'a.

⁸Keñe exchep Wesse', meyke néxa apha m'a netno' nak.

⁹Wesse', naqsók eyke negya'ásegkoho negko'o peya kólmasséssók ma'a apkelenmexma nak; tén han kélmáheyo kólexpánchesek apyókxoho m'a apkeláneykegkoho nak chá'a aqsok ekmaso.

¹⁰Eyánchessáseykegkók ko'o exchep sekyennaqte, ekweykenxal'a ekyennaqte m'a weyke kennawo', éxpaqhássessegkek nahan épátek ma'a sokmátsa nak.

¹¹Alanha sa' ko'o ektáhakxa aptekyawa m'a sélenmexma; ¡weyxhok sa' nahan élpayheykha apatña'ák eñama apkellegeykegkoho ekmáske m'a élmasagcha'a nak apkeltémakxa!

¹²Máxa áxa élyapwe sa' etnahagkok ma'a meyke nak apkeltémakxa, máxa yámet cedro sa' etnehek yektog élámha nak Líbano,

¹³máxa yámet kélcheneykekxa sa' etnahagkok ma'a Wesse' egegkok nak tegma appagkanamap apagkok, élyapwéyak la'a m'a kañe' apwáxok nak Dios tegma appagkanamap apagkok,

¹⁴megkeyxek sa' ekteme apák, keyxek sa' aqsa chá'a; kalyeyha'ak sa' aqsa chá'a katnehek, kalyápaqmáthok sa' nahan chá'a axchakkok,

¹⁵elxének sa' chá'a apteme ekpéwomo aptémakxa m'a Wesse' egegkok setaqmelchesso nak, elxének sa' chá'a méko m'a megkapéwomo nak aptáhakxa nak chá'a.